1. ايجابيات وسلبيات مانشستر


2. ((الأيجابيات))


3. يعني هذي ابرز الأيجابيات في مانشستر وانتقل معاكم للجزء الثاني


4. ((سلبيات مانشستر))

ايجابيات وسلبيات مانشستر

الحمدلله رب العالمين والصلاة والسلام على اشرف الانبياء والمرسلين اما بعد :
يسأل كثير من الأخوة المبتعثين عن مانشستر بالتحديد وتفاجات لما نزلت السعودية ان في كثير من المبتعثين الجدد يسألوا عن مانشستر فلذلك من باب العدل والانصاف ساكتب بعض سلبيات وايجابيات مانشستروممكن بعضها يكون سلبية وايجابيه بنفس الوقت والموضوع من وجهة نظري يعني ممكن غيري يخالفني بوجهة النظر وابدا بسم الله:

((الأيجابيات))

1- وجود اكثر من جامعة في مانشستر وبعضها درجتها عالية بالتصنيف . يعني يكون للشخص اكثر من خيار بالجامعات وقبولها وخصوصا الاخوة والاخوات المرافقين وبهذا تتعدد للمرافق اكثر من خيار في اختيار الجامعة والتخصص اللي يناسبه يعني كثير من المدن جامعة وحدة مانشستر ثلاث جامعات وهذي ميزة قوية.
2- قلة العنصرية : يعني ماراح تحصل عنصرية بسبب انك مسلم او الاخوات المحجبات ماراح يحصلوا عنصرية كبيرة بسبب حجابهم بالعكس التعامل عادي جدا ومافي اي مشاكل واعتقد السبب في هذا الشي وجود جالية اسلامية كبيرة جدا في مانشستر.
3- انتشار المساجد :المساجد الحمدلله موجودة بكل مكان يعني بالسيتي سنتر موجود جامع قريب من معهد البيرلتز ومانشستر اكاديمي تخلص الصف يوم الجمعة وتروح تلحق صلاة الجمعة باقل من خمس دقايق مشي وبرضوا في مسجد امام معهد الجامعة وبرضوا قريب من جامعة مانشستر وجامعة مانشسترماتروبليان واظن هذي ميزة حلوة برضوا.
4- وجود العوائل السعودية :وزي ماقلت في المقدمة بعض النقاط تشترك في الايجابيات والسلبيات لكن اعتقد للمتزوجين هذي نقطة مره ايجابية يعني ممكن يوم بالويكايند تتجمع العوائل ويخرجوا ولا تتجمع بعض العوائل ويخرجوا الرجل هذي من نقطة والنقطة الثانية لاقدر الله احد مرض ولا حاجة زي كذا الجميع يوقفوا مع بعض واشوف هذي نقطة حلوة للعوائل والناس لبعض والكل بالله سبحانه وتعالى.
5- كبر المدينة وتوفر جميع الوسائل فيها: واقصد بالنقطة هذي المجمع الكبير والاكل الحلال والمطاعم العربية فيها بكثرة بالاضافة للمطار وفي رحلتين اسبوعين للسعودية الجمعة والاثنين.

يعني هذي ابرز الأيجابيات في مانشستر وانتقل معاكم للجزء الثاني

((سلبيات مانشستر))

1- كثرة الطلاب العرب :يعني انا بصراحة استغرب من واحد ماهو متزوج يجي مانشستر المعاهد مليان شباب عرب بعض المعاهد في الصف ثمانية عرب من عشرة طلاب وبعضها تقل بقليل ولا تكثر لاكن بصراحة الاستفادة حتكون محدودة لان الي يبغى يتعلم لازم يغير البيئة الي هو عايش فيها يعني انتى جاي تتعلم لغة انجليزية حاصر نفسك فيها انسى موضوع العربي الا وقت الصلاة ولا لما تكلم احبابك بالسعودية.
2- ضعف اغلب معاهد اللغة:وهذي حقيقة البعض يخالفني فيها لكن من خلال استقراء لاغلب المعاهد من الناس الي يدرسوا فيها انها ماهي ممتازة تكون متوسطة واقل وبعضها يكون ممتاز لكن فيه خلل كبير اضرب مثال على ضعف المعاهد معهد مانشستر اكاديمي في كوادر تدريسية ممتازة لكن المشكلة كيف تدرس بدون كتب المعهد مالوا منهج محدد يوزع اوراق على الطلاب ومعهد البيرلتز ضعيف زي ماسمعنا ويتاخر الدرس مافي اي مشكلةواغلب المعاهد على هذي الحال الامعهد الجامعة يتفوق عليها لكن مشكلتة كثرة العرب بشي مو معقول.
يعني هذي ابرز الأيجابيات والسلبيات حبيت انزلها للأحباب قبل مايقرروا نروح لمانشستر ولا لا وبانسبة للاخوة المتزوجين اشوف من انسب المناطق لهم مانشستر يعني لوقدر يدرس لغة برة مانشستر بعدين يحول على مانشستر ويجيب اهلوا معه راح يرتاح كثير.
والله يوفقني ويوفق الجميع لمرضاتة ويرجع جميع المغتربين واللي بيتغربوا لاهلهم سالمين محققين الهدف الي خرجوا من اجله امين .
واسف جدا" على وقتكم الثمين الي تكرمتوا وقريتوا فيه المقال تحياتي للجميع ابوسارة