السلام عليكم ورحمة الله وبركاته
بسم الله والصلاة والسلام على رسول الله وآله وصحبه أجمعين ومن تبعه بإحسانٍ إلى يوم الدين
بعد تفكيرٍ عميق ومشاورات مع العقل الباطن ههه ..
الحمدلله توكلت على الله وقررت أبدأ في كتابة التقرير بعد ما أجلته علشان رمضان وبعده العيد وصيفيه وحوسة العالم )
بس يقولون لأجل عين .. تكرم مدينة .. وانتم والله تستاهلون يا أهل هذا المنتدى الطيبين والرائعين وكل شي
أولاً احب اشكر كل من ساعدني و وقف بجانبي في كل الترتيبات لهذه الرحلة وأخص بالذكر أخوي فيصل والأخوات العزيزات ام ريم (FANDA) و (ROMA)
بيض الله وجهكم وماقصرتوا والله .. ماشاء الله عليكم وقفتوا معي وصبرتوا حتى على أصغر الأسئلة
والشكر موصول لباقي الاعضاء والمشرفين اللي ساعدوني حتى بالشيء البسيط
و الله يقويكم ويكتب أجركم يارب .. ويرزقكم على قد نيتكم وأكثر يارب
و الآن ندخل في صلب الموضوع )
بآريس .. هل سَ نلتقي ثانيةً ..؟

في بداية الأمر كانت أوروبا عشق وحلم ..
كنت أتمنى من ربي يوفقني و أزورها ..
وقبل تقريباً 3 سنوات كان في واحد من الشباب الله يذكره بالخير ..
قرر يقوم ب رحله مجنونه .. بحيث يطلع من هنا (المنطقة الشرقية) إلى بريطانيا .. بالسّيآره ..ذهاب وعوده ..
وطبعاً من ضمن مخطط الرحلة انه يمر على أغلب دول الشنقن .. وماشاء الله عليه راح ورجع بالسلامه ..
وانا كنت ناوي اروح معه .. ولكن يقول المثل .. تجري الرياح بما لاتشتهي السفن
حاولت في عملي بحيث إني اطلع اجازة في هذاك الوقت .. ولكن رفضوا رفض شديد .. ف جلست بالبيت وتعوذت من الشيطان
وقبل سنتين تقريباً الحمدلله تزوجت ..
وقررت اروح شهر العسل إلى أوروبا .. ولكن الأجواء ماكانت على الكيف في هذاك الوقت بعد .. لأنه كان شتاء ..
ف لو رحت ماراح اشوف إلى أمطار أو دنيا بيضا من الثلوج ..
ف قلت ان شاء الله انها خيره ..
والسنة هذي وبفضل الله ثم بفضل جهودكم الجبّارة القائمة على هذا الصرح الشامخ
ربي وفقنا وطلعنا رحلة جميلة إلى فرنسا وسويسرا .. ك شهر عسل جديد
وفي بداية الأمر اقتصر الاختيار على باريس والريف الفرنسي .. لأن ماكان ودنا بالتنقلات الكثيره ..
ولكن مع بعض المشاورات مع اخوي فيصل .. قررنا إننا نضيف سويسرا بالجدول .. ولأن كان بخاطرنا نشوف شلالات وقمم ثلجيه ..
والحمدلله اشتغلنا على الجدول والحجوزات قبل 3 شهور من الرحلة تقريباً وكان وقت جيّد وكافي الحمدلله
وهذا رابط موضوع استفساري ومشاوراتي مع اخواني في قسم الاستفسارات اللي وصل إلى 20 صفحة ..
أتمنى ان الجميع يستفيد منه ..
(
ولكن الواحد مايدري وش الظروف اللي راح تصادفه اثناء الرحلة
لذلك كان في تعديل وشوية لخبطه .. خلوها على الله بس ..
ان شاء الله ترافقوني في التقرير وتعرفون كل شي بالتفصيل ..

• -

إلى هنا واكتفي معكم بهذا القدر للمقدمة و ك جزء أول لهذه الرحلة الجميلة
وان شاء الله اكمل معكم في الجزء الثاني و هو اليوم الأول بإذن الله
واتمنى ان التقرير يحوز على رضاكم واستحسانكم ..
و أي استفسار ان حاضر ومن عيوني ..
بس ياليت تطولون بالكم علي شوي .. اكيد كلكم عارفين ان التقرير يبي له اعداد وترتيب وتوقيع على الصور ورفعها يعني ماطلبت منكم إلا الصبر وان شاء الله تبشرون بالخير ..
لأن بصراحة الصور اكثر من 2200 صورة ل باريس فقط ..
وهذي صورة اهداء لكم من عاصمة النور ( بَآريّسْ )

وسؤال على الطاير للناس اللي زاروا باريس .. علشان يشغلون عقولهم شوي وين مكان الصورة هذي ..؟
الله يوفقنا وياكم لكل خير يارب
دمتم بكل خير