السلام عليكم
اخوي بونواف المطاعم العربيه والتركيه بتكون متركزه في منطقه البانهوف ( محطه قطارات فرانكفورت الريسيه) عند خروجك من المحطه الرئيسيه بتواجهك ثلاث شوارع متوازيه فيها راح تكون تجمعات المطاعم التركيه بكثره والعربيه كذلك وان كنت ستسكن في فندق المطار يعني هالشي انك بتقطع فقط المسافه بين المطار والمحطه الريسيه اللي هي ماتتجاوز ربع ساعه بالقطار على الاكثر ولو اشوف من الافضل انك تستاجر بفندق في سنتر المدينه اضن بيكون ارخصلك بكثير من فندق المطار وبنفس الوقت تكون قريب من الخدمات من مطاعم ومحلات عامه
وبكل حال من الاحوال لا تنسى تجيب معك مثل ما ارسلتلك بالرساله ملابس ثخينه شوي عن البرد وخصوصا قمصله او بالطو فيه قب للراس لان اليومين اللي طافو كان في برد وريح شديده ولكن الثلج في فرانكفورت هذي السنه للحين ماشفناه غير يوم واحد بس

وعليكم السلام
اولا أشكر لك ردك وإهتمامك أخوي ابابيل , وبالنسبة لسؤالي كان قصدي المطاعم الشعبية الألمانية اللي تقدم الأكل الألماني
الشعبي , والفندق الحقيقة الدورة راح تكون في المطار لأجل هذا تم الحجز لنا في فندق بارك إن ويقولون أنه جديد وجيد
وأهم شي قريب من المطار ومتوفر فيه المواصلات من وإلى المطار مجانا
والحقيقة انك خوفتني من الجو يعني ما أقدر أتمشي بعد الدورة اللي تخلص تقريبا الساعة 4 بتوقيت فرانكفورت وحسب
ما فهمت منك سابقا انه ممكن الذهاب يوميا لوسط البلد لقرب المسافة , وهل يمكن زيارة المتاحف وحديقة الحيوان
وزيارة البلدة القديمة في مثل هذا الجو
وتقبل تحياتي

بالعكس ياخوي
انا قلتلك تجيب ملابس معاك من هالنوع عشان هالسبب لان البروده هني عمرها ماكانت عائق لحركه الناس ونزولهم للسوق ولكن يجب ان اخذ الاحتياط بالملابس المناسبه اما تخوفك من البرد بيكون عائق فهذا الشيء نهائيا غير موجود وان شاء الله الاسبوع الجاي بتكون في فرانكفورت وفي التسايل وبتشوف بعينك زحمه الناس في التسايل سواء خلال النهار او حتى لساعات الليل
اما بالنسبه للمطاعم الالمانيه الشعبيه التقليديه فهي موجوده في الجانب القديم من فرانكفورت اللي اسمه ساكسنهاوزن هناك بتدخل مطاعم من ديكوراتها وطاولاتها وكراسيها وكل شي فيه بتحس انك في القرون الوسطى وابشر حتى اطباق الاكل والسكاكين والملاعق فهي من خشب وقديمه تقليديه والاكل الالماني يعتمد بالدرجه الاولى على قطع ستيك اللحم والبطاطا ( الالماني الاصلي الوجبه الي مافيها لحم ما يعتبرها وجبه)
بالمناسبه ارسلت لك ايميل على الخاص مدري ان كنت شفته ولا لا