1. أقول لا يكثر............


2. عقب ها لمقدمة اللي مدري وش تبي خذوا الكلام السنع.


3. ويا سعودي لا تخاف!! مندي مظبي وكل ما كبر كرشتك موجود بس أنت ادفع.

أقول لا يكثر............

عقب ها لمقدمة اللي مدري وش تبي خذوا الكلام السنع.

قررت وبلا مقدمات الذهاب لباريس وصراحة كانت الرحلة سياحة ومنها قضاء حوائج ومشتريات للأهل (يمدحون حراج بن قاسم) المهم رافقني في الرحلة واحد من الشباب الله يذكره بالخير، وفي باريس تلاقينا مع شباب اخويانا في الرياض، وطبعا السكن حجزت من احد المكاتب السياحية في الرياض كان ها لكلام في شهر أغسطس.
للوصول إلى باريس هناك مطارين دوليين هما:
مطار اورلي ويبعد 14كلم عن باريس.
مطار رواس شارل ديغول ويبعد 25كلم من باريس وهذا اللي وصلنا عن طريقه وهو شكله دائرة كبيرة.
وصلنا باريس وكان الوقت قبل ما يذن الظهر عندهم(فيما معناه) وركبنا مع تاكسي اللي أوصلنا للاوتيل اللي سبق وحجزناه، بلا مشاكل أو إزعاج رحنا لغرفنا واديها نومة .................................................
في الليل صحيت وصحيت ابو الشباب وتجهزنا وطلعنا للشانزلزيه نشوف وش لنا وعلينا، ورحنا وتعشينا ذاك العشا اللي يرد الروح ويحسسك انك فرنسي وصراحة اللي يروح فرنسا ولا يأكل أكلهم ما يعتبر انه راح ويقعد في ديرته أحسن له............
وبعدين رحنا سينما وهكذا اللي جاء الليل ورحنا في سهرة بريئة في احد الملاهي الليلية التي تكتض بها باريس.
المهم الاوتيل حقنا بمسافة خطوات من الشانزلزيه، يعني مايمدي صدرك
يقول انه ضايق إلا وهو يتماغط في الشانزلزيه.
رجعنا للاوتيل واتفقنا أن يكون برنامجنا ثقافي((بدينا )) ويكون اللهو واللعب اللي ما يعود لنا بالنفع نقلل منه (ايوه كذا مضبوط).
في اليوم التالي( بسرد لكم كل الأيام ورى بعض لأني صراحة ما اعرف تسلسل الأحداث)
صحيت الساعة 7 صباح واصحي رفيزي واثر كلام الليل يمحيه النهار، واتحمم وأبدل الملابس (هو أساسا فيه ملابس) ما عليكم منه...... المهم وانزل تحت وافطر ذاك الفطور......اخ لا تذكروني والله الجلسة مو الفطور ترد الروح ولا اللي قاعدين يفطرون لالالالاالالا ولا الجرسونات والله منقينهم........
المهم أفطرت وأنا مصحصح يعني من اللي قدامي...... وانتبهوا تراهم يحبون المرتديلا بالخنزير وتلقونها مثل مرتديلا البقر لكن فيها شوي بياض وأنا عرفتها عقب ذاك الفطور لكن ما كليتها ابد.
رجعت الغرفة ولقيت الرجال صاحي و يتحمم. طلعنا أظن الساعة 8.30 صباحا وخذها مشي اللين وصلنا لمتحف اللوفر.
بعد مااخذنا التذاكر دخلنا وشفنا المعروضات والمجسمات اللي بدون هدوم وشفنا المونليزا، وصراحة متحف جبار وماله مثيل بالعالم، ويحتوي على تحف وآثار تعود لكل الحضارات، وما قهرني اللي الجزء الإسلامي، ما خلوا شي لنا كل شي جابوه وبقينا بلا حضارة لكن مزدين فيهم.
واللوفر متحف ممتع وطريقة عرضهم أروع وهو واجهة باريس بلا منازع.
جاء يوم و رحنا لبرج ايفل وصعدنا فوق بالمصعد اللي يشيل حوالي 50شخص دفعة وحدة تقول غنم. ويوجد درج للي ما يتتن يمديه يوصل بلا تعب.
طلعنا البرج واكتشفنا باريس من ارتفاع عالي وصراحة تجربة مثيرة ومنظر خيالي ونسيم عليل ووجيه حسنة
وبرنامجنا الصباحي غالبا ثقافي...و من العصر وفوق في الشانزلزيه وعقب الأخير في السينما عقب تناول طعام العشاء وعقبها ###### وهكذا...........................
صحينا في يوم بدري وقلنا على وين على وين واستقر الرأي نروح لديزني لاند، وتبعد حوالي 30 كلم من باريس. والخط خضر ودربك خضر.
رسوم الدخول بما يعادل 50دولار يشمل دخولك ولعبك اللين تشبع آخر الليل. وغير كذا في حفلات موسيقية يسونها عقب الأخير.
المهم لما تأخذ الكرت حق الدخول روح عاد امسك سرا مقصف اللين يجيك الدور وتركب ويمكن هذا الشي اللي يتعبك شوي لكن لا تخاف على السعوديين، وصراحة لما تشوف سرا طويل عند أي لعبة وتشوف ناس تساقط وتدخل منا ومنا أراهن أنهم سعوديين وصراحة اكسب الرهان.
في ديزني العديد من الألعاب اللي ما تتصور ووالله يجي الليل وأنت ما بعد خلصت الألعاب ولا نصفها.
في ديزني خصوصا في الصيف يسوون مسيرة لشخصيات ديزني وصراحة كرنفال رائع وتشوف كل اللي تحبهم في فلام كرتون قدامك يستعرضون ويرقصون وصراحة منظر لا يوصف. وهذي المسيرة تنظم كل ثلاث ساعات.
الا على فكرة في باريس اللي اقل من 18 ما يبعون لهم التتن لو على جثتهم المهم رفيزي معه 4 كروز تتن،، وكل يوم اعبي الشنطة حقت الكاميرا بكم بكت ويالله البزران سرا علينا خصوصا في ديزني لاند يجيك واحد وتعطيه همن ينشر على اخوياه انك فاعل خير@@ ذكروني بطرارات مكة إذا عطيت وحده تجمعوا عليك مليون.
الفرنسيين يدلعون أطفالهم خصوصا لما تدخل ديزني لاند صباحا تلقى افواج المدارس جايه يمشون الأطفال ويوسعون صدورهم الله يضيق صدرك يا أستاذ كحلوت اللي من قالك أبوي خذوه لحم وعطونيه عظم وهو مصدق. (ليس كلام تان تان)
يوجد في باريس أماكن كثيرة ترفيهية وتناسب الأطفال بحق وحقيقي وصراحة اتعب وأقول حلوة ومنها:
استريكس
وهذي ملاهي على كيفك ويلفت انتباهك قطارات الموت اللي تخوف.
اكو ابولفار
حديقة مائية وتشوف فيها شي(ن) اللهم يا كافي ، وانصح للي بيروح يلبس بنطلون بقي(وسيع)
حديقة قصر تواري
وابن أمه وأبوه يمشي على رجوله هنا......لأنها حديقة حيوانات وطالقينها يعني اقعد في سيارتك وتمشى بسيارتك وعادي تلقى القرود فوق سيارتك ولا الأسد موقفك يبي توصيلة للبطحاء شي طبيعي.
حديقة الحيوان
صراحة إذا شفت حديقتهم تقول الشعب السعودي مظلوم بحديقة الملز اللي بالرياض.
على فكرة أنا إنسان أحب اتزلج مو على الثلج،،،،،،،على الزلاجات أم كفرات، وما نسيتها وأنا رايح لفرنسا،، خذيتها معي وصراحة يشهد لي شارع الشانزلزيه رجيته رج (((تذكرت شباب الرياض إذا قالوا رجينا التخصصي ولا رجينا التحلية والمشكلة محدن درى عنكم)))) المهم تزلجت وفيه حركة حلوة......إذا شفت ذيك القمر السعودي أروح ناصيها واخبطها واسوي نفسي غشيم واني ما دريت،،، وأول ما تشوف خشتي تناظرني بحقد على أني سعودي بس إذا قلت (بوردون مدام ) وانطقها وأنا رازن الخشة والزقم ممتد 10 سم مثل الفرنسيين قالت لا...... ذا خلوه يخبطني ذا فرنسي وما درت أني من ذوي الركب السوود مثلها.
في يوم قلنا خلنا نروح لفرساي ونشوف قصر فرساي العظيم اللي صمم من عهد الباروك في عهد لويس الرابع عشر او الخامس عشر المهم رقم. شفنا القصر والحدائق وعيال الكلب أثرنا تونا نتطور، والله تشوف أمور وبنيان مسوينها يوم الرياض مصمك ونخلتين.......والله تقدم.
وتشوف النوافير والساحات وتقصيص الأشجار اللي تحس انك في قصة ألف ليلة وليلة.
وحنا نمشي لقينا ذا الناس متجمعين فوق كوبري ومن طبيعتنا كشعب سعودي نحب نتلقف ونشوف وش عندهم مثل اللي لقى حادث ويبي يخترق الجموع عشان يشوف وش القصة وما قدر قام يصيح ويقول أبوي مات أبوي أنصدم وبالأخير طلع المصدوم كلب.
المهم اثر كل ذا التجمع فوق النفق بنما اللي ماتت فيه ديانا بنت سبنسر حرمت تشارلز ولد إليزابيث ((أبوه منظر مثل بيضة الدجاجة تنتسب للدجاجة فنقول بيضة دجاجة ولا نقول بيضة ديك رغم أن لولا الله ثم الديك ماجت البيضة((واحد محشش))
المهم شفنا صورها وكتابات فوق نقف بنما ودموع وبكينا معهم اصطناعا عشان ما يقولون ارهابين قلوبهم بلا رحمة.
على فكرة أول ما توصل لمطار باريس ادخل المكتب السياحي بالمطار يزودك بكل شي يمكن زيارته ومواقعه وأي شي يفيدك.
كذلك في الاوتيل يعطونك خرائط عشان ما تضيع.
في ذاك الليل وتمسك معنا نبي نروح ديسكو مواعدين الشباب الثانين هونيك، وحنا متعودين دايم نروح عن طريق الشانزلزيه وإذا بغينا أي شي رحنا حوله تقول حمام دار((والله قطاوة دار)) قلنا لخويي خلنا نروح الدرب الثاني اللي من عند الحواري ونختصر الطريق... ولو ضعنا معنا خريطة نعرف وين حنا بالضبط،،، مشينا في ذاك الليل والشوارع هادية حوالي الساعة 10 مساء,,,,, المهم فجأة لقينا أنفسنا تايهين والمشكلة لا تاكسي يمر ونادر تلقى واحدن سنافي يحتسي عنقليزي.....لا وضيعنا كيف نرجع للاوتيل,,,وقتها قلنا ما نبي شي ولا سهر نبي نرجع لأهالينا ونقضب أراضينا.
المهم قلنا مالنا إلا ونكمل الطريق......فجأة طلعنا على شارع كله بارات وخمارات واغلبه خوال وحسينا انه حي شعبي من مبانيه.... مشينا مشينا اللين شفنا في زاوية عند إشارة وفوق الرصيف دباب راعية يربط الخوذة فيه عشان بيروح لبيته، وقزينا خلف الدباب كلمة التوحيد((لا اله الا الله محمد رسول الله)) قلنا جاك الفرج الله اكبر ....... رحنا له نهرول وكأننا طفل لقا أمه من جد إحساس محدن جربه إلا أنا ورفيزي...... سلمنا عليه وقلنا أنت عربي((دلوخ)) صار أخينا مغربي... قلنا والله مضيعين ومدري وين حنا فيه؟؟ قال: انتم خليجيين؟؟ قلنا نعم وسعوديين....... قال وبلهجة مغربية: انتم بايعيين أنفسكم تيجوا هنا؟؟،، أنا اللي ساكن هنا وأخاف على نفسي..!!.......((صراحة حسيت إن البنطلون حقي مرطب)) قال هذي المنطقة اخطر منطقة في أوروبا وفيها الجرائم عيني عينيك،، وبينما نحن في الحديث معه إذا اقبل علينا رجلين تحس من ملامحهم أنهم عربان ،، ولا تنسون أن حنا في زاوية الرصيف جنب الإشارة،، اثر الرجلين ناصيننا،،،،،،،@@ شوي تكلموا معنا فرنسي ومدري وش يقولون واللي فهمته (زقريت) قلت لرفيزي عطوه.. عطووه الدخان بس فكونا....... وهو يولع السيجارة ناظرنا ورفيزيه وقال لنا: انتم عرب؟؟؟؟؟؟؟؟؟؟؟؟؟؟ قلنا :: اأأأأيه وبخوف. طبعا المغربي خوينا كان وقتها يناظرهم وساكت........... شوي راحوا وقالوا ميرسي.... المغربي وقتها قال لنا هذولي جريات الحارة وهم جزائريين وبينما هو يقولونا ها لكلام إذ سمعنا صوت صياح وبكاء وعويل؟؟؟؟؟؟؟ في الزاوية الأخرى من الرصيف،،،، وراح المغرب يجري وحنا وراه ((تقول بط ورى أمهم)) ونلقى الجزائريين الاثنين اللي مروا علينا وقهويناهم ماسكين ذاك الفرنسي ومحجرين له وحاطين السكين في رقبته ويفتشونه وواحد يركل فيه على بطنه ويصيح...... وصدقوني أن ولا واحد من ذا الناس فزع ولا تكلم.....كلن في حاله((الله يديم علينا نعمة الإسلام)) وفي وقتها حسيت إن بنطلوني يقطر وقلبي طلع وموقف لا يتصور وكل همنا نرجع..........فجأة ويطلع لك ذاك التاكسي اللي مدري كيف جاء في وقته وتقول كننا في فلم مصري إذا جت الشرطة عقب ما ذبحت عطيات حمدي. ويوقفه المغربي لنا التاكسي وقال اركبوا شوي بيجيكم لا تتحركون،،،،،، وراح للمطاقة يهدي المجرمين من بعيد،،،،،، وقتها أنا وصديقي يا روح ما بعدك روح
نسينا العالم وقمنا نتذكر أهالينا وشكينا حتى في المغربي قلنا لا يكون بس بيودينا مكان همن بيتمردغ في مصراننا.......عطينا التاكسي كروكي الفندق ووالله إني أقوله وباللهجة السعودية(( ادعس الله يلعن والديهم)) وصدقوني وصله المعنى.
ومن عقبها وحنا مثل الدجاج ما تغيب الشمس إلا وحنا متلحفين ونايمين.وان غابت الشمس رجعنا بتاكسي لا ونصور بالكاميرا الفيديو كود يخطفنا ونذب الكاميرا عشان يلقاها المحقق كونن و..((يا شين البثارة))
شارع الشانزلزيه وكما هو معروف فيه العديد من المقاهي العالمية والمطاعم الشهيرة. وفيه السينما والمحلات التجارية والماركات العالمية من ملابس وعطور.........الخ وفيه راح تقابل مشاهير العالم من فنانين وكتاب وصحفيين وشعراء وأمراء وأي شخص مشهور تجده هنا يترزز.
في احد محلات العطورات في ها لشارع وبعد التسوق قلنا بنغلف العطورات المهم اللي يغلفن صاروا عربيات مغربيات وقمنا نسولف معهم وناخذ ونعطي ومعهم وحده هولندية اشباهها سعودية 100% قلت لرفيقتنا المغربية((يتلزق)) اعنبوتس ذي تسنها سعودية امبحت،،،،،،،،((امبحت كلمة نجدية يعني تفالتن في جدار)) المهم راحت تترجم لها اللي قلنا بالفرنسي وردت عليها وقاموا يرطنون ،، وضحكوا،، ولزمت على المره إن تعلمني وش قالت لها،،، قالت إني قلتها أن ذا يقول انتس فيتس عرق سعودي قالت،، سعودي مين ؟؟كيف أصير سعودية وأنا يهودية@@ وأبوي يحمل الجنسية الإسرائيلية@@@
غصيت وبلعت ريقي وقلت نو بروبلم ......كلنا عيال آدم...بعدين قلت تخسين وتهبين تعالي في اوتيلنا ونوريتس كيف نجزتس مثل مايجز الفلاح الشجرة.
مير ونعطيهم كرت اوتيلنا على نياتي أبي اقهويهم وأثرهم ناوين يتحرشن فيني،، مير واهون ولا قلطتهن........
وذولا المغربيات يدرسن في احد المعاهد في النهار وفي الليل يكدن((لاتفهمون غلط اقصد الضعيفات يكدن في ها لمحلات يغلفن الهدايا))
في باريس العديد من الشوارع إلي تمتلي أزياء عالمية وعطور تضاهي شارع الشانزلزيه ومنها:
شارع ريفولي
شارع فوبورسانت اونوريه
شارع افنو جورج الخامس
شارع بولفارسان جيرمان
شارع بولفارسان ميشيل
شارع روشرش ميدي
شارع افنو مارجو
شارع رودرلابي
شارع رودربارادي
شارع بولفارمونبرناص
شارع كارودوتامبل.
وهذي الشوارع فيها مقاهي ومطاعم وأزياء وعلى كيف كيفك
وفي أماكن تسمى( لي باساج) وهذا غاليري يعني سوق مغطى وفخم وغالبا يكون دور واحد،، وفيه محلات وكوفيات على كيف كيفك وفيه اللي انتم خابرين بالهبل................((أحسنوا الظن))
ومن أمثلة لي باساج المشهورة:
باساج شواسول
باساج دي بانوراما
باساج فيرو دودا
وفي غيرها الكثير وصراحة الجلسة فيها صباحا ولا أحلى وهي أماكن خاصة للشوبنق الدسم، يعني اللي بتتزوج وتجهز انصحها تجي هون.
لاحظ يا عزيزي السائح انه في فرنسا يؤخذ من أي شخص ضرائب عند التسوق من أي محل بس لازم تبين عند دفع الحساب انك سائح همن تعطيك وريقة صفراء مكتوب فيها بكم شريت واسمك وخلافه،، ولما تروح للمطار يجردون اللي شريت همن يرجعون لك الضرائب التي أوخذت عليك.
وأيضا التكاسي أسعارها نار يعني استأجر لك سيارة اكسنت ولا كامري وامسك شارع الشانزلزيه هجولة وعقد...... يعني المسافة من باريس إلى ديزني لاند حوالي 30 كلم يعني كنك رايح من وسط الرياض لمطار الملك خالد هذي بحوالي 250-300 ريال.
لكن هناك في باريس عندك القطارت ومحطات المترو اللي توديك أي مكان تبي.....من جد والله لو تبي أي مكان يدخلونك وسطه او قريب منه وبأسعار معقولة..وفيه 3 درجات... وفي ديزني لاند محطة توصلك لأي مكان في باريس والله يعز الحكومة.
أيضا لاحظ يا سائح خصوصا السعودي منهم إذا بتجي باريس وأي بلد في العالم وتنام النهار وتقوم الليل اقعد في ديرتك ولا رح للبحرين اقرب لان لاكتشاف أي بلد خل برنامجك صباحي عقب الفطور واسهر الليل لحد معقول.
وصدقوني إذا بتتمتع في باريس امش على رجولك والله متعة وتحس انك في حلم ودك ماتصحى منه إلا على خشت نانسي عجرم.

ويا سعودي لا تخاف!! مندي مظبي وكل ما كبر كرشتك موجود بس أنت ادفع.

أخيرا رجعت لرياضنا دار السلام وعامل حسابي في المره الجايه إن ازور مناطق في باريس ما سبق أن زرتها وراح اكتشف الريف الفرنسي اللي ما شفته إلا بالطيارة وحنا راجعين وارجوا إني صورت لكم يومياتي في باريس علما أنني حاولت اختصر بقدر الامكان عشان ما تملون من الخرابيط وخير الحتسي ماقل ودل((أشوى إنكم نايمين)).واشكرك لمروكم الكريم وتكرمكم بقراءة الموضوع واشوفكم في سفرية جاية وتقبلوا اجمل تحياتي
صورة بالطيارة بغيت اروح بخرايطها
تعليق تان تان
الموضوع المطروح يعبر عن رأي كاتبها ولا يعبر بالضرورة عن رأي تان تان

هلا تان تان
وين الناس
الموضوع روعه
وتصدق وانا اقراء نسيت ان الموضوع مو لك
وجالسه اسولف على نفسي كل هالبلاوي من تان تان
وليه ما اخذ زوجته معه:36_1_29:
الا وبالنهايه اقراء انه مو موضوعك:36_3_4:
بس ضحكتني سالفه المغربي
واخيرا كنت بوهقك واوري زوجتك الموضوع بس خربت الخطه:36_6_3:

منوله اجل الحمد لله انها ماهيب لي ولاكان علوم وش عاد يرضي المره الا مرسدس ولا طقم الماس

بصراحة موضوع رائع ويستحق القرائه
وشكرا للاخ تان تان

أأأأأأأأأأأأأأأأأخ ياباريس اخ بس
ليه تذكرني يا تان تان ليه تذكرني ؟؟؟؟؟؟؟؟؟؟؟؟؟

ما اقول
الا شكراً
بسراحه انت دكتور
وعجبني الموضوع لأنه كافي ووافي
وما قصرت اخوي