كثير من الناس اول ما تفكر بالسفر لباريس تحط في بالها على طول الذهاب لدزني
ولو سالت اي احد ليه تروح لدزني بيقول لانها احلى مدينة ملاهي في العالم
وهذا الكلام غير صحيح نهائيا
دزني خصوصا اللي في باريس ولوس انجلوس ملاهي جدا عاديه ولا تسوى المبلغ اللي
يندفع فيها
اذا بناخذها بالمصاريف .. وبنحسبها على عائلة صغيره واحد وزوجته و2 اطفال
2*46 + 2*38 = 176 يورو يعني تقريبا 930 ريال
اذا اضفت عليها انك جاي من باريس باقل تكلفه اللي هي المترو 12.5 يورو للشخص
يعني عديت 1100 ريال تقريبا بالراحه
اما داخل الدزني فاقل شي قارورة الموية 2.8 يورو وعليك الحساب
لعبت والا ما لعبت دافع دافع
معك شغاله معك حرمة ماتبي تلعب دافع دافع
نجي للالعاب
خيول + اكواب + قطار موت عادي + المركبة او السينما اللي تتحرك وانت بوسطها + الطيارات اللي تدور موجوده باي ملاهي بالعالم
بقية الالعاب اما قطارات او قوارب بطيئم مره تمل وانت فيها
وما شفت شي ممكن ينقال عنه انه يوسع الصدر الا قطارين واحد اللي يسمونه الصاروخ
وكله يكون في ظلام وسريع مره
والثاني اللي بالكابوي
وهالقطارين ممكن تلقى احسن منها في اي ملاهي بالعالم
اما غيرها مافيه شي ابدا
والمصيبه مافيه اي تنظيم
والا المفروض مثل مافيه العاب مايدخلها الصغار
المفروض ان فيه العاب مايدخاها الكبار
بس اللي شفته ان الخيول والطيارات حقت الاطفال راكبينها شياب كبر ابوي
امسك طابور واركب وبالطقاق بالصغار
كل هذا يهون
المصيبه الطابور اللي توقف فيه عشان تلعب
وهذا الشي صاير لي مو احد قال لي وفي اكثر من لعبة
تنتظر اكر من ساعتين طابور
تنهان وتنذل عشان تلعب 5 دقايق
ليه
وش الله حادني
ماتوصل اللعبه الا انت طالعة روحك
لو الواحد يبي دورة مياة والا يشرب يورط
بيجيك واحد بيقول فيه التذاكر السريعه اللي تقصها وتروح تريح
جربتها .. مافيه شي ماجربته
رحت بقصها وكانت الساعه 3:30
عطاني موعد العب 8:30
بعد 5 ساعات
لا .. واذا جيت بتسويها في لعبة ثانيه
قال لك الجهاز معليش يبوالشباب
عندك وحده في لعبة ثانيه خلاص
انطق وامسك طابور
فيه ناس بتقول المفروض انك جاي بدري
والمفروض انك ماتجي ويكند
جاي يوم ثلاثا والساعه 11 داخل
طلعت الساعه 8 مالعبت الا 3 لعبات
اقسم بالله ما ابالغ
عاد اذا جاء مطر زي هالايام في باريس اقعد بها
تتنكد وتنحاس وفيه العاب يوقفونها حتى لوك ماسك طابور
النظام نظام
انا قاعد افكر في اللي معهم بزران والا حرمه او رجال كبير
الزبده انا اشوفها مذله مو سعة صدر
والقهر زارفين منك مبلغ وقدره ولا تقدر تفتح ثمك
قبل 10 ايام كنت بفيينا
دخلنا الملاهي بدون اي رسوم دخول
اللي يبي يلعب يدفع عاللعبه 2 يورو او 3 بالكثير
وفيها مالايقل عن 30 لعبه كل وحده احلى من الثانيه
وكل وحده اخطر من الثانية
واللي مايبي يلعب يقعد يتفرج على راحته
لو تدخل معك 20 شغاله مايكلفك الا لعب بزارينك
دزني يمكن قبل 10 سنوات الواحد يروح لها وقت
ماكان عندنا بالدول العربية ملاهي زي الناس
الحين بالسعودية والامارات والكويت وحتى مصر
اغلب الالعاب اللي بالملاهي احلى من الموجود
في دزني بكثير
بس مشكلتنا مع الخير ياشقراء
وين رايحين معهم
واذا وقف الواحد بالطابور قعد يفكر
وش الله حادني
راح علي يوم كامل بالسفر منذل
راحت عليك فلوس كثير توسع صدرك فيها
باي مكان ثاني احسن لك
اروح العب باي ملاهي ثانية معزز مكرم
نصيحه ياناس
ابعدوا عن اماكن السمعه
اللي مافيها الا سمعتها
الشانز
دزني
هايد بارك
ساحة المارينز
بحيرة جنيف
صدقوني بتستمتعون بسفرتكم
ودمتم بخير