بسم الله الرحمن الرحيم مذكرات اكتبها عن رحلتي لإندونيسيا
الاخوة الكرام زوار اندونيسيا عائليا لأول مرة
السلام عليكم ورحمة الله وبركاته
سوف اسرد لكم بعض التفاصيل المهمة التي واجهتني اثناء رحلتي وكانت بتاريخ 15مارس والعودة كانت بتاريخ 27مارس :
بصراحة كانت احلى واروع رحلة في حياتي وصدق اللي قال (ما في مثل التجربة الحية) من كل النواحي.
ابدا من ناحية الامور المادية لازم اول سفرية انك تصرف ماديا بزيادةوتخسر مهما حاولت ان تقتصد وتوفر لين تعرف طريقة التعامل بعملتهم (الروبية) خاصةانك تتفاجأ بان كل شيء يكون بالألاف وتعرف كم يكون الصرف سواء من الريال للروبيةاو من الدولار للروبية وكلها كم يوم وراح تتعود اهم شيء انك لازم تستخدم الالةالحاسبة في جوالك عند التعامل يعني مثلا دخلت لبقالة واخذت اغراض وطلع حسابك(500الف روبية ) انت قبل ما تحاسب احسبها بجوالك واقسم المبلغ على (3000) وهذا تقريبا هو صرف الريال السعودي تقريبا يعادل (3000) روبية يطلع المبلغ ب(166) ريال سعودي وهكذا مع الوقت راح تتعود على الصرف .
احب اوضح ان مبلغ صرف الريال السعودي للروبية ليس ثابتا على(3000) فأحيانا يزيد قليلا واحيانا ينقص قليلا.
ايضا راح تلاحظ ان الكل سيطلب (بخشيش) . في البداية كنت اعطيهم مبالغ كثيرة ومع الوقت ونعلم الصرف اصبحت استطيع التعامل معهم من ناحية الصرف وكم ينبغي ان اعطيهم ومتى؟؟
يعني مهما قرات في النت قبل سفريتك وتحاول تتفادى كل شيء فلن تستطيع لان الغالب لا يذكر او يتكلم عن بعض المواقف البسيطة ولو فعلا تلافيتها فستظهر لك موقف لم تقرا عنها ف النت لكنك مع مواجهتها وتجربتها سترسخ في ذهنك ولن تنساها ابدا وستتلافاها في سفرياتك القادمة.
اولا: انصح ان الواحد يحول فلوسه كلها للدولار حتى تكون قليلة وتستطيع وضعها ف محفظتك بسهولة وايضا لكي لا تحتاج الى مصارف الا عند التحويل للروبية . لأنك لو خليتها ريالات بتصيركثيره ولو وضعتها ف المحفظة فستكون واضحة وتصير وقتها في قلق وخوف ان تنسرق.
ولو قلت بتتركها في حسابك وتسحب وقت الحاجة من ماكينة الصراف بتحسب على كل عملية سحب (35 ريال) تقريبا وعندهم مكائن الصراف بعضها تسحب لك اعلى حد(مليون وخمسمائة الف روبية) تعادل (500 ريال سعودي ) تقريبا وبعض مكائن الصراف تسحب اعلى حد لها(مليوني روبية) تعادل تقريبا (666 ريال) تقريبا وبعضها تسحب (مليونين وخمسمائة الف روبية) تقريبا تعادل (833 ريال) تقريبا وبعضها تسحب (3 مليون روبية ) تعادل (1000ريال )تقريبا والمبلغ الاخير لا تستطيع صرفه الا من صرافات بنكساب فقط(hsbc) وهي قليلة جدا في اندونيسيا ولاتجدها الافي جاكرتا والسائق هو من دلني عليها.
انت احيانا تحتاج الى هذا المبلغ في اليوم الواحد لحساب الفندق والسائق وللأكل وللتنزه واذا لم تكن فلوسك كلها معاك فستضطر كل شوي تسحب من الصراف وكل عملية تخصم معاها من حسابك (35 ريال) تقريبا. هذي لم اعرف عنها الا بعد ما مريت في هذا الموقف وحفظتها وراح اتلافاها في المرات القادمة بإذن الله.
ثانيا: اول ما توصل مطار جاكرتا وتخلص من الجوازات وطالع تأخذ العفش اصرف من المطار من دولار للروبية لأنك تحتاجها لحساب اصحاب العربيات اللي يوصلون العفش للسيارة وايضا للسائق وايضا الفندق الذي راح تنزل فيه . انتبه من اصحاب العربيات ف المطار لانهم يهجمون عليك بعربيتين او ثلاث ويستغلون ارتباكك لأنك اول مره تزور بلد اجنبي بعائلتك ويطلبون سعر(200 الف روبية)للعربية الوحدة وهذا مبلغ مبالغ فيه بقوة وانت وقتها ما تعرف كم المبلغ المفروض يأخذه هو ايضا ما تعرف أي شيء عن الصرف. انا بصراحة سويت نفسي فاهم شوي ورفضت المبلغ وقلت كل عربية(50 الف روبية) وفي الاخير قال واحد منهم انا اشيلها بعربية وحدة ب(100الف روبية) ووافقت علما ان حقها اقل لكن ما حبيت أتأخر ف المطار ومعي عائلة لأني مازلت وقتها باقي متخوف بحكم انها اول زيارة لي بالعائلة لإندونيسيا.
ثالثا: بخصوص السائق انا اشوف انك تأخذ لك عن طريق شخص معرفة وقد سافر اندونيسيا وعنده سواق ثقة يتعامل معاه ويمدحه او ابحث في النت عن سائقين يكون مشهود لهم ف المنتديات من ناس كثير بالخير والطيبة ف التعامل. لأنك مثل ما تبحث عن السائق الثقة هو ايضا يبحث عن الشخص المحترم والعائلة المحترمة.
انا لقيت سائق عن طريق النت اسمه(عرفان ) وكان قمة في التعامل والاخلاق .ارسل سائق ثاني اسمه( زكريا) يشتغل معاه وكان ايضا ممتاز واتفقت معاه ب(550 الف روبية) بس كنت لما اتوقف عند كوفي واخذ لي مشروبات انا وعائلتي كنت اخذ له كوب ع حسابي وايضا اذا وصلنا لمطعم عربي اخليه يطلب اكله من نفس المطعم ويضيفهاعلى فاتورتي تقديرا له لأنه هو يبغى يروح لمطعم اندونيسي لأنها رخيصة . وبكذا تكون انت كسبت فيه اجر وكسبت ثقته واحترامه ولاتفكر ان المبلغ كثير عليه دام معاك عائله وتبغى تكون متطمن وانت معاه لأنه كان عند الفنادق والفلل يتخاطب معهم بنفسه ويأخذهابسعر معقول .
ايضا عند نقاط التفتيش كان يحذرنا انا وعائلتي بربط الحزام لانهم يحاولون وقت التفتيش تصيد الاخطاء عليك حتى يأخذوا منك (بخشيش). وايضا كنت مأخذ جوازات السفر الاساس معي لانهم ايضا طلبوها في نقطة التفتيش ومن حسن الحظ انها معي لان السائق يقول احيانا يتفلسفون على صورة الجواز اذا كان معاك وتارك الاساس في الفندق.
رابعا: بخصوص السكن في الجبل بونشاك افضل شيء لما تكون عائلة وحده ولأول مره تروح اندونيسيا (من وجهة نظري طبعا) ان الواحد يسكن في فندق لان الفلل صحيح انها ممتازة لكن تصلح لماتكون اكثر من عائلة او مجموعة شباب عزوبية. لأنك بعض الاوقات في الليل تحتاج تطلع مع السائق للبقالة او المغسلة او المطعم وصعبه تخليهم لوحدهم في الفلل بالذات في الليل اما الفنادق فتقدر تطلع وانت متطمن عليهم .
من الفنادق الممتازة في بونشاك فنادق اسمها (سوارنيه) 1و2و3 وكلها مطلةعلى منظر ممتاز على الجبل تكون على يمينك وانت طالع للجبل تجي عند موظف الاستقبال يوديك لغرف بعيده عن الاستقبال وعن المطل وتكون في الاسفل يمكن ينزلك اكثر من دوروكلها عن طريق الدرج عشان تطفش وتمل ويسالك صح الغرفة بعيدة؟؟ وانت بالتأكيد راح تقول نعم لأنك تتمنى على المطل يرجع يقولك – راح اذكر الكلام بنفس اللهجة- (انت لازم تسوي دعاء عشان نبحث ونلقى لك غرف على المطل انت جاي من السعودية وفيك الخيروهذي من اساليب النصابين) ويرجع الاستقبال ويجلس يطقطق على الجهاز شوي ويقول انت شخص محظوظ لقينا لك على المطل بس لازم (بخشيش) عشان اقدر احجزها لك لأنها محجوزة باسم قروب سياحي وانا راح ادبرها لك عشانك رجل طيب.ايجار الغرفة عندهم (600 الفروبية) من غير البخشيش .في البداية حجزت حق يومين وحاسبته واعطيته (البخشيش) (200الف روبية) قال لي السواق المبلغ مره كثير حق (البخشيش)(50 الف روبية) .ايضا يرفضون انك تحاسبهم حق اربع او خمس ايام مره وحده عشان مع كل تجديد يعملون نفس الحركة يبغونك تدفع (البخشيش) بس لازم تصر انك تدفعها مره وحده عشان ما عاد يلقى عليك مجال يطلب بخشيش.وهذي الاشياء اذا وقعت فيها راح تكون عندك خلفية في الزيارات القادمة عن كيفية التعامل معهم وكم المبلغ اللي المفروض تدفعه لهم. وفيه فنادق اخرى غيره بس نسيت اسمه جدا ممتاز وتعاملهم محترم ولا يطلبون( بخشيش) ايضا هناك نصيحة مهمة للي يستأجر في الفلل : ادفع حق يوم واحد فقط واذا ناسبت معاك ادفع حق بقيةالايام لأنك اذا دفعت حق يومين او ثلاثة ايام وماناسبتك وحبيت تطلع ما يرجعون لك بقية المبلغ يقولون نظامهم كذا.
خامسا: بخصوص التسوق في جاكرتا لأخذ الهدايا فيه مجمعات ومولات اسعارهم نفس اسعارنا في السعودية وانت حاط في بالك تبي اشياء مميزه ورخيصة تصلح كهدايا فأنصحك انك تنتبه فيه اسواق اسمها (بن قدوا مول) وفيه( بن قد وا مجمع كبير) مقابل فندق استون مارينا وكل هذي لا تروح لها وكمان سوق(آتريوم) لأنها نفس اسعارنا في السعودية.لكن روح وحدد للسواق سوق اسمه(بن قدوا بسر باقي) معناه سوق الجملة ويكون مفتوح من (8 ص-6 مساء) يعتبر اهم سوق للجملة وكل المجمعات في جاكرتا تأخذ بضاعتها منه بس انتبه معهم في الاسعارولاتستعجل في الشراء لانهم اذا عرفوا انك عربي يرفعون الاسعار بشكل خيالي عندك مثلا سالت عن سعر شنطة نسائية انا وزوجتي واولادي فقالوا في البداية سعرها ب(200الف روبية) وعندما رفضت وراجعتهم في السعر وتركتهم ومشيت نزلوها لي الى(50 الفروبية) يعني اكثر من النصف أي ما يعادل (16.6 ريال سعودي)ايضا سيعرضون عليك جهازللمساج من عشر قطع ويجلسوك على كرسي ويبدأون بالشرح لك عن مواصفات الجهاز ويعملون لك بعض التجربة بالجهاز للإغراء وفي الاخير يعطوك سعر خيالي .انا في البداية قالوا لي سعره(2 مليون روبية) يعادل( 660 ريال تقريبا) ويخرجون لك الالة الحاسبة ويقولون نعطيك خصم مميز بما انك عربي سيصبح سعره( مليون وخمسمائة الف روبية)انا بحكم اني صرت افهم طريقتهم في الصرف والبيع والشراء اعطيتهم سعر خيالي .قلت لهم اشتريه ب(400الف روبيه) في البداية يقولون لا واذا مشيت وتركتهم يلحقوك وتبدا التخفيضات الخيالية .المهم في الاخير اشتريته ب(600الف روبية ) شوفوا الفرق من (2 مليون ) الى(600 الف ) عشان تعرف انهم نصابين ومبالغين ف الاسعار. ويمكن يكون سعره اقل من كذا بكثير بس انت وشطارتك. وفيه مواقف كثيره لكن حبيت اذكر لكم اهمها واعذروني على الاطالة وايضا اعذروني اذا كانت فيهاخطاء املائية .وشكرا لكم
عبدالعزيز