اهلا اخوي طلال
انت حتواجهك اكثر من مشكلة في خط سيرك لان لو راح تروح من ميلان الى زيلامسي راح تكون عندك واحد من خيارين ، يا اما بالطيران او بالمواصلات العامه او باستئجار سيارة .
اولا: الطيران الاقتصادي وهذي مشكلة بحد ذاتها خصوصا من ميلان ، يعني لو جيت شيكت على الخطوط المختلفه اللى بتنطلق من ميلان حتلاقيها كالتالي
لافتانزا اير لاين: وهو الطيران الالماني الرسمي ولو راح تروح من ميلان الى ميونخ عشن تستاجر سيارة وتروح على زيلامسي راح تلاقي سعر التذكره مرتفع جدا ويمكن يوصل الى 500 يورو ، يعني هذا الخيار صعب.
برلين اير لاين : وهو يعتبر طيران اقتصادي الماني ، لكن لو جربت انك تروح من ميلان الى سالزبورغ فرضا او ميونخ ، راح تلاقي سعر التذكره مرتفع وكمان ماراح تلاقي طيران مباشر يعني لازم تنزل اول في برلين وبعدين تروح على وجهتك وممكن توصل مده الرحلة الى 5 ساعات ، يعني هذا الخيار برضوا صعب.
اوستيريا اير لاين : وهي الخطوط النمساويه الرسميه ، ولو جربت تروح من ميلان الى سالزبورغ فرضا او ميونخ ، راح تلاقي سعر التذكره تقريبا 600 يورو ، وكمان مافي طيران مباشر ولازم تنزل في فيينا اولا ، يعني برضوا هذا الخيار صعب.
ايطاليا اير لاين : وهي الخطوط الايطاليه الرسميه ، وماراح تلاقي طيران الى ميونخ او سالزبورغ او انسبروك ، يعني انسى هذي الخطوط.
ايزي جيت : وهو الطيران الاقتصادي الاوروبي ، وعاده يكون رخيص فعلا ، لكن مافي رحلات من ميلان الى سالزبورغ او انسبروك او ميونخ . يعني انسى هذي الخطوط .
يعني اجمالا استخدام الطيران من ميلان الى ميونخ او سالزبورغ او انسبروك غير مناسب لك.
ثانيا : المواصلات العامة : وهذا الخيار ممكن بس محتاج تقسمها الى مرحلتين ، اولا تاخذ القطار من ميلان الى مدينه فيلاخ النمساويه وهي على الحدود بين ايطاليا والنمسا وتقريبا الرحلة راح تكون اربعه ساعات ، وانا في رايي تبات فيها ليلة وتتمشي في فيلاخ وكمان مدينه كلاغنفورت واليوم الثاني تأخذ القطار الى زيلامسي وتقريبا الرحلة تأخذ 3 ساعات . وانا في رايي انك تروح مباشره الى سالزبورغ بدل زيلامسي عشن تستاجر سيارة من مدينه فريلاسنق الالمانية ويصير تخليها معاك طول الرحلة وتسلمها في مطار فرانكفورت ، وانا اشوف ان هذا افضل خط سير ممكن تستخدمة.
ثالثا : استئجار سيارة : وهي فكره كويسة لكن راح تواجهك مشكلة ، وهي انك لو استاجرت سيارة من ميلان وخليتها معاك طول الرحلة وسلمتها في فرانكفورت راح يفرضوا عليك ضريبة من اقل من 300 يورو ، فاذا انت ما عندك مشكلة في الضريبة يصير استأجر سيارة وافتك من القطارات.
واذا ما عجبك المخطط اللى كتبته يصير ما عندك غير تغير المخطط وتستبدل زيلامسي النمساوية بانترلاكن السويسرية ويصير خط سيرك اسهل بحيث انك تروح من ميلان الى لوقانوا بالقطار وهي قريبة يعني الطريق راح يأخذ ساعه ، ومن لوقانوا استأجر سيارة وخليها معاك طول فتره اقامت في سويسرا وتقدر كمان تخليها معاك حتى في زيارتك الى رست وبعدين تشوف اقرب مدينه سويسريه ترجع فيها السيارة وتأخذ قطار الى فرانكفورت.
عموما فكر في الاقترحات اللى ذكرتها ولو تبغى شي الاعضاء ماراح يقصروا
تحياتي لك

تسلم يدينك يالعندليب
معلومات من ذهب ...الله يجزاك الف خير
انا قد سبق واسترجت سيارة مرتين باوروبا
هل تشوف خيار استجار سيارة جيد

انت السيارة فيك فيك طالما تبغى تروح زيلامسي وقارمش وروست ، لان المناطق هذي ماراح تستمتع بيها ولا تنبسط الا اذا معاك سيارة لان الانتقال بين هذي المناطق بالقطارات متعب وراح تتقيد بمواعيد القطارات، لكن السيارة اريح وفيها حريه اكبر ، فما اتوقع اي شخص يزور المناطق اللى راح تزورها بدون ما يستاجر سيارة ، يعني اذا انت ماراح تفرق معاك الضريبة حقت التسليم في دوله ثانية ، يصير تستاجرها من ميلان وتسلمها في فرانكفورت ولو شفت المبلغ كبير وتبغى توفره تقدر تعمل المخطط اللى قولتلك عليه في البدايه وهو انك تروح بالقطار الى فيلاخ وبعدين على سالزبورغ وتستاجر السيارة من فريلاسنق الالمانية. عموما انت حتى تحدد ايش الانسب ادخل مواقع التأجير زي افيس او يورب كار او هريتز وشوف كم يطلع قيمه الايجار اذا استلمتها من ميلان وسلمتها في فرانكفورت ، وبرضوا شوف اذا استلمتها من فريلاسنق وسلمتها في فرانكفورت ، اذا لقيت الفرق ماهو كبير او يوازي قيمه تذاكر القطار اللى حتقطعها من ميلان الى فيلاخ ثم الى سالزبورغ ، فالافضل تستاجر سيارة وترتاح من القطار وسحب الشناط. هذا رايي