السلام عليكم ورحمة الله وبركاته
اسعد الله اوقاتكم بكل خير
اليوم ولله الحمد من الساعة 7.30 ص في عز البرد مسنتر في طابور له اول ماله آخر عند السفارة الامريكية بالرياض ...
ولابد من بعض الافلام اللي تصير مثل احد النماذج ناقص وردوني عند الباب ورحت لمكتب وسواه لي من جديد بخمسين ريال (شغل سفري)
المهم الحمد لله سويت المقابلة بعد جهد وجهيد ولا طلعت الى الساعة 1 تقريباً كان يوم عصيب ...
ابرز ماحدث واريد تعليقاتكم لا هنتو:
انا رايح دراسة لمدة 6 شهور (لغة) في سياتل بعد ثلاث شهور ان شاء الله _ على حسابي الخاص مع العم اني موظف ...
1- حاولت مراراً اقدم كشوف الحسابات ولم يحتجاونها فقط سالوني من سيقوم بتحمل التكاليف قلت انا.
2- حاولت مراراً اقدم ورقة حجز السفر ولم يحتاجون او حتى يطالعونها.
3- المقابلة لم تستر سوى 3 دقايق ومن بعدها قال لي سيتم ارسال الفيزا مع الجواز لك بعد اسبوعين (واعطاني كرت ازرق وقال سلمه لفيدكس )
4- لم يسالني اين سافرت.
5- لم يسالني عن جوزاتي القديمة؟؟
6- ابرز الاسئلة:
لماذا اخترت هذه المدينة والجامعة بالذات؟
طلب مني درجات دراستي في الجامعة وقلت له في البيت مع العلم اني رايح ادرس لغة !!
سالني ليه بتدرس لغة؟
وانا اجاوب قص كرت وقال لي بعد اسبوعين بنعطيك جوازك والفيزا!!
انا بصراحة انهبلت ولا صدقت لان المقابلة قصيرة جداً جداً (مقارنة بمقابلات الشباب هنا وفي السفارة امامي بعضهم يجلس 10 او 15 دقيقة اما انا 3 او 4 دقائق فقط ؟؟)
لغتي كانت ركيكة بعض الشي وضحك علي في بعض الكلمات اجيبها له من بعيد يالله توصل.
السؤال الاهم واللي ابي جواب تكفون /
هل اخذ الجواز وكلامه لي دليل على قبولهم اعطائي الفيزا ام هذا فقط احتمال ؟
لان اللي اشوفه معظم الشباب هنا اللي صار له 160 يوم واللي 90 يوم ما جاه رد ( هل يمكن يلطعوني هالمدة بدون جواز)
وش معنى اخذهم لجوزاي وعدم اطالة المقابلة وعدم سؤالي الاسئلة المعتادة ؟؟ هل ارتاحو لي ام بيكرشوني ام بيسحبون فيني وبعد اسبوعين بيقولون للاسف :112:
الله لا يهينكم انتظر ارائكم ...
ولكم مني جزيل الشكر والعرفان ،،،