- بانكوك - بتايا - كوشانج
في البداية احب ان اشكر ادارة هذا المنتدى والإخوان والأخوات على تعاونهم في انجاح هذا الصرخ الرائع
والذي استفدت منه كثير في سفري وسوف احاول رد بعض الجميل اذي اعطوني ايها الأخوان والأخوات في ردهم على الإستفسارات وغيرها
رحلتي إلي تايلاند في تاريخ 4 / 2 / 2007 والعودة في تاريخ 20 / 2 / 2007
واعذروني يا جماعة على تأخري في تنزيل الموضوع والسبب كان وجود مشكلة في تنزيل الصور وانشغال في العمل ...
في البداية رحلتي بدأت من جدة - ابوظبي - بانكوك على خطوط الإتحاد وكان عندي ترنزيت 50 دقيقة في مطار ابوظبي في الذهاب اما في رحلة العودة فكان عندي ترنزيت حوالي 12 ساعة مع الفندق
في رحلتي كان هدفي منها السياحة في المرتبة الأولي وشراء الملابس والساعات للأهل في المرتبة الثانية واخيرا التجارة
وحطيت ميزانية لكل شي وقلت اهم شي انبسط واذا زاد فلوس اشتري بضاعة وجبت معايا صور كثيرة عشان اخدم اخواني واخواتي إلي فادوني في البداية
وان شاء الله اقدر اجاوب على اسألة الإخوان وحطيت برنامج لرحلتي وهي كالتالي
بانكوك - بتايا - كوشانج
وبحكم تجولي في المنتدى لقيت بعض التضارب في نصيحة الإخوان من حيث ارخص مكان للتسوق في تايلاند عشان كدا حبيت اقطع الشك باليقين
وعملت هذا البرنامج إلي يخدم جميع طلباتي وقلت هنزل اول يوم في بانكوك وتاني يوم في بتايا وثالث يوم في كوشان واحلى منطقة واحس فيها بالراحة اجلس فيها مدة اطول واوزع ايام الرحلة عليها واتجول في اسواقها واشوفو ايهما ارخص
وبعد كدا وانا راجع احدد اشتري من فين فكانت اول يوم في بانكوك وبعد كدا 3 ايام في بتايا 7 ايام في كوشانج ورجوعا إلي بتايا 3 ايام وآخر يوم في بانكوك وكان ارخص شي في بانكوك وفي الباتونام بالتحديد لا تشترو من بتايا ولا غيرها عليكم ببانكوك
وإليكم تفاصيل الرحلة
كنت في مطار جدة وكان عندي اقلاع الساعة 3.30 عصرا المهم تأخرت الطيارة حوالي ساعة وانتظرنا حتى وصلت الطيارة وعلى طول طلعنا الطيارة كان معي زوجتي وابني الرضيع عمره 11 شهر
وبصراحة انا ما احب الرحلة إلي من جدة لأبو ظبي او دبي والعكس لأنها بتكون مليانا هنود وباكستانيا وشغالات وريحتهم طالعا بس ايش نسوي عشان تايلاند كل شي يهون
المهم جلسنا في مقاعدنا وكانت ثلاثة مقاعد وجلست زوجتي جنب الشباك وانا على يسارها رغم اني طلبت مكاني يكون جنب الشباك
عشان استمتع بالمناظر الجميلة من الطيارة بس عاد زوجتي قالت لا انا ابغى مكانك رحت قلتلها طيب لو جلست جنبي وحدة ايش راح تسوي سرت اخوفها ممكن تيجي وحدة جنب حلوة ومن هادا الكلام اصرت تجلس في مكان وتدعي ان شاء الله ربنا يبعتلك وحدة عجوز عشا تحرم وقلت خلاص اوذا جت بنت صغيرة لا تغري رايك
المهم انتضرانا انا وهي حتى جت الراكبة المنتضرة تخيلو طلعت وحدة عجوز كأنو كان يومها الدعاء مستجاب
وسارت الحرمة تضحك عليا طول الرحلة مو كدا وبس لا حتى العجوز كانت رحتها طالعا وسرت مو طايق نفسي يلا اكلت على راسي وقلتلها لا تضحكي كتير هعوضها في رحلة بانكوك
المهم وصلنا مطار ابو ظبي مش فاكر التوقيت لكن كان موظفين الإتحاد في انتظارنا لأن طيارة بانكوك كانت في انتظارانا وكنا اول الواصلين واخدونا بسرعة على الطيارة وكان معنا بعض المسافرين وانا قلت والله حلوو الساعة إلي استنناها في مطار جدة راحت وسار مافي ترنزيت 50 دقيقة قلت شي جميل
المهم دخلنا الطيارة وسرنا ندور على مقعدنا ومشيت لأخر الطيارة وقلت طيب انا حاجز في اول الطيارة خلف الدرجة الأولى ليش كدا كأنو مافي مكان في الطيارة
وكانت مليانا فل وهناك شي ازعج زوجتي لأنه كل الركاب كانو يضحكو بس انا ما انتبهت وبعدين زوجتي قالتلي كانو يضحكو عشنها منقبة كأنهم اول مرة يشوفو وحدة محجبة والغريبة انهم راكبين خطوط الإتحات وهيا اماراتية يعني عربية بحته ليش جايين عليها كان راحو في خطوطهم الأوربية وطالما هما على خطوط عربية كان لازم يحترمو العرب لكن كل واحد يعمل بأصلوا بعد كدا سألت المضيفة وين مقاعدنا لو سمحتي شافت التذكر واخدتني في اول الطيارة وكان اثنين من الخوة الأوربين هوا وزوجتو ماخدين مقاعدنا راحت المضيفة اعتذرت منهم وقالتلهم هادا مو مكانكم وجلسنا في مكانا واذا إلي في جنبي وحدة اوروبية طبعا غيرة زوجتي ماسمحتلي اجلس جنبهاا قلتلها والله انتي احلى منها قالت قم بس قم ههه وسرت ادحك (كلام في كلام )
الرحلة استغرقت حوالي 6.15 دقيقة كانت طويلة جدا وانا كنت زعلان عشان الرحلة كانت في المساء وما استمتعت بالمناظر الطبيعة من الجو
لأن السنة الماضية كانت في النهار وتايلاند والبلاد المجاورة كانت في قمة الروعة من الجو طبيعة وانهار شيء لا يوصف
المهم وصلنا مطار بانكوك في الصباح قبل شروق الشمس ووصلنا لطابور الجوازات وكان كونترات كثيرة للسياح وكاونتر واحد للجوزات التايلاندية
وكان فاضي وشويا الموضفة إلي في كونتر التايلاندين الفاضي ندهت عليا وقالت تعالوكانت الإبتسامة واضحة عليها وكانت جدا لطيفة معانا وقلتلها شكرا وانا احب هذا الشعب لبتسامته الدائمة
وبعدها دخلنا لصالة استلام الشنط وكان المطار كبيرا جدا وانبهرت زوجتي لما رأته من حجم المطار وفخامته وكانت اول مرة تزور تايلاند
وهناك كانت المفاجأة الكبر التي صدمتني وهيا اني لم اجد الشنط ورحت لموظفي خطوط الإتحاد وسألتهم قالو نسيو شنطنا في مطار ابوظبي والمفترض انهم يحطوها في الطيارة بس لما تأخرت الطيارة في مطار جدة بدورها اخرت طيارة بانكوك واستعجلو وطلعو سابو شنطنا هناك وساعتها وكنت انا ومجموعة من المسافرين وساعتها زعلت وقلت انا ايش اسوي دحين قالو اعطينا عنوان الفندق واحنا نرسلها ليك وكان اول طيارة توصل من هناك الساعة السادسة مساء بتوقيت بانكوك وكان وقتها الساعة 5 صباحا وانا حطيت قل الأوراق والعناوين والخرايط إلي اخدتها من المنتدى في الشنط كيف اسوي دحين بديت اتوتر ... المهم ساعتها لازم اواجه المشكلة وسألتهم ايش الحل راحو اعطوني استمارة اعبيها كأنو سارت معاهم قبل كدا وقالو لا تشيل هم شنطك هتوصلك وقلت كيف هتعرفو الشنط حقتي طلبو مني كعب التذكرة الموضح فيه ارقام الشنط المهم اخدت زوجتي وابني وطلعت وسألتني زوجتي ايش هتعمل قلتلها لا تشيل هم كويس اني ماحجزت في اي فندق كان دحين راح علينا الحجز لأني اكيد مش هحفظ الإسم ولا العنوان عشان كدا نصيحة للأخوان اذا هتحجزو من بلدك خلي عنوان الفندق واسموا معاكم في محفظتكم مو في الشنط
المهمم طمن زوجتي وقلت هيوصلوها لين الفندق لا تشيل هم وبيني وبينكم انا كنت مضايق لأن كل عناوين الشاليهات وامواقع إلي مخطط عليها وحاططها في برنامجي موجود في الورق إلي طبعتو من هذا المنتدى وساعتها حسيت اني ضايع من غير هادي المعلومات
المهم تجولنا في المطار ونبهرنا بحجم المطار الضخم وفخامته بجد مطار فخم وضخم جدا
بعدها اخدنا تاكسي من الدور السفلي في هناك تكاسي يوصلك للعنوان إلي تبغاه بالكيلو متر وهوا رخيص ارخص من التاكاسي إلي موجودة في الأعلى وطلع عليا المشوار من المطار لين منطقة نانا بحدود 26 ريال يعني 260 بات وبديت اعتمد على ذاكرتي في عنوان الفندق إلي هنزل فيه لأني السنة الماضية كنت هناك وطلبت من التاكسي يروح لمنطقة نانا وهناك هفتكر المكان المهم اول ما قربنا من نانا لقيت لوحة كبير مكتوب عليها فندق البرنس وافتكر على طول كلام احد الأخوان في الموقع عن هذا الفندق وقلت خلينا نشوف الفنادق الموجودة هناك وبعدين ارجع اذا مالقيت حجز فعلا لقيت اغلب الفنادق ملينا وطلبت من السواق يروح هناك ولقيت غرفة كبيرة وطيبة ب 1100 بات يعني 100 ريال واخدت ليلة هناك لأن عنوان الفندق إلي كنت نازل فيه موجود في الورق وزي ما قلت موجود في الشنط
المهم نزلنا اغاراضنا واخدنا جولة في منطقة نانا وبعدين عند الظهر رحنا اتغدينا في مطعم في شارع العرب مطعم تايلاندي مسلم بصراحة عمري في حياتي ما أكلت الذ واطعم من اكلوو قلتلو احنا مسلمين وابغى افضل واحسن اكلة عندك وبعدين يعطوك المنيو فيها صور للأكلات الموجودة عندهم وطلبت معاها سمك مشوي والله اروع مماتوقعت لاتوفتك وبعدها رحنا للفندق نرتاح من طول السفر لكن انا ما جاني نوم لأني قلقان لازم اعطي عنوان الفندق للمطار عشان يرسلو الشنط المهم في النهاية اعطيتهم رقم الفندق وطلبت منهم يتصلو وياخدو العنوان من الإستقبال وفعلا الساعة سبعة مساء كانت الشنط عدي وقلي تأكد من جميع اغراضك قبل ماتوقع والحمد لله كل شي سليم
وهنا ملاحظة ضغير اذا سار عليك نفس الموقف لا سمح الله لا تشيل هم على طول روح لكونتر الإتحاد وعبي الإستمارة وعطيهم عنوان الفندق اول ما توصل وبعد كدا هما يجيبوها لحد عندك واحرص على التذكر إلي فيها رقم الشنط وخليها معاك في المحفظة
واتركم مع الصور وهي من مطار بانكوك و مدينة بانكوك
وانتظروني هناك المزيد من الصور لبتايا و جزيرة الخيال جزيرة كوشانج
