السلام عليكم
اول شي الله يوفقج و يفتحها عليج و رحله سعيده ناجحه باذن الله
ثاني شي لازم تحطين في بالج اذا انتي رايحه تيبين بضاعه ان لندن غاليه مو رخيصه .. و الاشياء الرخصيه اللي فيها بتكون اشياء عمليه عاديه ..
ثالث شي .. بالنسبه للاسواق الرخيصه عندج الاوت لتات .. اشهرهم و اكبرهم بيستر فيلج Bicester village
خاصه تلقين فيه اشياء تتلقط حلوه و اسعارها مناسبه .. مثلا روحي رالف لورين بولو بتلقين اشياء نص سعر الخليج و ليلحين موجوده ..
عندج هاكت للملابس الرجاليه و الاولاد شغل حلو و يحبونهم الصبيان .. قوتشي ببيستر فيلج وايد تلقين فيه اشياء رخيصه و يديده خاصه البواكه و الاكسسوارات الصغيره ..
ايضا UGGS و جوسي كوتيور و مايكل كورس و دكني..
بيستر فيلج فيها محلات وايد و بتحصلين اشياء وايد ان شاء الله
غير البيستر فيلج .. في اوت لتات ثانيه بس تكون فيها محلات عاديه مثل مارك سبنسر و قاب و نكست بس اشياء عاديه و ارخص يعني ماعتقد بتييبين من هالمحلات بضاعه ..
انصحج بمحلات Abercrombie و Hollister و Gilly hicks .. مو موجودين بالخليج و الشباب يشترونهم بهبل ..
حاولي تيبين اشياء اللي تكون Exclusive المحلات او الماركات اللي موموجوده بالخليج اكثر من انج تركزين علي الارخص .. عندج ماركه trish عجيبه و urban decay للميك اب .. و عندج ايضا تكرمين جواتي TOMS
اخذيلج فره بموضوع مشتريات البنات من الخليج و شوفي الاشياء اللي ايبونها من لندن ..
طبعا انتي لي رحتي هناك و شفتي السوق راح تعرفين شنو تاخذين ..
بالنسبه للسكن .. متى وقت السفر ان شاء الله ؟ و هل محتاجه فندق او شقه ..
مكاتب الشحن شوفي هالموضوع
https://artravelers.com/p/re/531338
و حاضرين باي استفسار

aLKuwaitia
اشكرج اختي كويتيه ويمال العافيه على هالمجهود الطيب معاي انا بسافر باذن الله15/7 الى23/7 اذا الله سهل بس بعرف البيستر فيلج اشلون اوصل لهوالاوت لت شنو يعني اشكثر اسمع فيه ياليت ادليني وياليت بعد اذا عنج خبره شنو الاشياء اللي يجيبونها من لندن مو موجوده عندنا حق البنات و Abercrombie و Hollister و Gilly hicks وهذي المحلات وين مكانها بالضبط؟

بيستر فيلج اهوه الاوت لت .. تروحين بالباص او تاكسي لي محطه مارلبون .. و هناك تقصين تذكره تقولين له لي بيستر فيلج مع الباص يعطيج تذكره شامله القطار لي بيستر فيلج و اول ما تنزلين من القطار في باص صغير كل الناس بتركبه يقطج عند السوق الفيلج بالضبط ..
Abercrombie هم اسهل وصف .. تروحين الريجنت ستريت .. توصلين لي محل مانجو و الياباني .. في الجهه المقابله لهم علي طول جبال مانجو في سكه دشي فيها امشي شوي تلقين مطعم Napket و ستاربكس علي طول عقبهم ابركرومبي .. و لو تسالين اي تاكسي ذاك الصوب بيوديج ..
Hollister و gilly في مجمع الويست فيلد
الاشياء اللي موجوده في لندن مثل ما قتلج شوفي ماركات المكياج اللي مو موجوده و لما تتمشين هناك بتعرفين و تشوفين اشياء وايد .. و انتي البضاعه اللي ناويه عليها شنو بالضبط ؟ ملابس؟ نسائي؟ يهال؟ اكسسوارات؟ مكياج؟ جناط؟ شنو بالضبط؟
بالنسبه للسكن .. جم فرد و اعتقد دام اسبوع واحد فندق افضل و جم ميزانيه السكن

ياليت الاخ موادع 1 والمسافر الصغير والمشرفين بهالقسم يساعدون اختهم بالله والله يرزقكم من حيث لاتعلمون آمين

اختي كويتيه بس قاعده وادعي لج لاني محتاجه احد يساعدني والبضاعه ابيها تساعدني نفسيا اكثر من ماديا يعني اشغل نفسي بعد ذكر الله طبعا بشي مفيد وغريب لان تعرفين الكل يجيب بضايع من تايلند والصين بس نادر من لندن وخصوصا لندن كل شي فيها جديد وحلو وغريب وابي البضاعه مشكله ملابس اطفال وملابس نسائيا وكريمات واذا شفت اي شي غريب وموموجود عندنا وما استغني عن ارشاداتكم بس اهم شي ابي المحلات اللي اسعارها حلوه وتكون بره لندن وماقصرتي

للاسف ما عندي خبره في هالامور ..
بس مثل ما قالت كويتيه اذا تبي ماركات روحي بيستر فيلج وبعد في اوت لت نسيت اسمه اعتقد اشفورد او شي قريب منه ..
وفي ايام تصير تنزيلات قويه في المحلات العاديه في اكسفورد .
القي نظره على هارودز ,, يبيع اشياء جميله وسعرها مناسب مثل الشنط والمحافظ والشاي والعطور .... الخ
وسيلفريج نفس الحاله ..
وبالتوفيق

الماركات العالميه في لندن موجوده في الاتي:
هارودز
سيلفريج
هارفي نيكلز
شارع سلون
شارع بوند
شارع الرجنت
شارع اسمه كينغ
شارع اكسفورد هو شارع التسوق الرئيس يوجد فيه كل الماركات العاديه المتعارف عليها في كل مكاان ..
انصحك بالسيلفريج والهارودز يوجد بها معظم الماركات
وماقصرت خبيرتنا بخصوص الاوت ليت
ونحن في خدمتكم

أسمحيلي على التأخير ما قصرو الخبراء ومشرفنا
وإذا بغيتى أي خدمه أحنا حاضرين

الله يعطيكم العافيه وابي معلومات عن محل او مجمع اسمه tamtam ومحل اسمه matalan fahion وابي بعد صيدليه مثل boots اللي عندنا بس اكيد بلندن غير وانا طمعانه بالمزيد وعساكم على القوة