بسم الله الرحمن الرحيم مني عارف اش اسمي موضوعي بس حبيت ادلكم على طريقه حلوه او اقلكم بلي يسير معايا كل سنه او بلي يحصل كل سنه في يالوفا ولي كثير منكم مايعرفو عن هاذي المدينه الصغيره الي قضيت فيها اجمل ايام حياتي الفايده من موضوعيالتوفير الرهيب في رحلتك لتركيا معاك اكثر من مرشد سياحي ومن جنسك او تقدر تسميهم اصدقاء المستقبل نخش في الموضوع كل سنه وبعد عناء المدارس وعناء العمل ودوشه الاولاد الواحد مايصدق تيجي الاجازه وتبدا الحجوزات والتخطيت للسفر ويشتغل النت على موقع المسافرون العرب الي ماخلى صغيره وكبيره عن جميع بلدان العالم من جميع النواحي الفنادق والمطاعم والخفي موضوعي حتكلم عن مجموعه صغيره من المسافرين وكيف حياتهم في السفر وبذات الي تركيا ومدينه يالوفا تحديدا اول ماننزل مطار اسطنبول وناخذ شنطنا وعلى طول تكسي ونتفق معاه زمان كان بمئه دولار يوصلك لباب مزرعتنا الان بمئتين ونتا طالع وسرنا نستبدلها وناخد تكسي من المطار لميناء يني كبي مهو بعيد من المطار وناخد اول باخره سريعه وعلى يالوفا ساعه ونتا هناك وتذاكرها رخيصه وتبدا اجازتنا السعيده باذن الله طبعا اول من يعرف اننا وصلنا الجيران وتبدا الوفود بل قدوم والحاضر يبلغ الغايب وداك اليوم يسير من احلى الايام عندي لي اني اذوق فيها الاكلات التركيه كلها في العشا وتخيلو بيتنا داك اليوم كيف يسير زي كانو عندنا جواز امم وعالم وناس سرلك سنه ماشفتهم وتعرف الاخبار كلها من يوم ماسفرت العام الماضي علين يوم ساعه وصولك وعلى الساعه 11 في الليل كل يبداو يروحو بيوتهم وينتهي اليوم ثاني يوم طبعا نبدا بتنظيف البيت وشراء المقاضي وتعبئه الثلاجه والرز نكون جايبينو معانا ونبدا تقطيف في الفواكه والخضار من كل نوع وصنف وكلو من المزرعه طازج وقبل الظهر بشويه يبداو الي ما جو امس يجو اليوم ويبدا يوم ثاني وثالث على كدا وانا كنت مسميها ثلاث ايام الجيران يعني ما اواعد احد او اروح مكان غير بعد الثلاثه ايام الاولى المزرعه تبعد عن يالوفا تقريبا 4كيلو على طرق تيرمال او كوك شيدرا وكثير يسموها جوك شيدرا والمواصلات لاتنقطع من يالوفا لي كوك شيدرا او تيرمال ابدا دايما تلاقي باصات رايحه جيا بليره ونتا تكون في يالوفا طبعا نبدا برد الزيارات ونعرف اخر الاخبار واش المطاعم الي فتحت ومين اتزوج ومين راح الجيش ومين عمده يالوفا الجديد واش الاسعار الجديده واش الاسواق الي فتحت وكل الاخبار من الى وبعد كدا ننقسم قسمين الشباب والرجال لوحدهم والحريم والبنات لوحدهم في الخرجات والروحات والجيات ويبداو يجو اصحابنا بعوائلهم من جميع الدول العربيه والخليجيه ويبداو يستاجرو الي ياخد شقه ولي ياخد بيت بحديقه صغيره ولي يسكن في يالوفا ولي يسكن في كوك شيدرا في يالوفا الشقق كثير والغالبيه ياخدو على البحر قدام الممشا وهذول يحبو حياه المدينه المفعمه بل حيويه والنشاط والنشاطات الاجتماعيه والاسواق واكل المطاعم ولي ياخد في كوك شيدرااو اوزبينار او تيرمال وكلها قريبه من بعض برجولك تلفها كلها هذا يبغا الهدوء التام والاستجمام والحمامات الحاره وعيشه القرى الخضراء والجو الرومانسي وتتراوح الاسعار في يالوفا او كوكشيدرا انتا ونصيبك وحظك من 50 دولار ونتا طالع وممكن تلاقي اقل كل ما طولت المده قل سعر الايجار وغالبيتهم يكونو عارفين اصحاب الشقق او البيوت الي يستاجروها اوسكنو عندهم من سنوات سابقه وبعضهم يحجز قبل لايطب على تركيا بل تليفون وبعد مايسكنو ويستقرو يبداو يتسوقو ويتقابلو في الاسوق هنا تبدا المتعه الحقيقيه تبداء الرحلات السياحيه ويجلسو يرتبو يوم يجتمعو فيه اكثر من 5 او 10 عوائل وبل قطه يستاجرو باص ويطلعو بورصه الجبل نسيت اقلكم رحله بورصه تنقسم الى قسمين بورصه الجبل وبورصه السوق بورصه الجبل دايما يروحوها اول ما يوصلو تركيا وهيا عباره عن جبل ممكن تطلعو بسياره او بل تليفرك تبعد يلوفا عن بورصه 70 كيلو يعني ساعه بظبت ونتا في وسط بورصه ودائما يجتمعو الساعه 10 صباحا والساعه 11 ينطلق بيهم الباص الساعه 12 وهما في وسط بورصه وساعتين كمان طريق الجبل وي كونو في قمه الجبل طبعا هناك اغلبها مطاعم للشوي يعني تطلب مثلا 3كيلو كفته ويجبلك الكانون ونتا تجلس مع عيلتك تشوي وتاكل وممكن المطعم يشويلك الجو في الصيف يكون جدا جميل وبذات ونتا جالس تحت الشجره جالس تشوي وي جبلك لبن اسمو ايران والسورين يسمو عيران وصحن الزلطه وكم حبه طماطم وكم حبه بصله تشويهم مع اللحم والجو بارد نسبيا وغيوم وياسلام لما يجيك مطره خفيفه او هتان ونتا بتشوي ولا اروع من كدا ويجيك العيش التركي وتجلس تسخنو على المنقل لازم يزيد وزنك داك اليوم كيلو على الاقل طبعا يجلسو للعصر وبعد كدا يركبو الباص ويرجعو على يالوفا من مكان ما انطلقو وما احتاجو لا لمكتب سياحي ولا احتاجو لمترجم وما كلفهم غير قطه السياره وفي الجبل كل واحد يطلب الي يبغاه على قد عيلتو او افراد اسرتو الي معاه لو الباص 150 دولار تتقسم على 5 عوائل يطلع القطه كلام فاضي ورحله بورصه السوق وهادي يتفقو عليها في يوم وي روحو على الاسواق الي في بورصه ونفس الطريقه يستاجرو باص وينزلهم قدام السوق ويجيهم الباص ثاني في وقت يكونو متفقين عليه ويرجعو ثاني ليالوفا وباقل الاسعار يعني حتا السياح الجدد في تركيا ماراح يغلبو في يالوفا اقلكم على السيناريو الي يسير مع الحريم يكونو في السوق بيتمشو في يالوفا يقابلو حريم زيهم في نفس السوق يبداو بسلام عليكم وعليكم السلام انتو عرب ايوه ماشاء الله من فين من السعوديه من فين في السعوديه والله جده ماشاء الله من بيت مين من بيت فلان وي تعرفو بيت فلان ترد ايوه يسيرو اخوالنا وي كانو جيراننا لما كنا في مكه بيتنا لاصق في بيتهم في جياد لما كنا ساكنين هناك وسبحان الله وتسير المعرفه فين ساكنين هنا والله ساكنين فوق المطعم الفلاني وي قريب جنبنا يعني ليش انتو فين ساكنين احنا ساكنين فوق محل الاسكريم الي قدام البحر طيب خلاص سرنا جيران تعالولنا وتبدا من هنا وبعد كدا يبداو يتعرفو على باقي العوائل والرجال يتعرفو على بعض في المسجد وعلى كدا او عن طريق عوايلهم وهنا يبداو ينقسمو لقسمين يسيرو الحريم ببناتهم باطفالهم يمشو مع العوائل الثانيه من غير رجالهم ومع بعضهم تشوفهم ماشاء الله والرجال لوحدهم مع بعض ياجالسين عل قهاوي الي على الممشا يامجتمعين في مزرع واحد منهم وجايبين خاروف وذابحينو وطابخينو يارايحين ومجتمعين في مطعم بل عربي كدا الرجال ماخدين راحتهم من غير حريمهم والحريم مع بعض مرتاحين من رجالهم واحب اقلكم على شي مهم جدا وعجبني جدا وهوا الامان ماتخاف على عيالك وحريمك وبناتك في يالوفا ابدا المنطقه امان ومحد يقدر ولا يتجرا يكلمهم او يعاكسهم او يقل ادبو معاهم وعمرك ماحتشوف تركي جالس يرقم ولا يعاكس لو فرضا احد سواها اكيد انو حيكون اخر يوم في عمرو هما نفسهم الاتراك لوشافو زي كدا حيضربوه وحيجتمعو عليه علين مايموت يعني الناس الي ماشين في الشارع هما الي حيقتلوه ولو عاش وجات الشرطه يسير هما الي حيكملو عليه ويبدا تخطيط الحريم ويتفقو كيف يروحو اسطنبول بدون ازواجهم المزعجين الي جالسين في حلقهم ولي يدخلو في كل صغيره وكبيره مثل غالي او اش تبغيبو في عندنا منو في السعوديه ومثل هيا ما تعبتو نبغا نرجع خلاص ومثل الخويرتبو ويستاجرو باص قبلها بيوم يستناهم في ميناء يني كبي في اسطنبول اول ماينزلو من الباخره يركبو الباص الي مستنيهم ويروحو السوق براحتهم يشترو وي قضو على كيفهم وبعد العصر يرجعهم للمينا والمسافه من يلوفا لي وسط اسطنبول بل باخره السريعه ساعه لازياده ولا نقصان يعني ساعه من يلوفا لي بورصه وساعه من يلوفا لي اسطنبول وعشره دقائق من يالوفا لي ترمال وكوك شيدرا واوزبينار اش تبغو احلى من كدا مدينه حلوه وقريبه من مدينتين وامان امان امان امان وجو حلو من غير مكيفات تقدر تنام في اعز الصيف لو كترت مروحه توجها على الجدار وهيا تسويلك احلى جو هدا في اعز الصيف والحر يجي اسبوع واحد في السنه في يالوفا وتقضي عليه بل مروحه وليس بل تكيف لاتنسا انتا في منطقه ما فيها زحمه المدينه الكبيره ولا عادم السيارات والباصات الكبيره الي بديزل ومليانه شجر وزرع .وياسلام لما نجتمع 10 عوايل ونستاجر باص يودينا منطقه اسمها حسن بابا قريبه من شنارجك منطقه جبليه تغطيها الاشجار العاليه تبعد من يلوفا 15 دقيقه تقريبا ونجلس تحت الاشجار من كثرها ماتشوف الشمس وفيها محميه غزلان وكل عيله تكون طابخه طبخه في بيتها ونروح حسن بابا نتغدا هناك الحريم لوحدهم والرجال لوحدهم ونجلس ناكل ونشرب من مويه جاريه نازله من فوق الجبال بارده وناخد معانا كم حبه حبحبه بطيخ يعني ونحطها في المويه البارده بعض الاحيان من شده البروده تتفقع البطيخه وتسير نصين طبعا بعد الوجبه الدسمه تديها بطيخ يجيك النعاس عصبا عنك تاخد غفوه في داك المكان على صوت الغابه عصافير على صوت اوراق الشجر وهيا بتخبط في بعض من الهوا بصراحه مني عارف اوصف ومهما وصفت ما حوفي وتتفرج على منطقه شنارجك من الاعلى وتشوفها من بعيد ونتا فوق الجبل وطبعا بنسبه للسايح الجديد على تركيا بعد ماراح مع اصحابو الجدد وتعرف على المنطقه من غير مترجمين ومكاتب سياحه وعرف كيف يروح اسطنبول وبورصه وبكم الايجارات وفين الاسواق وكيف يشتري تذاكر الباخره ومن فين موقف الباصات واسعار السلع واسعار المطاعم واكيد يكون اتعلم بعض الكلمات وبعض الارقام حيقدر يكمل اجازتو وهوا سعيد ومبسوط ولو احتاج اي شي صار عندو اصحاب من نفس جنسو وبلدو .ويطور الوضع ويتفقو العوائل ويخططو يروحو منطقه اسمها ابند وبنفس الطريقه يستاجرو باص ويروحو يجلسو كم يوم هناك ويستمتعو ويرجعو باقل التكاليف وطبعا اهل الخبره هما الي يرتبو الفندق في ابند بارخص الاسعار ومن غير استغلال وحتى لو حبيت انك تروح مع عائلتك لوحدكم ممكن يساعدوك ويحجزولك ويرتبولك كل امورك ومحل ما تبغا وبكدا تبدا نهايه الاجازه وزي ما جينا على تركيا تبدا الجيران في اخر يوم يجتمعو عندنا لتوديعنا ويبدا البكاء والتوديع ويجي يوم السفر ونروح المينا وعلى اسطنبول ساعه بل باخره السريعه ومن هناك عل مطار على طول والرجوع للوطن الغالي وكلك ذكريات جميله مفيده واول ما توصل بيتك تبدا تنزل الصور وتكتب موضوع عن سفرتك وخبرتك وتنزلها لمنتدى المسافرون العرب الغالي على قلوبنا ولي فادنا في رحلتنا واستفدنا بكثير من المعلومات المفيده والسلام ختام وان شاء الله تكونو استفتدو لو جزء بسيط جدا واسف عل اطاله