السلام عليكم
اختي الكريمه اذا راح تروحين شنغماي ولا بوكيت
راح تكفيج عن النص يوم هذا ومعاناته
لانه الي راح تشوفينه هناك راح تحصلينه فيهم
اذا تبين تروحين
بما انكم عائله اخذو لكم باص تقريبا سعره 1500 الى 2000 بات
مدة الرحلة ساعتين ونص تقريبا على الهاي وي

العزيز دانتي المسافه ساعتين الا شوي واذا بروحك تقدر تقنع التاكسي ب 500 بات بس اذا مع العايله وتاخذون ميكروباص وسط يعني بحدود الف أو الف و200 بات بس الاهم من هالشي ان نص يوم ماتسويلك شي في بتايا وبصراحه ماتسوى العنوه وتعب الجلوس بالسياره يعني لو قلت يومين عالاقل أو ليله ويوم ثاني ترجع بانكوك كان قلت لك مثلا تروح البتايا بارك تتمتع بالسباحه والمناظر العلويه لبتايا او مثلا منتزه النونغ نوج أو استعراض الدلافين او التسوق في مجمعات بتايا القليله نوعا ما أو حتى تطلع وتزور الجزر القريبه من بتايا مثل كولان و كوشان وبالنسبه للتاكسي ممكن يصبر عليك اذا مصمم على سالفة النص يوم وكل شي بحسابه يعني مثلا تقوله يجيلك عند مدخل مجمع الرويال غاردن وتحوس شوي بالمنطقه العربية وتاخذ شارع الووكينغ ستريت والشريط الساحلي تمشي وتتمتع بالمناظر ومافي مانع من آيس كريم عالماشي لما توصل مجمع الرويال تدخل من الباب المقابل للبحر وتتمشى وتتسوق وتطلع من الباب الثاني المقابل للشارع لتجد سواق التاكسي صاحبنا بانتظارك وتمشون مسافه بسيطه الى مجمع البيج سي وهناك تنهي نص يومك وتقضي ساعه وانت اللي راجع بانكوك متمشي وشايف حي العرب وشارع جهنم - الووكينغ ستريت - ومتسوق في اشهر مجمعين ومبرد على قلبك بواسطة ايس كريم بتايا المميز وبالبنهايه بتايا مكان بحر وسباحه وجت سكي بشكل عام بس طبعا ماتصلح لنص يوم وتركب التاكسي وانت مبلل وتعبان وحران ويعطيك المكيف على حده وماتبي ترجع بانكوك امفلوز

مرحبا اختي دانتي
المسافه من مطار بانكوك الي بتايا حوالي ساعه ونصف تقريبا
صحيح انا من رواد بتايا ولكن
ما انصحك تزوري حي العرب ال في بتايا نهائيا
لان هذا المكان بذات لايصلح للعائلات
اما اذا بتروحون اماكن اخري خارج حي العرب فعندك
1- حديقة بتايا بارك المائيه
2 - حديقة الاسماك
3- عروض الدلافين .
4- حديقة الحيوانات وعرض التماسيح
5- حديقة سفاري بتايا وحديقة الزهزر
6- كورنيش جمتيان والعروض المقامه هناك
7- السينما ومراكز التسوق
8- سوق الاحد
9 - حديقة الفيله
وطبعا هذي الاماكن لا يكفيها نصف يوم فختاري منهم شيئين فقط
واذا لزم الامر ان تسكنوا في بتايا اسكنوا في فنادق ال على شاطئ الجمتيان مثل بتايا بارك او رويال كلفت
وان شاء الله تروحون وترجعون بالسلامه

نص يوم لا يكفي بصراحه المدينه تتمتع بجميع اماكن السياحه مثل ماتفضل روح غناتي وزيد ب الغواصه ....زيارة جزيرة كورال شاطئ باتايا مميز جدا المسافه من بانكوك تقريبا 150 كيلو والله اعلم سعر التاكسي من الحي العربي انا اخذته ب900 بات.......ملاحظه التايلانديين واخص الصحاب التكاسي والمحلات والباعه المتجولون دائما يدبلون السعر .... بالمناقشه والمكاسر تاخذ حقك وربي يوفك الجميع
تحياتي

شيخ على ربعة
وعليكم السلام أخوي شيخ على ربعه..
إحنا الصراحه راح نروح بوكيت ولمدة اسبوع.. واذا كانت تكفي فالحمدلله..
الصراحه بديت أتردد وخصوصا انك ذكرت المسافه بأنها فوق الساعتين.. وآنه معاي طفلين
شكرا على الرد والمشوره

ناسي جوازي
تسلم أخوي ناسي جوازي على الرد.. بس من خلال ردك كأنك تنصحني بعدم السفر والعناء لبتايا وخصوصا إنه راح يكون نص يوم فقط
ومن خلال كلامك حسيت إنا راح نرجع بانكوك هلكانين ومهدودين الحيل
الصراحه كل واحد فيكم قاعد يزيد ترددي أكثر

روح غناتي
أخوي روح غناتي.. تسلم على الرد والصراحه ماقصرت في تحديد الأماكن
اذا المسافه ساعه ونص بس .. فالصراحه تسوى إنا نروح نشوف بتايا إسمنا رحناها
مسألة السكن مانبي نسكن وخصوصا إن الكل في المنتدى ينصح بعدم الذهاب لبتايا وخصوصا للعايلات
وشي ثاني إنا مخلصين حجوزاتنا من البحرين للفنادق.. بس الصراحه راح أفكر جديا بالتخطيط للزياره

Traveler-2005
تسلم أخوي على الاضافه.ز والصراحه من كلامكم جميعا يبين إن بتايا تستحق أكثر من نص يوم.. ومع ذلك ماتصلح للعوايل..
وإحنا حددنا نص يوم لهذا السبب.. مانبي تفويت شي يستحق الزياره.. وفي نفس الوقت ماودنا نشوف شي يزعجنا ويعكر علينا رحلتنا
بس نفسي أعرف إنت خذيت التاكسي ب 900 بات ورجعت مع واحد غيره ولا شلون؟؟

دانتي
مشوار واحد بدون رجعه للمعلوميه انا وحداني ومعي شنطه حقت 20 شخص
تحياتي