a.n.a.s.7
03-02-2022 - 03:46 am
السلام عليكم
تحية عطره ابثها الى كل زوار وكتاب هذا المنتدى الرائع ، الذي طالما استفدت منه الكثير والكثير
نبدا في الجد ، السالفة ومافيها اني انا وصديقي الصدووق ناوين ناخذلنا اربع ايام الى اسبوع في دبي ، في اجازة مابين الترمين. وصديقي ذا من جنبها ، راح تكون ذي اول طلعه له برى المملكه ، فالله يعيني راح اكون المسؤول عن الطلعه كلها من الى، وانا قلت مالي الا اعضاء المسافرون العرب ، اللي عمرهم ماقصروا معاي.
فحبايبي ابغا منكم برنامج لشاابين مهسترين يبغون يفلونها وينبسطون في دبي دانة الدنيا يبغون يشوفون وش هي دبي اللي العالم اقلقوهم بها خ
وبليز لاحد يقلي ان البرنامج يعتمد على ذوقك وانت اللي لازم تسويه بنفسك ، لاني ماعرف اي حاجه عن دبي غير التزلج وبرج العرب >>>قايلكم من جنبها خ
ميزانيتنا والله مي ذاك الزود ،من الفين الى ثلاث، عارفين طلاب جامعيين وعايشين على المكافئة الله لا يحرمنا منها بس خ
طبعا السفرة راح تكون جو
وياليت بعد تعطونا فكرة عن اسعار الشقق او الفنادق المتوسطة ، مو شرط تكون فخمه وفايف ستارز ، لا اهم شي تكون نظيفه وموقعها حلو
الموهيم ، سوري على الاطالة وعلى الاسلوب الخايس
وفي انتظار ردودكم يالنشااما ، ومشكورين مقدما
اخوي الله يعينكم على الاسعار في دبي .. غاالية .. بس عادي تعيش وتنبسط بالي في جيبك مهما يكون .. وطبعا لو كنت صاحب خبرة او سألت عن الي تبي راح توفر فلوسك وتوفر الصرف على اكتشاف الاماكن الحلوة وتضييع الوقت ..
بعدين ترجع لديرتك وتلقاك مالقيت الشي الي على مزاجك الا اخر يوم بعد ما طارت الميزانية وترجع وانت مقهور وودك بسفرة ثانية سريعه تعوض فيها..
انا مستعد اساعدكم بالي اقدر عليه .. بس فعلا لازم اعرف وش مزاجكم بالضبط .. ممكن لكم بالاسواق وهذا له كلام لحال وممكن تحبون تزورون الفنادق الفخمة وهذا يبي له ترتيب .. ويمكن ويمكن ويمكن .. ولا نقدر نفصل كل شي بالمنتدى
ميزانتكم الفين الى 3 كل واحد ولا المجموع .. اذا كل واحد حلوة .. اذا المجموع ما انصحكم تروحون لدبي .. لأن الفلوس بتطير على مشاوير التكسي من والى المطار ويمكن عشوتين ولا سهره ماشي حالها
ولو تبغون نصيحتي روحو بالباص لدبي ترى قريبة وراح توفرون كثير .. الباص كله مايجي عشر ساعات .. ووفروا مبلغ كبير ..
ولا روحو لسوريا الوضع تمام هناك الحين .. والاجارات ارخص من دبي بكثير .. دبي السكن غالي بتتورطون ..
بتدخل شقة تتوقع ان اجارها 200 الى 300 .. بيقولك 950 وبعد الخصم 850 واحمد ربك
عموما انا راح اكون بدبي بالاجازة النصفية ولو حبيتو تسألون عن اي شي انا موجود .. ولو تبون نروح اماكن سوا ونتمشى ماعدي مشكلة .. تراي العام متخرج من الجامعة وطلاب الجامعه غالين عندي .. خصوصا جامعة الملك سعود
وعسى الله يوفقكم برحلتكم ويستر عليكم