السلام عليكم
الغالين اعضاء العرب المسافرون
انقل لكم تفاصيل سفرتي السريعه الى تركيا
مدة الرحله كانت 4 ايام انا وزوجي فقط
الناقل الرسمي
الخطوط التركيه
قيمة التذكره للشخص الواحد 145 دينار كويتي من تاريخ 14/11الى17/11/2012
والفندق اللي دايما نسكن فيه هو فندق Nippon hotel
يقع الفندق في تقسيم بالقرب من شارع الاستقلال وتقريبا سعر الليله 45 دينار كويتي
قرنا ان تكون سفرتنا هذي بس اسطنبول من باب كسر الرووتين والراحه والاستجمام
وهذي مو اول سفره لنا تركيا , دايما نروح لها بس هذي كانت أقصر مده
وصلنا اسطنبول تقريبا الساعه 7 صباحا ورحنا على طول الفندق بس خفنا انه مايدخلونا بسبب الوقت بس الحمد لله دخلونا على طول
ريحنا شوي وبعدها على طول على شارع الاستقلال
بس كان الجو بارد بس وايد حلو
وطبعا ما يحلى شارع الاستقلال الا ب( سميت ساراي)
وهذا كان طلبنا
بس لازم مع الشاي حليب ابو القوس
بعدها قررنا أن نرووح مكان فيه جلسات تطل على البحر
عرفتوا هذا المكان ؟؟؟
ها عرفتوا
بعد آخر نظره
هذا بكر كوي
اللي كل بطلات المسلسلات التركيه لما يزعلون يروحون له
و البطل يخلي اسطنبول كلها وفجأه يلقاها موجوده هني على هالكرسي
صار فلم هندي مو تركي
بس بصراحه المكان وايد حلو يستاهل الواحد يزعل فيه
وبعدها قررنا انا نروح (supphermall)
علشان ندخل السينما اللي تصور للمشاهد انه يحلق بطائرة فوق اسطنبول
وهذي صورة التذكره
كانت السينما بالدور 54
وهذي صورة الكافيه الي بجانب السينما من النت
بس عندي ملاحظه أنا ما حبيت هذي السينما حسيت فيها بصداع ودوخه وكنت اتمنى تخلص بسرعه على عكس السينما اللي كانت نفس الفكره تقريبا في عالم فيراري
كانت الطائره تحلق فوق ايطاليا بهدوء وبطريقه وايد حلوه جدا استمتعت فيها وماكان ودي يخلص الفلم
وبعد ماخلصنا من السينما
قررنا انا نرجع نتعشى بشارع الاستقلال والى الفندق على طول
وبجذي يكون انتهى اليوم الاول لنا في اسطنبوول
وإلى هنا يكون انتهى الجزء الأول من التقرير وأتمنى يكون عجبكم
وإلى اللقاء في جزء جديد ان شاء الله