ياخوك لاتتحكم ولا يضيق صدرك وترى الطلعه علشان توسع صدرك وتنبسط مهوب علشان تشيل هم
الامور طيبه وانا اخوك والوضع ركود وكل شي يمشي على هواك
ابدا السفره ببرشلونه او مدريد والمدن الداخليه بالوسط والمغادره من برشلونه او مدريد
وتقدر تروح لمدريد وتغادر من برشلونه والسعر تقريبا نفسه
بالنسبه لخريطة اسبانيا .. روحتك لسان سيباستيان وملقا بنفس الوقت متعبه .. لان وحده شمال ووحده جنوب
لكن مهوب التعب تعب الطيران .. البلد صغير والرحله ماتاخذ ساعتين
اوصل لبرشلونه واجلس 3 ايام ومنها على ملقا 3 ايام ورح ماربيا زياره بنفس اليوم ومن ملقا على سان سيباستيان 3 ايام وبعدين على مدريد 3 ايام
طبعا العب في تنسيق المدن والتواريخ على حسب اسعر ارخاص وتوفر الطيارات .. يعني ممكن سان بعدين ملقا او ممكن توصل مدريد وتغادر برشلونه
طبعا 3 ايام يعتبر شي مناسب لكل مدينه وفرصه تلقي نظره على الكل ومدن اوروبا ان طولت فيها بتمل لانهم صغار
التنقلات بين كل المدن رخيصه جدا وخلها كلها طيران وعندك اكثر من خطوط مثل Spainair و veuling و iberia
وكلهم تقريبا سعر التذكره وجهه وحده حوالي 100 دولار وانت معك 30 في 12 يوم كثير على شخص واحد
انا اقول 20 الف تكفيك بفنادق 4 نجوم نظيفه وعيشه على الراحه ولو رفعت الفنادق وانواع الطيران ممكن تصرف 30
وترى ممكن تخليها 15 الف لو حبيت وبمستوى جيد جدا
تنقلاتك في المدن بسيط .. يعني راح تتفاجا ان فيه مناطق رئيسيه بتقضي فيها اغلب اوقاتك وفيها كل المعالم فبالتالي التاكسي بيوديك مشوار عن 3
واستخدام المترو بسيط ولافيه اي تعقيدات .. عندك خريطه من الفندق ويعلمك مكان هالمعلم .. تشوف الخريطه وتتوجه من مكانك الى المحطه اللي فيها المعلم وانتهينا
ولو كانت المحطه تمشي من شرق لغرب والمعلم بالشمال ,, وقف في نص الطريق وغير قطار متجه للشمال لوجهتك
بسيط جدا ولما تتعلم على واحد منهم راح تعرف تستخدم البقيه في جميع المدن (برشلونه ومدريد خاصه)
ملقا وماربيا تنتقل بينهم بباصات او قطار لو كان فيه وباسعار رمزيه والموضوع سهل
انت علمني من وين اي مدينه مسافر ووش تواريخك بالضبط وان حبيت ساعدناك في التخطيط او وجهناك لمكاتب ممتازه تساعدك باسعار مناسبه
بخصوص الفيزا احرص انك تاخذ من نفس الاسبانيه عن طريق مكاتب تخليص مثل الفيفا بالشرقيه او غيرهم علشان ماتصير اي مشكله لاسمح الله
وفيزا الاسبانيه بسيطه ولو قدمت مبكر راح ترتاح والطيران والفنادق في شهر 10 رخصيه جدا والسكن في اسبنيا راقي ورخيص بشكل ماراح تصدقه