تجربتي السيئة جداً مع طيران
FlyDubai
تحياتي لكم أحبتي الكرام
وأحب أن أضيف تجربتي هنا لتعم الإستفادة
وأنا لا أقول وأعمم طيران فلاي دبي سيء ولكن أقول
تجربتي كانت سيئة معهم
بحكم دوامنا المتواصل أضطرينا أنا وأبو عمار
أننا نترك ولدنا عمار مع الوالدة بجدة
وكل أسبوعين ل3 أسابيع ماكسيمم ننزل جدة من دبي ونجلس الويك إند (جمعة وسبت) ونغيب (يوم الأحد) ونرجع نداوم على يوم الإثنين
وأكثر شيء نستخدمه هو الخطوط الإماراتية ، والخطوط السعودية، وأحياناً العربية (من الشارقة)
ومرة من المرات جربنا طيران ناس وما كان سيء
طبعاً ما أبغى أدخل بتفاصيل قد إيش تكلفنا هذي الرحلات سواء مادياً
وجسدياً وتعب وإرهاق بس فدى عيون عمار
قبل فترة أقترح علينا صديق أبو عمار أننا نستخدم فلاي دبي
رجع أبو عمار وقال إيش رأيك هذي المرة نستخدم
قلت يالله ، نجربها ليش ما نجربها
وتم الحجز أونلاين وهذي تفاصيل رحلتنا

ودائماً نختار المقاعد الأمامية وندفع عليها زيادة
معظم الطيرانات التجارية تعطيك تقريباً 20 كيلو مجاناً
وبعد كدة لو تبغى زيادة تدفع عليها ، نحنا دفعنا 30 كيلو وقت الروحة من دبي- جدة
على أساس في بالنا الفرق فقط في العشرة كيلو، ولأنو معانا هدايا وقلنا وقت الرجعة شنطتنا فاضية
طلبنا التاكسي ورحنا لتيرمنال 2 في دبي
وهذي التيرمنال عادة ما نستخدمه كانت الأجواء غريبة شوية بس ماشي الحال
كل شيء كان تمام تقريباً من دبي لجدة ما عدا مطبات قوية ونحنا في الجو بسبب إنو الطيارة
صغيرة وخفيفة والله أعلم مصنوعة من إيش
خلاني أتشهد الف مرة وأسمع الأطفال والحريم مساكين في الطيارة يبكوا
كان موقف رهيب فعلاً
الصدمات
الصدمة الأولى
وقت رجعتنا ، وصلنا مطار الملك عبد العزيز (القسم الأجنبي)
لأنه القسم اللي نزلنا فيه
وندور ندور ندور على التشيك إن ما لقيناه
وتعبنا نسأل ونسأل محد يعرف الجواب ليش ماهم فاتحين تشيك إن
وفي النهاية جا واحد وقال آه ، فلاي دبي الرجعة للعمرة
قلنا: طيب؟؟؟ المغزى؟؟؟
قال مو هنا روحو أسألوا (الطيار) قسم صغير شباك قزاز تصميم قديم من أبو مية سنة
وقف عندو أبو عمار لين جا دوره وهو واقف يسأل يقول: يا جماعة الخير إيش المشكلة
الصدمة الثانية
يقول له الموظف بكل برود: رجعة فلاي دبي من جدة لدبي عمرة
يعني مو هنا في القسم الأجنبي ، في قسم مطار الحجاج
نعم؟؟؟؟؟؟؟؟؟؟؟؟؟؟
كيف وما كيف؟؟؟؟؟ كيف كدة تسووا؟؟
ويقول الموظف الأحمق (أعذروني) : إنت حجزت بالإنترنت؟؟؟
أبو عمار: طبعاً
الموظف: يا أخوي ليش؟؟؟؟؟ أنا أنصح دائماً إنك تروح بنفسك تدفع الفلوس
لا تثق بحجوزات الإنترنت
أبو عمار: الناس بتطلع القمر وإنت بتقول لا أستخدم الأونلاين؟؟؟
الموظف: الله يعينك ، روح الآن الشرفيه وغير رحلتك
(الشرفية مكان يبعد يمكن 45 دقيقة عن المطار وفي زحمة جدة ممكن ساعة ونص المشوار)
أبوعمار فاض بيه : رحلتي بعد ساعة وبتقول أروح الشرفيه أغير الرحلة؟؟ إنت صاحي؟؟؟
الصدمة الثالثة
ما في غير نطلع بسرعة البرق ونجري في المطار ونطلع عشان نآخذ تاكسي
يودينا لقسم الحجاج
نوقف التاكسي وبكم يا أبوي؟؟؟؟
بمية ريال؟؟؟
نعم؟؟؟؟
من هنا لهنا بمية ريال؟؟؟
طيب مو مشكلة ، ما يهم الفلوس المهم نرجع لدبي بالسلامة عندنا دوامات ثاني يوم
الصدمة الرابعة
أخذنا طريق طويل من هنا لهنا وقلنا والله يستاهل المشوار مية ريال
ونحنا نعد الدقايق عشان الطيارة لا تفوتنا
ونوصل نقطة تفتيش
ويوقفنا الضابط ويقول لراعي التاكسي جنب جنب على جنب ما ندخلك مطار الحجاج
ليش؟؟؟؟؟
التاكسي منتهية رخصتو
طيب يا أبوي نحنا مالنا ومال أنتهت رخصتو خلونا نمشي بسرعة قبل ما تطير طيارتنا
في النهاية الضابط شافني (شاف سيدة في السيارة)
قال لراعي التاكسي: والله عشان الحرمة اللي معاكم بأمشيكم يالله ادخلو
طبعاً أنا شياطين الدنيا نطنطت قدامي كيف يقوللي (حرمة)؟؟؟؟؟؟
حرمة في عينك
الصدمة الخامسة
وقف التاكسي في أقرب نقطة للمدخل
حوالي كيلو متر واحد عشان نمشيه ونوصل المدخل
ما عليه صرنا نجري ونجري وعملنا رياضة
وأتهضم الأكل ، ونحنا في سباق مع الزمن
والله لا يوريكم المناظر اللي شفتها في الطريق
معتمرين ومعتمرات ما عندهم مكان وبينامو في الأرض
والطريق يعتبر (مزبلة) الله يكرم السامعين والقارئين
وأنا باجري وأنفاسي متلاحقة أقول لأبو عمار: يالله يحزنوا هذول كيف كدة؟؟؟ إيش هذا؟؟؟ حرام العجوزة هذي
والله قلبي أتقطع وأنا أشوف الستات العجايز
بالذات مساكين نايمات جنب الزبايل
المهم وصلنا المدخل وصرنا نجري ونجري لين وصلن عند فلاي دبي
ونطلع جوازاتنا وورقة الحجز ونعطيه للموظف الهندي
الصدمة السادسة
بكل برود
ما باطلعكم الطيارة
ليش؟؟؟؟؟؟
ليش إن شاء الله

• هذي رحلة عمرة وإنتم منتم عمرة
• ليش ؟؟؟
• (بيدور على فيزة العمرة) ويقول فين فيزة العمرة؟؟؟

طبعاً منجد صدمة ، نقول إنت منجدك بتتكلم، وبضحك صرنا نقول نحنا سعوديين منت شايف
(بكل برود) آسف ما أقدر أطلعكم هذي اوامر من مدير فلاي دبي إني ما أطلع الطيارة هذي إلا معتمرين
طبعاً ما نفع أسلوب المتحضر مع واحد عفواً (متخلف) وعصب أبو عمار
وفي النهاية قال لنا: روحوا جيبو بيرميشن من ضابط الصالة
ومافي غير ابو عمار بنرفزة يقول: خليكي هنا أنا بأدخل أجيب موافقة من ضابط الصالة
الصدمة السابعة
يروح أبو عمار ويغيب فترة طويلة ومسكين قطعها مشوار كعابي (على رجلة) لين وصل مكتب الضابط
ورجع وقال للموظف: خلاص الضابط قال أوكي
وبكل برود يقول الهندي حق فلاي دبي: ما أطلعك إلا إذا جبتللي توقيع من عنده
طبعاً خلاص أنفجرنا عليه وقلنا إيش بك الطيارة بتطير وإنت تقول جيب لنا التوقيع
في هذي اللحظات أكتشفنا إنو في زينا 3 أنفار
واحد إماراتي طيب كبير في السن وواحدة إماراتية نفس الشي
واحد ثالث ما عرفنا إيش جنسيتو كان بيصرخ على موظف فلاي دبي زينا
الموظف الهندي قاللهم ما أطلعكم
وصاروا يقولوله: نحنا جي سي سي (دول مجلس التعاون الخليجي ) ما عندنا فيزا للسعودية
والموظف الهندي يصرخ عليهم ويقول: ما لي صلاح هذي مشكلتكم أنا ما أطلع هذي الرحلة إلا معتمرين
وصارت السيدة الإماراتي تقول لي: كدة التعامل في السعودية؟؟؟؟
قلتللها: لا تزعلي نحنا سعوديين ونفس الشيء بيصير معانا ، هذي مشكلة فلاي دبي مو مننا وحقك علينا لا تزعلي
في النهاية قرر أبو عمار إنو يروح تاني ويجيب التوقيع كللو عشان لا تفوتنا الطيارة وما نبغى نغيب عن الدوام
الصدمة الثامنة
ماشاء الله على أبو عمار الله يحفظلي إياه جاب الضابط بنفسه
الضابط مرة محترم وأحترم أبو عمار وقال ولا يهمك أنا أجي بنفسي وأهزألك الموظف
وجا شاف أشقائنا الإماراتيين وصار يعتذرهم ويقول سامحونا يا أخوان
وفعلاً هزأ الموظف وقال إيش بك ما طلعتهم طلعهم
تخيلوا إيش
موظف فلاي دبي يقول
لأ
ههه شر البلية ما يضحك ، وصارت مضاربة وصراخ والضابط نادى عسكريين وهزأ الموظف
وقال إنت بتكسر أوامري وكدا، الموظف يقول كلموا مديري أنا ما أسمع كلامك أسمع كلام مديري
وأتلطعنا هذيك اللطعة والضابط مقهور من الموظف
وبيقول: حسابك معاي بعدين
وبعد الهنا بسنة رد على الجوال حضرة مدير فلاي دبي
وقال للضابط سوري خلاص بندخللهم
طبعاً الضابط هزأه ، يمكن مدير فلاي دبي خاف من الضابط أكثر من الموظف
الصدمة التاسعة
الموظف الهندي يقول: السيستم قفل سوري خلاص دحين الناس بتأخذ آخر باص للطيارة
فاتت عليكم الطيارة
طبعاً خلالالالالالالالالالالالالالالالالاص نحنا قلنا: والله يا ويلكم لو ما طلعتونا
الخطأ خطأكم وكمان بتقولوا فاتت علينا الطيارة
وفي النهاية عملنا تشيك إن نحنا وأشقائنا الإماراتيين بعد ما جا واحد وما أدري إيش سوا في الكمبيوتر
وصرنا نجري ونجري ومسكين الإماراتي الكبير في السن كان بيطيح على وجهو
وأنا كمان كنت بادردب ومسكني أبو عمار في آخر لحظة
وركبنا الباص في آخر مجموعة رايحة للطيارة
وهذي صورة أخذتها في لحظة الإندفاع الاإنساني للطيارة
وكأني بألمح عوائل إماراتية ثانية وبأتساءل
كيف دخلوا وكيف ما صارتلهم نفس اللي صار لنا؟؟ غريب!!!!!

البارت الأخير إنو قالوا ما تطلعوا شنطتكم لأنكم ما دفعتم وزن للرجعة
الثاني: حضرة الموظف ضيع علينا المقاعد الأمامية
لكن بعد ما كلمنا المضيف وورينا حجزنا للمقاعد الأمامية سمحلنا نجلس
هذي تجربتنا السيئة مع فلاي دبي
وزي ما قلتللكم أنا ما أحب أعمم وأقول إنهم بطالين في كل الرحلات
ولكن أقول هذا اللي صار لنا وعن نفسنا مستحيل نأخذ فلاي دبي مرة ثانية
تحياتي لكم