- http://www.ryanair.com/en
- حجز الفنادق
- التنقلات
- حكايتنا مع فيزا الشنغن والسفارة الأسبانية
- ولكن !
بسم الله الرحمن الرحيم..
بعد تخطيط دام شهرين كانت رحلتنا إلى أسبانيا القصيرة في مدتها والحافلة في محتواها ولله الحمد وحتى ما أطيل عليكم بأقسم الموضوع إلى حلقات .. وانزلها على السعة
معلومات عامة
من موقع الخطوط القطرية بقيمة 2944 ريال للشخص الرياض - برشلونة - الرياض
القطرية -المملكة العربية السعودية http://www.qatarairways.com/sa/ar/homepage.html
من موقع خطوط ryan air برشلونة - ملقا - برشلونة بقيمة تقريبية 90 يورو للشخص (ولنا ذكرى أليمة في هذا الموضوع تجيكم بالتقرير إن شاء الله)
http://www.ryanair.com/en
حجز الفنادق
تم من خلال موقع بوكينق اللي أثبت انه الأفضل من جميع النواحي في أوروبا بالذات ويكفي خريطة الاوتيل اللي توضح موقعه والخيارات المتاحة بالقرب منه والمعالم السياحية ومحطات القطار وكل التفاصيل الدقيقة بشكل سهل وبأكثر من لغة
وسيتم ذكر تفصيل الفنادق إن شاء الله تباعاً في التقرير ..
https://www.booking.com التنقلات
بالقطار والباص والمترو .. وكلهم ممكن شراء تذاكرهم إما في نفس المحطة أو بواسطة أجهزة الكترونية والتعامل معها سهل ما يحتاج إلا لغة إنجليزية + بطاقة إئتمان أو يوروات قروش أضمن لأن بعض الأجهزة ما تقبل العملة فئة خمسين يورو .. وممكن تقبل العشرة والخمسة .. والباصات داخل المدينة تشتري تذكرتها في الباص نفسه وغالباً ما يقبلون إلا قروش موب فاضي السواق يصرف والا يسوق والا يركب الناس
- سعر صرف اليورو = 5.02 ريال .... ذابحتني الدقة ^_^
- الحلقة الأولى *
حكايتنا مع فيزا الشنغن والسفارة الأسبانية
تم الاتصال برقم السفارة في الرياض 4880606 قبل موعد السفر بشهر .. وسألتني الموظفة عن موعد السفر وحددت لي موعد لتقديم الأوراق قبله ب 17 يوم بالضبط وكان بأيام العشر الأواخر برمضان الله يشرفه... رحت ومعاي الأوراق المطلوبة وهي:
- استمارة طلب فيزا شنغن
- صورتين ملونات بدون شماغ للرجل وبالحجاب عادي لحضرتي
- الجواز طبعا وصورة منه
- كشف حساب أصلي مختوم من البنك (بالنسبة لي حسابي في بنك الأهلي وطلبوا 15 ريال رسوم الكشف)
- تعريف من جهة العمل فيه الراتب والمسمى الوظيفي ويفضل رقم الجواز باللغة الانجليزية
- تأمين طبي يغطي فترة السفر وأخذناه من التعاونية للتأمين بقيمة 184 ريال للشخصين لمدة أسبوعين
بعد ماجلست أنتظر دوري .. كان فيه توقيع ناقص باستمارة الطلب ونبهني له السكيورتي الهندي .. اللي مسنتر عند الباب .. وقعته في استمارتي وقلت شكرا .. المشكلة الحين استمارة زوجي اللي ماجا معي وش الحل معها؟! كل شوي أطالع في السكيورتي أبي أتغافله وأوقع عنه بس ماش الرجال فوق راسي ومتابع تحركاتي .. والله الوهقة .. قلت خليني في السيف سايد وإذا رحت عالكاونتر يحلها ربي .... لما جا دوري شيكت الموظفة الأوراق ولا تكلفت تقرا طبعا وراها ناس وزحمة فتسأل كم يوم بتقعدون؟ وش المدن اللي بتزورونها .. وتسجل .. ولما طلت على الورق شافت اوراقي كاملة .. وابتسمت مبسوطة كل ما طلبت ورقة لقتها جاهزة .. وانا اقرا في نفسي ( وجعلنا من بين ايديهم سدا ومن خلفهم سدا فأغشيناهم فهم لا يبصرون )
ولكن !
شافت التوقيع الناقص بورقة زوجي قالت هاه وين التوقيع؟ قلت يابنت الحلال مادريت الا هنا .. وش دعوة يعني بيعيي لا يوقع وانتم ديرة كرم وجود وتهلون بالضيف
قالت ماينفع لازم توقيعه .. قلت المشكلة انه موب موجود الحين واحنا متأخرين اصلا بموعد تقديم الاوراق يالله يمدي على الفيزا قبل موعد السفر ... قلت ماينفع اوقع واكتب بالنيابة عنه؟ قالت لا لازم توقيعه هو ...
طالعتني وقالت -وهنا تنحت وبلمت وطلعت مليون علامة تعجب على راسي- قالت
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
تقدرين تقلدين توقيعه ؟
قلت ماشاءالله اثركم سهالات وانا على بالي اخاف يكفشني الهندي وانا أزور التوقيع !!
قلت افا عليك ابشري ووقعت توقيع موب يم توقيعه من الخبصة خفت تهون ههه
طبعا عشت في قلق أول الوقت خفت يردون الطلب لاختلاف التوقيع .. بعدين قلت يابنت الحلال دام موظفتهم مشتها بيمشونها ان شاءالله ..
دفعت رسم الفيزا 280 ريال للشخص وعطتني ورقة استلم فيها الجواز من بكره..
الحين بدا الأكشن الثاني.. كان المفروض موعد استلام الفيزا بأيام العيد والسفارة بتكون مقفله ... قالت لي الموظفة راح نفتح يوم الاربعاء 15 سبتمبر.. قلت أكيد.. قالت أكيد .. وحطي ببالك اننا نقفل الخميس والجمعة يعني ماعندك فرصة لاستلامها الا بهاليوم والسفر يوم 17 سبتمبر.. قلت خير ان شالله..
لما مر أسبوع من التقديم مدري وش خلاني أتصل بالسفارة أبسأل عن مدة الفيزا كم بتكون بالضبط لأني ناوية أزيد يوم للرحلة وخفت يصيرون نحيسين ومخلين المدة باليوم بالضبط .. واصلت مانمت لين صارت الساعة 9 خفت تروح علي نومة وما أحد يرد علي .. ولما ردوا قلت خل أسأل أول عن مواعيد الدوام في العيد .. إلا صدمتني اللبنانية قالت بنداوم السبت 18 سبتمبر!! قلت قولي غير هالحكي
قالت وش عندك قلت مفروض أستلم الفيزا قبل وسفري الجمعة ان شاءالله .. قالت انتظري اجل وحولتني على أسباني اسمه رفاييل ماقصر فزع ودور خبر الفيزا قال شوفي يابنت الحلال كلمي يوم الاربعا 8 سبتمبر.. وهو آخر يوم دوام قبل العيد .. شوفي لو كانت طالعة تعالي استلميها .. قلت اوكي ... وأنا متأكده انه دعى على اليوم اللي عطاني فيه وجه ههه غثيته دقيت عليه الثلاثاء من 9 الصبح قلت خل يدري اني حريصه ويتابع الموضوع .. لما رد وقصيت عليه سالفتي قال.. انا ما قلت لك دقي الاربعا؟
طاح وجهي على خفيف بس قلت ياخي وذكر فإن الذكرى تنفع المؤمنين وش يضرك لو شيكتها اليوم لعلها طلعت وأستلمها طازة
شيك وقال لسه ماطلعت .. جاني إحباط بس قلت نصبر لبكره وإن شالله خير
قال بس عندي لك خبر سار .. ان السفارة بتفتح يوم 15 سبتمبر قلت كويس... بس لأني قريت من بعض الأعضاء انهم رجعوهم كم مرة بحجة ان القنصل ماوقعها خفت يعطلوننا حنا بعد ومافيه وقت ..
جا يوم الاربعاء آخر يوم دوام لهم برمضان ونفس الشي مواصلة وحالتي حالة مانمت ليلتين بس قلت لو ماطلعت وهذا الاحتمال الكبير بنام نوم عميق وأعوض .. دقيت ورد رفاييل .... وش تتوقعون قال؟
.
.
.
.
.
.
.
.
.
.
.
.
.
.
.
.
.
.
.
.
.
تتوقعون رحنا والا ما رحنا ؟؟
.
.
.
.
.
.
.
.
.
.
.
.
.
.
.
.
.
.
.هذا ما ستعرفونه في الحلقة القادمة
السفارة متساهلين أحياناً، فقد وقعت عن كذا شخص بمعرفة الموظفة. أما الهنود فمساكين، أعتقد
بأنهم لم يصدقوا أن يجدوا الفرصة التي يفرضوا فيها بعضاً من هيبتهم ! و للأمانة، فهم متعاونون.