حياك
بحاول اجاوب على بعض الاسئلة اللي اقدر عليها
واترك المجال لمن هم اكثر مني خبرة للاجابة والافادة
بالنسبة للمدة الكافية لماليزيا
طبعا ما بين 14 إلى 16 يوم كافية
ولو تبغين تتمشين براحتك وبدون استعجال وتكون رحلة العمر خليها ثلاث اسابيع
الميزانية الكافية لاسبوعين
طبعاً تختلف من شخص لآخر وكل واحد حسب اسلوبه في التمشية
ولاتنسين مستوى الفنادق والصرف اليومي والهدايا كلها تفرق من شخص لآخر
لكن الغالب ان اللي يسافر اسبوعين تكون في حدود ما بين 14000 إلى 15000 ريال
بالنسبة للفنادق والبرامج
انا اشوف انك تركزي شوي على الفنادق الحلوة من خلال هذا المنتدى
واكيد لو جلستي تقرأين اسبوع واحد عن مزايا وعيوب الفنادق
بالاضافة لطرح الاسئلة عن الفنادق المحببة لنفسك
راح تكون عندك خبرة كافية عن افضل الفنادق المناسبة لك
وفي هذه الحالة تحجزون الفنادق من احد المكاتب في السعودية
والميزة في هذي الطريقة انك تقدري تقسمي ايام الرحلة باختيارك
بعكس انك تروحي ببرنامج تكوني مجبرة على تقسيم الايام حسب البرنامج
بالنسبة لافضل خطوط طيران
الخطوط اللي متعارف عليها ويتعامل معها السعوديين هي
الخطوط السعودية والماليزية والاماراتية
انا جربت الماليزية ولا كان عليها ملاحظات
لكن بالنسبة لاهل الشرقية اتوقع ان السفر عن طريق البحرين اوفر بغض النظر عن اسم الخطوط
يعني مثلا لو تروحون للبحرين وتسافرون على ماليزيا على الخطوط الماليزية اتوقع انها فكرة جيدة
وفي النهاية ممكن تشوفي اسعار التذاكر واي منها اللي خط سيرها مباشر وتحجزي معها
الله يوفقك
وحياة سعيدة
ولو عندك اسئلة لاتترددي

أنا رأيي من رأي أخوي الغالي صادق الإحساس ،،
لكن عندي استفسار أبغاك تتأكدين من العرض اللي عطتك إياه الوكاله السياحيه بصراحه مستحيل عرض 14 يوم ب 1180 أكيد بدون التذاكر لأن موضوع العرض ما كان واضح لي ،،
وبصراحه لا يهمك فندق داينستي اللي في كوالالمبور بعدين عن وسط المدينه وما فيه حوله أصلاً أماكن تستاهل أن الواحد يسكن فيه علشانها هذا رأيي أما بالنسبة للمدة أنا من رأيي خلوها ثلاثة أسابيع إذا تقدرون يعني كوالا بلحالها يبغى لها حوالي 4 إلى 5 أيام يعني يومين أول ما تاصلون بعدين ثلاث أيام للتسوق في نهاية الرحلة ،،،
بالنسبه لفنادق كوالا أنصحك أختي الكريمه بما أنه شهر عسل تسكنين في ماندرين أورينتال أو شنغريلا الفندقين هذي بصراحه من وجهة نظري الشخصيه أجمل فنادق كوالالمبور وبتدعون لي إن شاء الله ،،
تحياتي ،،،