- عالعموم ، الانترنت في الغرف بالكيبل وتحت باللوبي واير لس ومجاني طبعا
السلام عليكم جميعا
اليوم الاحد وبحمد الله وحفظه وصلنا الى تركيا وبالتحديد اسطنبول
3 شباب عزوبية
خلصنا امور الجمرك والعفش والفيزا سريع سريع وماطولنا الحمدلله
جينا الحين على سالفة السكن ..
طبعا حنا لا حاجزين ولا شي .. لكن على اخذنا على توصيات الشباب هنا في المنتدى
رحنا لمكتب من المكاتب السياحية اللي في المطار مباشرة " اخر مكتب عاليسار _ اكبر واحد _ avis "
ورحنا نسأل ونستفسر ويمين ويسار وقلنا له نبي فندق سنترال بلاس
وقام يمدح ويمدح ويمدح في الفندق
وبعدين جينا في الجد ، بكم السعر .. ؟
قال لنا 210 دولار لغرفة تربل " يعني ثلاثة اسرة ل 3 اشخاص "
انصدمنا طبعا بالسعر ، وعلى قولة الشباب من هنا ان سعرها الدبل هو 110 دولار
قمنا نفاصل ونكاسر ونشلخ معاه في السعر
بالاخير قلنا له ب 180 دولار بناخذها ، قام قال اوكيه يلا عشانكم ومادري ايش اوكيه
المهم ، خذونا في هالبويص الصغير " بويص تصغير لباص " للفندق
موقعه احلى مافيه بكل صراحة ، في قلب تقسيم كما قالوا الشباب
الغرفة ، بكل صراحة توقعناها افضل ، والمكيف حار ، نادينا عليهم ، قالوا لنا هذا طبيعي ، كذا هو المكيف :112:
حنا حجزنا حق ليلتين في هالفندق مؤقتا عشان نرتب برنامج الرحلة الجهنمية
عالعموم ، الانترنت في الغرف بالكيبل وتحت باللوبي واير لس ومجاني طبعا
طبعا طلعنا بالليل تمشينا في هالجو العليل اللي يرد الروح " مع ان التركي يقول لنا اليوم الجو موش ولا بد " ومشينا شارع الاستفلال " انواع الزحمة " وبعدين تعشينا وشيشة ورجعنا هذا الموتيل " لانه صغير من جد مره "
هذا باختصار مجريات رحلتنا لليوم الاول " سعودية - جسر - بحرين - دبي - اسطنبول - سنترال بالاس "
انتظر نصايحكم ومشوراتكم ياغالين وارائكم اللي اكيد مانستغني عنها
اهم شي ماتكون نكبة " مزحة "
..:: تحياتي ::..
لكن تبي ترتاح تعامل مع شركة المرجان للسياحة عراقيين محترمين، ويجيبون لك أسعار فنادق جيدة، والا شف موضوع لقنوع يمدح واحد دله عليه الباب العالي، واياني واياك تفكر تاخذ شقق تراها كمين النصب بتجربة عدد من الاشخاص.
أما البرامج السياحية والر حلات فلا تتعامل مع احد ترا الاسعار تتدبل عليك عندك هالمنتدى المبروك خذ أسماء الأماكن الزينة واركب تكسي وقل له اسم المكان اللي تبيه واتفق على السعر مسبقا أو خله يشغل العداد لكن انتبه لا يغشك بعداد الليل ( دبل القيمة ) وان ما قدرت تفهّم التكسي وين تبي اطلب اسم المكان من الشباب هنا بالحروف التركية واكتبه بورقة. مع تحياتي وتمنياتي لك بالمتعة ، ولا تنسانا من تعليقاتك وآرائك وصورك.
أخوك العماري