- بداية السالفه..اتفقت انا ومجموعة (ب)
اخوكم سياتل ...غاوي سفر ما خليت ديره (بدينا من اولها يا سياتل!!) اسافر للبلاد اللي الناس اتولع فيها ..واسافر لها وانبسط فيها..وبعد ما ارجع منها تكون مجرد ذكريات حلوه(باستثناء مصر )
ودايما" اثبت لنفسي بان مافي داعي يتولع الشخص ببلد معين ويقعد رايح جاي عليه..لين ما ربي كتب سفرتي للمغرب
بداية السالفه..اتفقت انا ومجموعة (ب)
نسافر المغرب ..ترددو شوي قالو هذي سحر واي واحد يسافر يتولع ويتخسبق عقبها..واحنا..المهم بعد ما عزمت بهم طلع لي زلزال الحسيمه..قالو لو تصبنا ذهب ما رحنا شوف لنا ديره ثانيه..قلت لهم رايح ..رايح.. بكم وبلياكم..ما طولها عليكم ..سافرت بروحي من الدوحه نص الليل بالضبط على القطرية..ونزلنا في تروبلي(طرابلس الغرب) مدة ساعه تقريبا" واخوكم سياتل شغال على الافلام كل ما خلصت فيلم حولت على الثاني وكوفي رايح وكوفي جاي..المهم وصلنا مطار محمد اللي ما ادري شنو ترتيبه حدود سبع ونص الصبح(عشر ونص بتوقيت الدوحه) اتصلت لخوي وهو الشخص الوحيد اللي اكلمه اذا سافرت علشان اطمنه لاني من النوع اللي ما احب الهذره في الموبايل اذا سافرت ..علشان ارتاح...قالي الحمدلله على السلامه..قلت له اصبر للحين اخوك مسافر ما وصل
المهم المفروض طيارتنا الساعه 08:50 لاكن تأخرت لاسباب الظاهر فنية..المهم جا الفرج الساعه 1 وركبنا طياره جناحها كنه جناح طير يلعب..يرفرف..بحياتي ما خفت من طياره الا عقب ما عرفت طيارات الملكية المغربية..والمضيفات بصراحه نفوسهم خايسه؛اوزع ابتسامات عليهم وهم معصبين..المهم وصلنا مطار المسيره (سقاه السيل ,,قولو أمين)وهو مطار أغادير...وبعد البخاشيش على الجمارك والدرك اللي برا..ركبت الطاكسي (250 درهم للمهتمين بالاسعار) نص ساعه ووصلت الفندق اللي حجزت فيه وهو فندق ملينيوم(الحين اسمه سوفيتيل)فندق جديد وواعر ..بس عندي ملاحظات عليه..خذيته بحجز من الدوحه غرفه دبل معى الريوق بحوالي 850 درهم بلاش حقيقة..وصلت تعبان ..ولكن ما منع اني القي نظره على الفندق...فندق حلو مريت على النادي الرياضي وخذيت حمام مغربي خطير ومساج (550درهم) يطلع الواحد شنو مروق.. فوق النخل..دخلت الغرفه الساعه 6 قبل المغرب واضربها بواحد نعسه عالمية...ما صحيت الا سبع الصبح شبعان نوم مدة اسبوع قدام..المهم تريقت في الفندق ذاك الريوق الخطير فيه وحده تسوي خبز كنه على الصاج معى عسل وجبن وشي مخلوط بس يخليك حصان
الجو كان بريد(تصغير برد)وطلعت في ذاك الجو اللي سبحان الله كيف كان..وخذيتها كعابي(مغروم مشي)
من الملينيوم مريت على قصر الزهور (مريديان) تكيديا بيتش,اماديل بيتش لين وصلت المدعو صحارى,,احد الاخوان قالي عقب ما حجزت في الملينيوم ليش ما خذيت في صحارى احسن..يالربع غرف صحارى لا تصلح لبني أدم ,,تالي اكتشفت انه الطابق الاول والثاني هم (وليس الثالث والرابع بافضل حالا" بكثير)التعبانين,,طلعت مستغرب شلون مصنف خمس نجوم ..بس اذا عرفتو صاحب الفندق بطل العجب(للا مريم)...المهم وارجع للفندق وراتاح في اللوبي شوي. عيب الفندق وقتها كان شبه فاضي كنه بيت اشباح ..لانه ابعد فندق من وسط المدينه بس اقربهم لمرجان(يسلم لي مرجان شنو "بضاعته" تجنن)..مرجان طبعا" هو فرع كارفور الفرنسي لكن مغيرين اسمه وصاحبه مولاي رشيد(أخو الملك)
المهم يوميا" اطلع من الفندق الساعه 3ونص ومشي يالطيبين لين اخر كوفي شوب في الكورنيش اوصله تقريبا" 5 اريح اخذ لي قهوه بالحليب,,معى بلين كيك,,وبعدها اغير المسار عن طريق شارع محمد الخامس يمر على الشيراتون (فندق تعبان لحد يسكن فيه) وصاحبه مانع سعيد عتيبه,,رجال طيب بس لو يرمم الفندق اكون شاكر له لان موقعه ممتاز..صايد كل شي..مريت فندق كينزي يوروب ..موقعه خطيير بعد مشاهده "مطعم" انصح رواد اغادير بزيارته اسمه قولدن قيت,,,فيه مطرب يغني اغاني يذكرك بايام الثانوية..ارجع للفندق حدود 7 بعد ما اخلص كورس المشي هذا(نزلت عقب ذالمشي 5 كيلو في خمسة ايام)
فيه مطعم ممتاز رابطت عنده اخر ثلاثة ايام اسمه موريسك (مشاهد اماديل بيتش)
لكنه شوي غالي بس يستاهل ولاحظت ان الشباب ما حد منهم ذكر هالمطعم من قبل..وفيه ايضا" شواية النهضه لحم بلدي بس لك شوي عليه من ناحية النظافه بس ماكاينش مشكل يا سيدي اكل وانت مغمض..شي ثاني لا زم انصح فيه اللي بيزورون المغرب الحديثين قصدي..اذا جيت مطعم خذ لك شوربة حريره..وبعدها سلطة نسواز..واختمها بالمين كورس طاجين بالدجاج,,افضل مكان في اغادير يسوي طاجن مطعم ورا جبل اغادير (اروير) ..فرش..اكتشفت ان المطبخ المغربي من افضل المطابخ العالمية..قعدة في احد الكافيهات الممتده على طول الكورنيش بين العصر والمغرب,,موصي عليها الدكتور..وبعد العشا اكمل السهره في غرفتي على التلفزيون,,,او اروح بابا جيو مكان زين وذرب وناسه وشباب وودي اكمل بس البحر يشوفني وعنده مقص في يده اليمين وواحد
في اليسار,,, من عيوب الملينيوم الرووم سيرفيس اخر الليل اذا طلبت اكل تحس انهم ينادون السيكيوريتي اللي برا يسوي لك الأكل ..اكل اي كلام بس اكله شسوي ...ايضا" عليكم بمشروب سحري اسمه حليب اطلانطيك هذا قبل النوم ..بتدعون لي انشالله...
زبدة الهرج جلست خمسةليالي وطيارة الرجعه من اغادير وحده ونص الظهر.الطاكسي اللي جابني هو اللي وداني للمطار ..اسمه حسين كان يقول لي "سيدي ضروري نشوفك مره ثانيه" قلت انشالله اكيد..وانا في خاطري كنت اقول في عينك ..خلاص مره وحده تكفي تمشينا واستانسنا وشفنا بلادكم ..ما كنت ادري باللي ينتظرني اذا رجعت الدوحه..ترا مفعول السحر ما يشتغل الا اذا رجعت بلادك
رجعت وانا حاس فيه شي يجرني للمغرب ..علشان افتك سافرت دبي 3ليالي احاول اسلى....مافيه فايده...وانا في دبي رتبت معى السفريات اللي في الدوحه سفرتي الثانيه لاغادير بعد 10 ايام فقط(من اللي منكم قال مسحور :112: )
يعطيك الف مليون صحه وعافيه على الموضوع اقصد التقرير الحلو يابو حليب اطلانطك
يالغالي المغرب بلد سياحي جميل ولاكن لم احس بنفس احساسك بالرغبه في العوده وكاني مسحور
يعني رحت وجيت وتمشيت في كل مكان القصد في كلامي في اغادير لا انكر ان الشعب محترم جدا والجو روعه والكل يبتسم لك في كل مكان عربون ترحيب بالسائح في المغرب ولاكن لم اجد دافع السحر الي تتكلم عنه وناقشت احد الزملاء بخصوص الي ذكرته لك ولاكن كان له راي وهو باني ماشفت الاماكن الثانيه في كازا والرباط والمناطق الاخرى ولا اجزم برايي واحكم عليها بشي ينتقدها ولاكن قد افكر مستقبلا في الذهاب وستكون رحله طويله لاشاهد معالمها بشكل اكبر ومكثف وستكون لي رحله الى البلاد القريبه منها
ويعطيك الف مليون عافيه على الموضوع الحلو