مشكور اخوي على هالموضوع
ابسأل احنا بنسكن في ميونيخ بس اذا بغينا نروح فرانكفورت بأي وسيلة تنقل وجم تبعد عن ميونيخ؟
هل تستاهل العنوة يعني من حيث الاماكن السياحيه والترفيهيه والاسواق تكفيها 3 ايام مثلا؟؟
والسكن بفندق والا شقق احسن بالنسبه للاسعار؟؟
ويعطيك العافيه

روحي الكويت
اسمحيلي اختي ارد عليك
فرانكفورت مدينة كبيرة ومعالمها كثيرة لكن اذا كنتو عايلة صغيرة يعني 2 او 3 فبامكانكم تتعرفو على فرانكفورت وتتفسحو فيها بالمترو والترام والباصات والقطارات خلال يومين تكفيكم
ميزة اوروبا في هذا الوقت ان النهار طويل وبامكانك استغلال معظم الوقت في التمشية والتسوق
والفنادق افضل ومريحة وغالبا الفطور مشمول مع العرض
تحياتي

مشكور اخوي على الرد الرائع
احنا شخصين خفاف^_^
والله صج على كثر ماشفت معلومات الا اني ليلحين احس اني ضايعه ومخي مشتت
طيب
ممكن اسألك سؤال ثاني
يومين يكفينا نستكشفها؟؟وشنو الاماكن اللي فيها تستاهل الشوفة؟
الاسواق اهم شي واللي يعافيك
وشكرا مره ثانيه

روحي الكويت
تسايل(Zeil) شارع التسوق افضل شارع للتسوق للتسوق في فرانكفورت كل الماركات الجديدة لملابس الصيف او الشتاء موجودة في هذا الشارع والعروض والمهرجانات تقام فيه ايضا اكيد بتلقوا عروض ومهرجانات سواءا للتسوق او للعروض الاخرى
في وسط فرانكفورت فيه ميدان "هاوبت فاخه" (Hauptwache) وبجنبه بتلقوا مركز "تسايل جاليري" و"فرانكفورت هوخ فير" للتسوق وهناك بتلقوا منصة خاصة في أعلى بناية "تسايل جاليري" يبامكانكم تستمتعو بمنظر كامل المدينة و غابة التاونوس.
سوق المنتجات الزراعية في "كونستابلر فاخه" قريب من شارع "تسايل".
"فرسجاس" (Fressgass) هذي منطقة فيها المطاعم الفاخرة ويوجد فيها مطاعم عربية وايرانية وتركية يعني لحم الحلال موجود
شارع جوته (Goethestrasse) عاد هذا ارقى شارع في فرانكفورت وفيه المحلات الرفيعة المستوى خاصه في عالم الموضة والذهب والحلي الثمينة جدا مثل كارتييه وتيفاني وفيه محلات بيع القطع الفنية والأدوات المنزليةز
هذا وسلامتك

الله يسلمك
مشكور اخوي مره ثانيه واذا عندك معلومات مثل ماانت قاري بالتوقيع
ياليت
اذا مافيها كلافه عليك تساعدني
ويعطيك العافيه

روحي الكويت
توقيعك بيخليني ابكي معاك ..
بس ولا يهمك محتاجه اي نوع من المعلومات؟ ..

ههه
اي والله يبجي شسوي بعد انا اول مره اروح لها وزوجي نفس الطقةكلنا نكسر الخاطر اهئ
معلومات شاملة عن كل شي فنادق اسواق اماكن ترفيهيه سياحيه وبالذات ميونيخ وزلمسي وودي نقسم الايام على مناطق ثانيه قريبه من ميونيخ تستاهل الروحة لها
واللي معقدني الانجليزي زوجي بالمره مايعرف ومخليني بوجه المدفع انا اتفاهم معاهم والا ماله شغل بشي وانا اخذني مترجمه بس كمتحدثه مش ولابد يعني مومنطلقه ارطن مثلهم ^_^
والاسعار الزينه بالنسبه للفنادق ناخذ فندق والا شقق والسكن في كابرن احسن والا زلمسي قالولي ارخص منها كابرن
واي
شكثر الاسئله اللي بتفجر راسي
الله يعينك ابتليت فيني الحين

روحي الكويت
نزين خلاص اختي هدئي من روعك اخاف فيوم السفر تغلطو فطريق المطار من كثر الربكة وتروح عليك الطايرة
.. المسالة بسيطة ولا تعقدوها
انا دايما من المتشجعين للفنادق خاصة في المانيا .. زيلامسي وكابرن انصح بالشقق
وغالبا اي فندق تسكنون فيه يعطوكم كتيب عن الجهات السياحية واطمنك راح تلاقو عوايل عربية وخليجية بالذات بيدلوكم بعد على كل المكانات السياحية
الانجليزية بتحتاجوها كثير بس هم انجليزيتهم مو بذيك القوة ترا يعني عادي لو كسر ريلك الانجليزية تكسير اصلا هم بعد انجليزيتهم اخس واخس
عندي شعور انكم بترتاحو في سفرتكم ان شاء الله بس انصح الحجز يكون مبكر جدا يعني اسرعوا ..

بالنسبه للحجز الحمدلله انه اللي بالسفريات نعرفه ويبي يضبطنا
والصراحه كلامك حيل طمني اجل بتمشي امورنا ان شاء الله
مشكور حيل حيل
الحين حدي فصلت جاني النوم سهرانه من امس
تصبحون على خير
ولنا لقاء آخر الموقع هذا ماراح يفتك مني لين تجي السفره ^_^