1. هذه المأساة الأولى وهي سرير الأطفال..


2. كل هذا كوم .. والإقامة الثانية بكوم..

الإخوة الكرام
السلام ورحمة الله وبركاته
من باب الوفاء للإخوة في المنتدى الرائع .. أحببت أن أشرككم التجربة في فندق جلال اغا في اسطنبول وبغض النظر فالتجربة ليست جيدة ولذلك أحببت أن تعرفوها بحيث لا تتورطوا مثل ما تورطنا.
وقبل أن أبدأ فإن كل شئ يهون عند رائحة البواليع (البيارات) وبعبارة أخرى رائحة الصرف الصحي.. وهذه المقدمة لما سوف أقول في هذه المقالة ولا انسى التطنيش وبطئ الاستجابة وسوء الخدمة في هذا الفندق الفخم.
في البداية راسلت الإخوة في مكتب الحران بتركيا وطلبت منهم أن يرشحوا لي فنادق خمس نجوم فقط وأرسلوا لي مشكورين بقائمة جيدة وبعد سؤال الإخوة عن أفضل الأماكن فأشاروا على في منطقة (لالالي) أو منطقة السلطان أحمد .. ما أطول عليكم أختر منطقة لالالي وكان الفندق فيها جلال أغا وسعر الليلة 120 يورو مع الإفطار وكان السفر في شهر أكتوبر 2009 (هذا الشهر) وهذا موقع الفندق على النت ( http://www.celalagakonagihotel.com/ )، وبعد رؤية صور الفندق بصراحة أعجبتني وفي الحقيقة أن الصور اللي شفتها بالموقع كانت مثل الحقيقة وحتى أكون منصف مع الفندق فإن الفندق راقي جداً وفيه شغلات حلوه وافكار رائعة ومنها أن كل غرفة في سريرين وكل سرير لشخصين بس حجمه كوين المهم أنه يكفي شخصين بالراحة وأنا مستغرب وضع السرير الأخر في كل غرفة.. على العموم هذه تفيد اللي عنده عايله كبيرة..
ومن الأشياء الجميلة في الفندق أن كل غرفة في جاكوزي.. يحبه قبلك.. وبصراحة الجاكوزي كبير ونظيف جداً.. وفي المرحاض(الله يكرمكم) شغله رايقه.. فيها بجنبه ريموت وتتحكم بالمويه اللي تخرج من المرحاض للتشطيف (يكفي عن الشطاف) وفيها انبوب مثل المويه هواء يعني غسيل وكوي على البخار المهم أنت أجلس والباقي الكتروني تظيف وتشطيف وهواء للتنشيف
الآن ننتقل للمأساة معاهم.. كان حجزي 5 ايام ، يوم واحد ثم انقل منهم إلى مدينة اخرى وبعد فترة ارجع لهم وأقعد عندهم أربعة أيام.
اليوم الأول كان الدخول سلسل .. ولكن المشكلة أن ماعندهم سرير أطفال وكلمتهم وقالوا ان فيه سريرين وكلهم مشغولين في غرف اخرى وقلت وش دخلني فيكم دبروا لي واحد لأني حجزي مع الحران واضح وفيه طفل معي.. المهم ما صار شئ معهم.. واتصلوا الحران علي يسلمون ويتطمنون وكذلك يعتذرون مني لأني حاجز سيارة من المطار إلى الفندق وتعطلت بالطريق ثم اتصلوا بي وقالوا انتظر ثلث أو نص ساعة وتجيك سيارة وقلت أنا مرهق واباخذ تكسي اروح للفندق، ماأطول عليكم كان اتصال الحران اعتذار ويشوفون وش الناقص وقلتهم أني حجزي بسرير أطفال ولم يحضر الفندق لي وقالوا الحران أنهم سوف يتصلون بالفندق ويحلون المشكلة .. ماصار شئ من الفندق في نفس اليوم..
المهم نومت الطفله على الأرض بعد الاستفادة من أغراض السرير الثاني (الحاجة أم الأختراع) ومشت الأمور..
ومن بكره الساعة 11 ص وقبل خروجي بساعة قالوا أبشرك حصلنا لك سرير وقلتهم صح النوم أنا الحين طالع..

هذه المأساة الأولى وهي سرير الأطفال..

والمأساة المتكررة وهي أن الخدمة سيئة جداً وأن تتصل على خدمة الغرف ما يردون وإذا ردوا ما فهموا عليك ويتكلمون بالتركي وإذا فهم عليك طنشك ولم يحضر إليك وإذا حضر إليك لا يفهم عليك ولا يسنعك ولا شئ.. بصراحة بهذه الرحلة تعلمت توصيل المعلومة بالاشارات والحمد لله الحين ابحضر رسالة دكتوراه فيها

كل هذا كوم .. والإقامة الثانية بكوم..

رجعت لهم في الفترة الثانية.. والحمد لله جابوا سرير أطفال.. ومرت الليلة الأولى بسلام..
وفي الليلة الثانية خرب التكييف ولا يطلع إلا هواء حار .. واتصل على خدمة الغرف ولا أحد جايب خبرك.. واتصلت على الاستقبال لانهم الوحديين اللي يعرفون انجليزي وارسلوا واحد يترجم مع خدمة الغرف.. وقالوا أن السنترال لكل الغرف فيه مشكلة .. وبكره راح يحلون المشكلة.. قلت: الشكوة لله.. الموت مع الجماعة رحمة.. نصبر هالليلة وبكره تنحل المشكلة.
اليوم الثاني نفس المشكلة ولا فيه تكييف .. كلمت الاستقبال ولا حياة لمن تنادي..
اليوم الثالث نفس المشكلة ولا فيه تكييف.. وانقلنا إلى مرحلة أعلى من الاشكالات مع الفندق.. حيث ظهرت رائحة نتنه من الحمام أجلكم الله وبصراحة كذبت نفسي وقلت فندق خمس نجوم ورائحة كريهة فيها.. لا لا أكيد فيه شئ خطأ أكيد أن حاسة الشم فيها مشكلة.. وبعد التأكد من الأهل أصبح الخبر صحيحاً وأتصل بهم ولا احد يرد وأكرر الاتصال ولا يفهمون علي.. وبعدها كلمة الاستقبال قلت لهم تعالوا شوفوا الغرفة الظاهر اني مؤجر عند مؤسسة الصرف الصحي.. المهم جاءوا وشموا الرائحة وقالوا شوي وانحل المشكلة .. المهم زي العادة يجون ويشوفون ولا عندك أحد.. الظاهر أني طلعت مشوار وبعدها رجعت وكانت الغرفة لا رائحة فيها.
وبعدها كلمت الاستقبال وقلت لهم عن مشكلة التكييف والرائحة الكريهة ولكن لا مجيب..
ومن الطرائف مع الحلول حقتهم يقولون افتح النافذة وشم هواء طبيعي وبارد.. وقلت لهم والازعاج من السيارات وشلون اوخره من حلكم.. الله يرحم الذكاء الخارق..
قلت بعدها ما فيه حل إلا أكلم المكتب اللي نسق لي وهو الحران.. اتصلت بالأخ المنسق لي من المكتب مرتين ولم يرد.. أرسلت له رسالة جوال بالمشاكل اللي واجهتها مع الفندق..
اليوم الرابع قعدت في الليل منكتم من الرائحة الكريهة وبصراحة كانت قوية مرة.. وش السوات؟؟ وش الحل؟؟ ما فيه.. إلا أتغطى بالبطانية وأتذكر أني نائمة في فندق خمس نجوم
بصراحة طفح الكيل.. واقابل مشرفة في الإفطار وقلت لها مري علي بالغرفة ودي اوريك شئ.. وجاءت وقلت بالله هذا فندق خمس نجوم والرائحة فايحه.. وأعتذرت وقالت أن كل الغرف اللي في خطك (تبدأ من 1 إلى 10) فيها نفس المشكلة .. وبصراحة انصدمت وقلت لها وداري ومخليننا بدون حل .. المهم قالت راح نعطر الغرفة لك الحين وراح نغسل الحمام بمويه حاره وإن شاء الله تخف الريحه..
وانتظرت إلى المساء ولكن ما فيه رد من الحران، واتصلت برقم ثاني عندي وطلع موظف أخر وقلت له عن المشكلة واعتذر مني وقلت ابشوف وش تسوون معهم.. شوي ويتصل بي مديرهم الأخ يحيى وأعتذر مني وقال أن الخطأ منا فالمفروض نتصل بك ونشوف وش مشاكلك واستفساراتك وكل شوي يتأسف ويعتذر.. وقلت له الآن ابطلع من الفندق وبصراحة لابد تشوف لكم حل مع إدارة الفندق وبلغته أني راح أكتب وش صار معي علشان الإخوة ينتبهوا من هذا الفندق.
أعتذر عن الإطالة ولكن حبيت أعطيكم التفاصيل وانتبهوا لا تقعون بمثل هذه المشاكل.
أخوكم
أبو ماريا