وأبغى أروح مدينة آنسي كيف أدخلها في مخططي السياحي ؟

مرحبتين ,
حبيت افيدك في بعض الاشياء :
جنيف رحت لها ليلتين وطفشت صراحه بالنسبه لي 3 ليالي كثيره لكن ممكن تعجبكم وتتمنون تجلسون اكثر
لكن حقها ليلتين ..
انترلاكن جلست فيها 3 ليالي وتمنيت اني اجلس فيها اكثر مره روعه و وسيعة صدر
شي خيالي , وانتقلت لها بالقطار كان مره حلو ما تطفشين لانك تتفرجين على طبيعة رب العالمين من االشباك ..
باريس مناسب لها 5 ليالي مره ممتعه
كل تنقلاتي كانت بالقطار وكنت حاجزه التذاكر كلها من الرياض قبل لا اسافر
وجوى المدينه نفسها كنت اتمشى على رجليني و ايضا تنقلت في الأوبن تور يجيك باص مكشوف
تاخذين التذكره حقته من الباص نفسه واذا شفتيه بتعرفينه , زي باص النقل الجماعي ويكون لونه تفاحي او احمر او ازرق تختلف الالوان على حسب الشركه اللي يتبع لها
ياخذك ويمشيك في الاماكن السياحيه اخذته في باريس وروما , انترلكن مافيها اوبن تور ..
بالنسبه للفنادق اللي سكنت فيها :
انترلاكن : metropole وهو اعلا فندق في انترلاكن وموقعه حلو مره
لو حجزتي فيه اطلبي غرفة من الواجهه الاماميه عشان تستمتعين اعتقد كان سعره 600 ريال لليله
قريب نسبيا من محطة القطار وبالنسبه لي ما احتجت ل تاكسي رحت على رجليني
واذا بتطلبين دور اعلى يزيد السعر شوي
باريس : chathau fron trna يبعد عن الشانز 3 دقايق تقريبا كان حلو ومرتب سعره 900 لليله
بينه وبين الشانز 3 شوارع اذا ما خانتني الذاكره
جنيف : bristol ما اتذكر سعره بالضبط لكن مو اقل من 900 ولا اكثر من 1200 وهو قريب مره من
محطة القطار مايحتاج تاكسي
طبعا اسعار الفنادق هذي كانت بشهر 7 و 8 عام 2009
ان شاء الله اكون افدتك ,
رحله ممتعه

هلا بك اختي
الله لا يجيب سيرة اللي ذكرتيها
حددي لي اختي وسيلة المواصلات لان هذا الامر انتم اللي تحددونه وليس خيار
وحددي لي وجهة الطيران
مخططك
1_ جنيف ( 3ليالي )
2_انتر لاكن (3 ليالي )والأنتقال إليها بالقطار ؟
3زيورخ (2 ليله )والأنتقال إليها بالقطار إن وجد؟؟
4_ سالزبورغ_النمسا (2 ليله )
5_زيلامسي (5 ليالي )
6_فيينا (3 ليالي ) والإنتقال بعدها بالطيران إلى
8_ باريس _فرنسا ( 5 ليالي )
اعتبره تعذيب ومحتاجين بعده اجازة للراحة والاستجمام
الفنادق جدا سهل موضوع في حال انه تم تحديد المدن وعدد الايام وتحديد الميزانية لية الواحدة
والله يسهل اموركم كلها

زوجي هون عن الفكرة اللي ذكرتها بعد ماشاف اسمك يابو عزيز وردك علي الله يخليك رتبلي جدول مريح وممتع
اول حاجه الطيران عن طريق الخطوط السعودية علما بأنه تم شراء التذاكر جده _ جنيف ....باريس_ جده
ثانيا الدول التي نرغب بزيارتها سويسرا _ النمسا _ فرنسا ونرجو إن أمكن اقتراح المدن وعدد الليالي المقترحه لكل مدينه وكذلك الفنادق
وسيلة التنقل إستئجار سيارة (ارجو التفضل بالنصيحة لإستخدام القطار او الباص بين المدن بسبب طول المسافة او الإنتقال بين دولة وأخرى ( الحدود )
الميزانية تقريبا000 40 ريال لاتشمل التذاكر وشكرا

قطر الندى20
ممكن اعرف تفضيلاتكم
من ناحية العمر شباب والا شياب
من ناحية الهدوء في السكن والمنطقة اللي فيها السكن معزولة والا في اماكن فيها العربوش
من ناحية الاماكن مثل متاحف - اسواق - رحلات في المراكب - صعود قمم ثلجية - حب القيادة في الطرق الجبلية
من ناحية الميزانية لليلة الواحدة للسكن - هل يشترط مكيف في السكن
من ناحية التسوق لاني متأكد انك ماراح تفكري فيه ولا جا اصلا على بالك
من ناحية الملاهي في ديزني
من ناحية الملاهي في اوروبا بارك
والا اصلا مستبعدين الملاهي
القارمن شريتوه لانه مهم يكون موجود معاكم اللحين وتتدربوا عليه وتخزنا فيه الاحداثيات

اخي العزيز ابو عزيز ابشرك واقولك إنه زوجي انشرح صدره وانفتحت اساريره بعد ماعرف إنك متواصل معاي لأنه إحنا سنه أولى سفر اوروبا
1-ابشرك احنا شباب الله يعطينا ويعطيك طولة العمر
2-من ناحية السكن نفضل(_ مكيف ولانفضل العزلة يعني نحب الناس_ وميزانية السكن تقريبا 200 يورو )
3-ومن ناحية الأماكن لانفضل المتاحف اما بالنسبة للقمم الثلجية بموت رعب (انتر لاكن من ضمن الرحلة هل هي من المرتفعات)نحب الرحلات البرية والبحرية
4- التسوق شر لابد منه
5-الملاهي ...ديزني فرنسا بإذن الله
6-القارمن موجود
ودمتم عموما الله يريح بالك

جزاك الله خير ياام ريان
يعني انتي برأيك التنقل بالقطار أفضل لزوجي من إستئجار سيارة ؟

وسيلة التنقل السيارة
استلام السيارة من مطار جنيف الجزء الفرنسي
وتسليمها في مطار شارل ديقول الله يرحمه
النمسا ابد ماتجي في الوسط ب بسبب موقعها الجغرافي
ونفس الطبيعة واجمل راح تشوفينها في انترلاكن ان شاء الله
المخطط المبدئي 1
منترو --- 3 ايام
لوقانو ---3 ايام
لوزيرن - 3 ايام
انترلاكن 4 ايام
جنيف 5 ايام
باريس 5 ايام
وممكن نعدل الايام حسب مدة رحلتكم
المخطط المبدي 2
جنيف 4 ايام
منترو 4 ايام
لوقانو 3 ايام او و لوزيرن 3 ايام
انترلاكن 4 ايام
رست - اوروبا بارك 3 ايام
باريس 5 ايام
والسيارة مهم ان تبقوها معكم لان السكن حول ديزني اوفر واجمل
اذا لا فممكن تسلمونها في ستراسبورغ القريبة من رست واخذ القطار الى باريس
او مخططكم مع تغيير بسيط في توزيع عدد الايام
1_ جنيف ( 3ليالي )
2_انتر لاكن (4 ليالي )
3زيورخ (3 ليله )
4_ سالزبورغ_النمسا (2 ليله )
5_زيلامسي (3 ليالي )
6_فيينا (3 ليالي ) والإنتقال بعدها بالطيران إلى
8_ باريس _فرنسا ( 5 ليالي )
المخطط الثاني مشكلته انه اكثر تكلفة من ناحية السيارة وتسليمها في بلد ثاني ومن ناحية الطيران
بالاضافة الى كثر التنقلات
اتمنى اكون افدتكم ولو بشي بسيط
ولا بد ان تشوفي اراء الاعضاء
وحياكي

حياك الله ياخوي
استقرينا على المسار التالي :
1- جنيف 4ايام لكن ايش رايك يكون السكن في ديفون وكم المسافة بينهما .
2- منترو 3 ايام
3- لوقانو 3ايام
4- انتر لاكن 5 ايام
5- باريس 5ايام
نرغب في الذهاب الى باريس عن طريق القطار...فين تنصحنا نسلم السيارة بعد انتر لاكن ؟ وفين هي اقرب محطة قطار من انتر لاكن تتوجه مباشرة الى باريس؟ وانا ماأحتاج أروح اليورب بارك في رست لأني رايحة للديزني في باريس
ولاتنسانا من الفنادق ثم الفنادق وجزاك الله خير