جي بي اس
13-12-2022 - 05:59 am
في اجازة منتصف الفصل الدراسي الثاني منتصف مارس 2013 كنا في زياره عائليه مع عائله اخرى
سكنا في دبي وهم اختاروا الشارقه في شقق سبارك ريزدنس
طبعا الي يهمنا هنا هو جزئيه ايجار السياره
انا كنت مستاجر من موقع رنتال عبر شركة ثريفتي في السيتي سنتر كان تجربه ممتازه لكن ثريفتي عندهم نظام الايميل الي يجيك من موقع رنتال بتاكيد الحجز تعيد ارساله لايميل ثريفتي تاخذه من موقعهم
المهم اخوي سكن هو وعائلته في الشارقه
واستفسر عن ايجار السيارات واعطوه رقم جوال لاحد العاملين في مكتب تاجير في الشارقه مصري الجنسيه كان تعامله في البدايه رائع ويجيب لك السياره لحد عندك وفي التسليم يجي ياخذها منك
لكن عند التسليم طلب مبلغ 1000 درهم تامين وهذا شي طبيعي ومتعارف عليه وقال تتحول لحسابك بعد التاكد من خلو السياره من اي مخالفات مروريه وقت ايجارك
وراح ترجع في ظرف 3 اسابيع بالكثير
المهم عطيناه شهر وبعدها اتصلنا فيه وصار يماطل وارسلوا لي رقم الايبان مع انه مسجل عنده وقت تسليم السياره
وقال يومين ويحولها
انتظرنا اسبوع قلنا حواله دوليه تتاخر ومانزل شي
اتصلنا فيه قال انا كنت مريض ومدري ايش
وبحولها لكم غدا
انتظرنا اسبوع ثاني ومافيه اي حواله وارده لنا
اتصلنا فيه على مدى اسبوعين ماعاد يرد ابد
اتصلت عليه من جوالي وكنت متنرفز جدا جدا من تحايله ومن برود اخوي بالتعامل معه
قلت له شف لو ماترد علي جوالي انا عندي عشرين رقم جوال كل يوم بتصل من رقم وماعاد تعرف ضحاياك الجدد من القديمين ويتعطل شغلك
لكن معك اسبوع تتصرف وترسل لنا صورة الايداع اول ماتحولها
هنا قمنا تقريبا شهر ونصف من الموضوع
قال انا بكره الخميس رايح اودعها بحسابكم
قلت طيب وترا انا جاي دبي بعد عشره ايام وراح اقدم شكوى لو ماصار شي
وصلنا الى 22 مايو يعني شهرين من تسليم السياره وشيكنا عالحساب مافيه اي حواله خارجيه
كلمته وانا في دبي وقلت له ترا انا عندك وبقدم شكوى عليك لهيئة السياحه والشرطه
قال طيب بكره ان شاء الله اجيبها لك
جينا لبكره ماكلمنا احد
كلمته مايرد
كلمته من جوال واحد من الزملاء ورد وقال معليش كنت مريض ومدري ايش
قلت المهم انا بعد العصر رايح ارفع شكوى عليك وعلى مكتبكم
قال مايحصحش واحنا مش وحشين واصبر حنجيبها لك
قلت له شوف العصر ترسلها مع اي احد وبخصم لك 100 درهم حق الي بيجيبها يعني تعطينا 900 درهم بدال الف درهم
قال اوكي
بعد العصر جابها لنا 900 درهم
الخلاصه
قبل ماتتعامل مع اي مكتب ابحث عنه في قوقل لانه للاسف بعد المشكله سويت بحث لقيت هالمكتب محترف في النصب من 2009 لى اليوم ومحد وقفه عند حده
وانظمة المنتدى تمنع ذكر اسماء هالمحتالين لذلك ماذكرناها
وايضا استاجر من مكاتب معروفه لها سمعتها الدوليه
ماعاد تعرف الصادق من الحرامي فيهم
وفي النهاية انت سايح ومضطر
وهم يستغلونا