1. 5. الاسواق :

1. بسم الله الرحمن الرحيم والصلاة والسلام على أشرف الانبياء والمرسلين بعد أن أستفدت من هذا المنتدى الكريم ومن تجربة الاخوان قبلي حبيت ومن باب رد الجميل أن اعرض عليكم تجربتي وبعض النقاط التي يجب ان يتجنبها أخي المسافر ويلتفت ويحرص على بعض النقاط ألاخرى هذي تجربة ابوميس الشخصية أول شي كانت رحلتي عن طريق مكتب سياحي في عمان وكان العرض اقامة في بانكوك 3 ليال وفندق أربع نجوم و3 ليال في بوكيت وفندق خمس نجوم وليلتين في سماوي في فندق اربع نجوم مع فطور صباحي ومواصلات من والى المطار والفندق وتذاكر داخلية ونصف يوم رحلة تعريفية حلوة وكان الناقل هو الخطوط التايلاندية وهي خطوط لاباس بها مع أنها كانت تمر باكستان لكن ماطولت يمكن 45 دقيقة بس بعدين قبل الهبوط في مطار بانكوك لازم تجهز الأوراق الخاصة بالوصول والمغادربيعطونك اياها قبل الهبوط في مطار بانكوك ولاتنسى الكتابة بالانجليزي الكابتل وتكتب عنوانك في بانكوك الي هو اسم الفندق وعلى طول أول ماتفك الحزام وفتح لك الباب تروح بسرعه الى أن تصل الى لوحة مكتوب عليها Visa On Arrival فيزا أون ارايفل وتاخذ الفورم الخاص بالفيزا وتعبيه كامل بالانجليزي الكابتل مثل ماقلت ومع صورة لكل شخص وتذاكر السفر والاوراق الي انت مفروض عبيتهم قبل الهبوط والله لايهينك 1000 بات عن كل شخص معك حتى لو انه طفل وتسلمها للموظف واذا أمورك سليمة يعطيك رقم ويقول لك انتظر حتى تشوف رقم ظاهر في شاشة أمام الجلوس ، لي بعض الملاحظات للاخوان خاصة الي اول مرة مثلي ترا انجليزيتهم مكسرة ولازم انك تركز على كلامه ولا تحاول تستذكي عليهم خاصة مثل الجوازات أو الخطوط ، انا يوم لقيت ألاخوان يقولون لازم تصور الجواز وصورتين لكن لقيت العكس لا سالوني عن صورة جواز ولا طلبوا أكثر من صورة شخصية واحدة يفضل قبل ماتسافر تجهز اغراضط وتخليها قريبة منك لو احتجت لي صورة زيادة او نسيت فيه مكينة تصوير جنب الجوازات ، انا يوم قدمت طلبي كان الي في الاستقبال يتكلم من طرف خشمه في النهاية عرفت ان كل هذا علشان ياخذ بخشيش المهم اعطيته وشوي الا رقمي طمر كل الارقام ونادوني وقالو ا توكل على الله ، ياخذونك من عندهم بوابه قريبه على طول لان اصلا جوازك مختوم جاهز وروح لشناطك.
2. الشركة الي أستقبلتني واخذوني للفندق أسمها World Travel Service كان أستقبالهم ممتاز وماكان فية تاخير طوال فترة جلوسي في تايلند لانهم كانوا ياخذوني من والى الفندق ومن والى المطار.
3. سكنت في فندق Amari Boulvard على شارع سكوموفيت في شوريع ساي فاي خمسة بس الصراحة استقبال ممتاز والغرف جيده جدا والامان ممتاز في الفندق الاصنصير عنده سكيورتي والباب عنده سيكيورتي وبرا الفندق سكيورتي ، شارع نانا رود يبعد عن الفندق يمكن عشر دقائق وعلى فكرة معروف عن الفندق هذا انه يستقبل عرب دائماً وانا سكنت جنب اخواني العرب وشفتهم بالرسبشن اكثر من مره المهم شارع نانا يتفرع منه شويرع هو الي فيه حي العرب أنا صراحة ماجربت اكله لكن يقولون ان فية مطعم البتراء زين وهم يمناء ويطبخون المندي وفية الشيشة بكثرة والمقاهي المصرية يعني تقريبا كل الخدمات فية بس انا الحقيقة ما أحتجت شي ولله الحمد لاني مرتب اموري كلها قبل .
4. بالنسبة للمطاعم في بانكوك نفسها الاكلات البحرية فية مطعم حلو على شارع سكوموفيت قبل مايجيك تقاطع 24 منه على يمينك ، وفية مطعم حلو وأسمة سي فود ماركت اكلات بحرية بس فريش لكن الصراحة مبالغ في أسعاره شوي ، والاسواق الي هي السنتر المطاعم فيها حدث ولا حرج كثيرة جدا بس لازم ياأخواني تعرفون وش الاكل الي بتاكلونه مو وش الاكل هذا الي اكلناه لان الخنزير اجلكم الله داخل في أغلب اكلهم .

5. الاسواق :

• أم بي كي سوق على سوكومفيت أدواره كثيره لكن انا ما أعجبني كانه سوق شعبي وكل بضاعته جينزات بس وفيه طوكيو سنتر داخل السوق هذا صحيح مرتب اكثر من ام بي كي لكن ماشفت فية ماركات عالمية مشهورة وغالي على غير فائده علشان كذا ما أنصح فية .
• سيام سنتر وسيام دسكفري والاخير هو أحسن من الاول فيه ماركات عالمية وأصلاً السوقين حول بعض يعني مر على الثنين وشوف ترا الناس مو كلها سوا يعني كل شخص وله نظره.
• سوق سنترال نظامه مثل لنظام سوق لافتية الى في باريس يعني ادوار كثيرة وكل دور متخصص بحاجة أو حاجتين وترا الاسعار الي موجوده على البضاعة غير قابلة للمكاسرة ابداً.أنا شخصياً أرى أنه افضل سوق شفته عندهم وفي أخر دور السابع اذا ما أنا غلطان فيه المطاعم الدولية تحت مسمى Japnes Lift وأول ماتدخل مجموعة المطاعم هذي يعطونك ورقة صغيرة مثل ماتقول معرفك الخاص وهو الي تطلب فية وبعدين قبل ماتطلع تعطيهم الورقه هذي ويعرفون كم عليك وكم حسابك لان كل مطعم مايخذ منك فلوس لكن يدخل قيمة الوجبة الي أخذتها بالورقه هذي .