مشكوره على المعلومات
للاسف الصور لم تظهر
واتمنى تكون هناك تفاصيل اكثر عن بالي

1. عاد تخيل كلب يلحق وراك وفالليل واذا فكرت تركض بينط عليك خ..


2. رابعا:


3. سادسا التشيك اوت


4. بعد ما قضينا على الاكل تذكرت اني لازم اصور

تاريخ: 37 تم عمل تشيك اوت من الكراون بلازا والاتجاه إلى مطار Air Asia اتوقع تيرمنال 3
سعر التاكسي من الفندق إلى المطار : 120 الف مع الضرايب
سعر ضرايب Toll 11 الف على بوابتين وخذ منا 4000 قيمه دخوله للمطار
يعني مجموع الضاريب 15 الف روبيه.
سعر التذكرة لشخصين من 3-87 عن طريق الانترنت 3.546.000 روبيه من وجهه نظري غالية مع اني حاجزتها بتاريخ 19 ابريل يعني قبل سفرنا بشهرين وشوي
مده الرحله: ساعه ونص
الضرايب : 40 الف للشخص الواحد
ايجابيات المطار:يديد ومرتب وفيه WI FI
تم اضافه محلات يديده في المطار في Duty Free
تنزل من الدري وتمشي برع المطار لين توصل للطياره..وهالشي انا اشوفه حلوو يعيشنا في اجواء السفر
الطياره يديده.
الوصول إلى بالي:
المطار صغيرون وضرب الكف على السير الكل يبي شنطته..سحبنا الشنطه ولقينا السواق من فله الم ورنا alam warna ينتظرنا بالخارج
واول ما تطلع بتشوف ستاربكس
صور من الطريق إلى سينيمااك
وتمثايلهم المشهورة بس بصراحه اعتبره فن ..فن النحت
صور الدرجات اللي تسبب زحمه في الشوارع ومكثرها
صورة لمتحف في بالي..محد زاره ولحد ياب طاريه!!
السكن في بالي:
فلة الم ورنا من تاريخ 3-6 يوليو
نوع الفيلا: غرفة مع صاله وحوض سباحه
الفيلا تتكون من طابقين,, الطابق الاول يتكون من حوض السباحه والجاكوزي والصاله مع حمام عزكم الله والمطبخ
الطابق الثاني: غرفة النوم مع حمامها ويلسه خارجيه
قيمه الفيلا لليوم الواحد شامله الضرائب والفطور هو: 290 دولار يعني المجموع 870 دولار
تم ايداع مبلغ 443 دولار بتاريخ 21 ابريل وباقي المبلغ يتم دفعه بعد ما تسوي التشيك اوت من الفيلا.
وهذي صورة السواق اللي اخذنا من المطار ومثل ها هو واضح بعد يشتغل ريسبشن ..شكله بتاع كلوه خخ
مخطط الفلل:
باب الفيلا:
الجلسه اللي بجانب باب الفيلا:
صور للفيلا " الورد الموجود بطلب مني "
جلسه خارج غرفة النوم
صورة للمسبح من الطابق العلوي
هذي الباب يفصل بينا وبين الفيلا الثانيه ومن الصورة واضح اقدر اشوف داخل الفيلا الثانيه
نزله الدرج للطابق السفلي متعب لكبار السن او اللي عنده الم في الركبه لوول
وهذي حوض السمج اسفل الدرج " كل يوم نأكلهم ^_^
الصالة وطاولة الطعام
المطبخ:
جلسه حلوه مقابل بركة السباحه للاسترخاء
حوض السباجه " البرجه" وفيه مستويات اعمق مستوى حتى لو اغطس وانا ماسكه فوق ريلي ما توصل يعني وايد عميق
منظر اول ما تدخل الفيلا
الممرر الطويل والضيق اللي يوصل للفيلا بالاضافة إلى الفيلا المقابله لنا ومثل ما نشوف الجو ممطر
هذي اييب ريوقنا كل يوم
منظر الغروب من المنزل
الايجابيات:
فله يديده
الاثاث روعه والالوان تريح النظر لون البنفسجي اللون المفضل
قلة تواجد الوزع " البريعصي" في الفله وهالشي ريحيني شوي
الحمامات عزكم الله داخليه وفيها رشاش
الفيلا فيها بركة سباحه مع جاكوزي ويفتحونه من بعد الساعه 5 العصر
عند الدري يوجد حوض فيه اسماك..تقدر تأكلها كل يوم
السلبيات:
اولا:
اهم نقطه الفيلا تفتقد إلى الخصوصية واللي تعتبر اهم شي عندنا.
الم ورنا يتكون من شقق وفلل..وللاسف الشقق تطل على الفلل.يعني ما تقدر تاخذ راحتك في حوض السباحه
وحدث هالموقف معاي..على جريب المغرب كنا نسبح في الحوض..وسمعنا اصوات تضحاك..رفعنا راسنا فوق شفنا الناس اللي ساكنه في الشقه تطل علينا..ومن بعدها ما دخلنا المسبح ابدا..وهالشي زعلني
النقطه الثانيه :
لما تركب الدري..بتوصل لنقطه ان اللي برع يشوفونك...صح في اشجار بس مب عاليه بشكل يغطي عليك..يعني اي احد يمر بالشارع او اي احد في الشقق او الفيلا اللي مقابلتك ممكن يشوفك وانت راكب الدري
ثانيا: الريوق " الفطور "
غير متنوع..الخيارات الموجودة محدودة جدا..يا انك تختار بان كيك وتختار الصوص اللي بيكون عليه ا واكل اندونيسي او يابني او تختار بيض مع سجق وبيكون وتختار نوع واحد من العصير ولا يوجد اي نوع من الفواكه
النقطه الثانيه:
الريوق ما يطبخونه في فيلتك..يتم طبخه في مطبخهم وعلى ما يوصلك الريوق صار بارد وما ينأكل
ثالثا:
الفيلا تقع في داخل ممر طويل وضيق يا دوب تدخل السياره داخله
انزين وين المشكله..المشكله يطولي بعمركم...ان هالممر فالليل مافيه اي اضاءه..يعني ما تقدر تتمشى بروحك من شارع سينماك إلى الفيلا وذلك لكثر الكلاب الضاله فيه " اعزكم الله"

عاد تخيل كلب يلحق وراك وفالليل واذا فكرت تركض بينط عليك خ..

فعشان جذي انا ما رحت صوب الشاطئ..لان لما سألناهم تقدرون تودونا بالسياره قالوا ما يحتاي كلها مشي عشر دقايق وانتوا واصلين..ف هالنقطه خلتني اتراجع >> الله يرحم ايام فيله اهميسا جمبران عطونا سياره الجولف ورحنا بها للشاطئ

رابعا:

المحلات التجارية او ما يسمى ب سينيماك سكوير تبعد عن الفيلا مشيا 10 إلى 15 دقيقة..ومطعم الخيمه والمطاعم الايطالية والهنديه المتواجده في الشارع الحيوي تبعد تقريبا من 20 إلى 25 دقيقه مشي..من وجهه نظري بعيد
خامسا: المساج
من عروض الفيلا علي مساج مجاني لشخصين وهالشي ايجابي بس الشي السلبي ان يسون المساج عند بركة السباحه ومن قبل قلت ان ما في خصوصية بسبب اطلاله الشقق عليها واي احد ممكن يشوفك .
والشي الثاني اللي ما عجبني ابدا هو لما ينتهون من زيت المساج الكمية المتبقيه منه يردونه في الغرشة مره ثانيه..يعني كم شخص تمسج بنفس الزيت!!!!!

سادسا التشيك اوت

طلبت من الريسبشن تشيك اوت متأخر يعني للساعه 1 ما رضت قالت لي كستمر ياي ولازم ننظف الغرفه وما خلت لي اي مجال للتفاهم..وفي اليوم الثاني يوم ييت بطلع شفت شخص ثاني على الرسبيشن فكلمته بحده شوي قلت له ما مب طالبه اكثر من نص ساعه ارتب فيها اموري واطلع من الفيلا..وبطلعه الروح وافق..مع ان معظم الفلل والفنادق تعطي تشيك اوت متاخر ويرحبون بهذي الشي إلا هم!!!!
المطاعم التي تمت زيارتها في هالفترة
1.مطعم الخيمه : مطعم مغربي ويقع في شارع سينماك وتقيمي للاكل 6 من 10 اكله مب ذاك الزود والفاتورة طلعت تقريبا 700 الف وشويات
2.مطعم كباب بالاس : مطعم تركي يقدم مشاوي في كوتا وتقيمي للاكل 6 من 10 وطلعت الفاتورة تقريبا 300 الف وشويات
هذي صورة توضح انه يوصل الطلبات للفلل والفنادق

بعد ما قضينا على الاكل تذكرت اني لازم اصور

3.مطعم كوين تندوري :مطعم هندي في سينماك لازم تحجز عشان تحصل طاوله تقيمي للاكل 7 من 10 وللاسف الاكل يوصلك وهو بارد..ما اعرف هي مشكلتي اني احب الاكل يدخن جدامي ولا مشكلة المطاعم لوول وطلعت الفاتورة 300 وشويات
ملاحظة: المطعم اغلبيته زواره من الجاليه الهنديه..اكبر تجمع هندي شفته في حياتي في بالي
كنت اشوف نفر او نفرين بس هالمره عوايل..وكانوا وايد يخزون فينا
ملاحظات مهمه

• اغلبية المطاعم الايطالية او الهنديه عليها زحمه من بعد المغرب لين الليل وما بتحصل طاولة إلا بالحجز.
• تم فرض ضرايب وقيمتها 15% على المأكولات والمشروبات "" قبل ما كان في هالشي ""

اتمنى الجزئين يعجبونكم..وان شاا ءالله اذا في مزيد من التجشيع بتنزل باقي الاجزاء
تحياتي لكم...

المتيم00000
شكرا على الرد السريع
ولا تستعيل..بتييك معلومات اكثر عن بالي
والصور طالعه عندي لاني محملتهم من المنتدى!!
اتمنى من الاعضاء الباقيين يفيدوني بالصور..هل تطلع عندهم ولا؟؟
تحياتي لك

الحمد لله على السلامه
وبدايه مفصله وجميله واهم شي الراحه والانبساط
لاكن الصور لم تظهر يليت تاكدين من رفعها من جديد

كل الشكر على المعلومات القيمه نتمنى لك رحله سعيد ه واقامه اسعد
يعطيك الف عافيه ,,,
الصور لم تضهر ..

أختي بحرينية.
سردك للأحداث ممتع وجميل. بالي قضيت فيها 6 أيام وأحس أني ماغطيت 10% من أماكنها. لي زيارة لها بعد حين إن شاء الله. تابعي سردك أختي وأمتعينا برحلتك. لكن أرجو ملاحظة أن الصور لم تظهر. قد يكون الخلل من السيرفر المضيف
دمتي بود....

يعطيك العافيه
المعذره يمكن استعجلت في الرد من زود الحماس
واتمنى تشوفين حل للصور على شان لاتتعبين مرتين
عساك على القوه

حجز
يلا حبووبه
كملي ومتعينا لاني صرة من عشاق بالي
بس مااكوو صوور ياعسل
يلا ننتظر التكمله
مووفقه ورحله سعيده مليئه بذكريات الجميله

الحمدالله على السلامه
اختي العزيزه