الحمدالله على السلامة أخوي نكبة زمانه ، أتمنى لك رحلة سعيدة
ترجع بالسلامة ان شاء الله

الحمد لله على السلامه
اجل وصلت اليوم مع المطر والجو البارد .... اليوم كان غير امس اليوم برد ومطر واضطريت اشتري ملابس شتويه من c&a
ان شاء الله بكرا احسن
ودمتم

نكبة زمانه
يابختك....الله يهنيكم يارب...النمسا بلد رائعه فوق الوصف في كل شي.
قضينا فيها اسبوعين من اجمل مايكون

الحمد لله على السلامة اخوي نكبة وان شاء الله تقضي احلى رحلة وبالتوفيق ولا تنسانا من المعلومات

الله يسلمكم يارب جمعيا ...
ايه والله يا بوفهد اليوم الجو بارد مرره والحمدلله ماخذ احتياطاتي من ملابس وشمسيه ههه ماحطيت اكياس فوق راسي مثل بعض النمساويين ...
وفندق راديسون ساس جيد جدا .. والانترنت مجانا فيه

الاخ نكبة والله ماضنك نكبة
خوفتنا انشالله موو برد مرة انا برووح بسبتمبر ومعي
طفلي الله يخليه لي ماقدر اخليه ابيه يتمشى ويعرف الدنيا .
نبي منك يالغالي تعطينا تقرير يومي عن الجو ولو بشكل مختصر.
وايش رايك بالاندر قراوند زحمة ولا زوين ؟ وبالليل تطلعون ؟
الله الله فينا ترانا معاك كل يوم بيومة:11_horror :icon_stud .
والله يوفقك وايام سعيده انشالله:smile001:

abo awad
هلا اخوي ابو عواد .. الجو باول اغسطس ذكره اخوي لمسات انه يكون بارد وممطر ... وبصراحه انا وصلت اليوم ولله الحمد 12 اغسطس وبصراحه برد والله ومطر .. مادري هل هو برد فعلا ولا عشاني جاي من الرياض بس بتشوف كل النمساوين لابسين جاكيتات ومعهم شمسيات ..
ومن ناحية الاطفال يابوي خذه معك ووسع صدرك ولاتجلس تحاتيه .. كل العالم هناك اطفالهم معهم لدرجة اني شفت اليوم اطفال خليجين ماشاء الله عليهم يمشون لحالهم بوسط الشارع ويدورون يعني عادي الوضع ماتقول فيه خوف..
الاندر قراوند حقيقة مابعد جربته لكن بكره بإذن الله ببداء فيه ويبدو لي انه سهل جدا خصوصا اذا وضحت المناطق عليه والزحمه ماشوف احد يتكشى منه الى الان ...
طلعات الليل وصلنا لطلعات الليل .. انتظر تقريري بعد الرجوع بإذن الله وابشر بكل ماتريده ..
الواحد مايقدر يكتب شئ خصوصا انه يجي متعب ومايقدر يجمع افكاره يبي يرتاح ويطلع .. حتى الصور صعب شوي بهالمطر

الحمد لله على السلامة
جايكم ان شاء الله الاسبوع الجاي ،،، كيف الأجواء وزحمة المطارات والبلد ؟؟؟ بشر ... عندي استفسار بسيط
الحين ان رحلتي مثل رحلتك ابطلع من فينا ان شاء الله بالقطار الى سالزبورغ وبعدين منها بالقطار الى زلامسي وبعدين ... حاجز وقاضي من هنا ب 1000 ريال درجة أولى
إيه الحين أبروح من زيلامسي الى ميونخ وش رايك:
1. قطار؟ وهل الأسعار أفضل من هنا أو من هناك.
2. سيارة؟
رايك والسامعين ياجماعة الربع ،،، وشكراً

danial
بصراحه مابعد جربت القطارات ... ولا قصيت حتى التذاكر بروح بكره ان شاء الله .. بس الافضل القطارات دامك بتاخذ درجة اولى ... الاندر قراوند بصراحه روعه وماتخيلته بهذه السهوله ابدا ( وهو عام) شلون اجل القطارات ودرجة اولى قد تكون اروع وتطل على مناظر روعه مو على صبات مثل الاندر قراوند
وتقبل فائق تحياتي