وحيد22
16-06-2022 - 12:09 am
العلم و الله سلامتكم ما كنت ناوي أكتب عن هالموضوع لكن و الله انه محّرق على كبدي :112: و من شان ماأحد يطب (فالسرقة) اللي طبيت فيها المهم لا أطول عليكم أخت العيال بعد ما وصلت الطائف و قلت وينك ياتلفريك الهدا و ماشاء الله الشلة اللي معي 12 نسمة و يوم وصلت عند الموظف ابقص التذاكر قالي النفر بعشرة تذكرت مطعم البخاري وقلت يابلاش لا وبعد اللي أقل من 6 سنوات بلاش بصراحة قمت أتلفت يمين و شمال أدور اللي يتكلمون عن غلو الأسعار عندنا المهم أخذت سبع تذاكر بسبعين ريال عدا و نقدا و فوق البيعة خمسة ورعان و ندخل و حدك لين اتدخل رجلك اليمين بس ويبدأ مسلسل الكر و الفر في سرقة جيوب البشر
يوم دخلنا و الا فيه سرا و ناس تقص تذاكر وش السالفة يالربع قالوا أبد التذكرة للكبار بثمانين ريال أنا سمعت التذكرة بثمانين ريال و معي سبعة ما شاء الله ضيعت حتى قيمة التذكرة للصغار المهم انها حول الأربيعين ريال
و أرجعلك على صاحبنا اللي قصيت من عنده تذكرة بعشر ريال للنفر كما صرح سعادته وش السالفة يا(قصير) العمر ليش التذاكر اللي أخذنا من عندكم طلعت بس عشان تمسك سرا على التذاكر الحقيقية و الله ياجماعة اني وقفت مصدوم ماني مصدق يعني ضحك على البشر وبكل وقاحة المهم صاحبكم قفلت معي مرة وحدة قلت هذي تذاكركم وردو على فلوسي.....
وطبعا ممنوع استرجاع التذاكر بعد قصها ويبدأ الفصل الأخير من المسرحية الهزلية من الموظف المسؤول عن قص التذاكر و انتهاء بمدير لايفقه ما تعنيه كلمة سياحة و أخيرا رميت تذاكرهم عليهم و السبعين في بطونهم ولا أمسيت إلا في مدينتي
و نقول عاشت السياحة الداخلية :x1:
مثل هالمهازل كثير في جميع المناطق
مثل المدن الترفيهيه يقول لك فقط اجعل أطفالك يستمتعون ب 10 أو 15 ريال للشخص الواحد!!
تروح يقول لك سعر الدخول فقط 10 او 15 , وكل لعبه لها سعر, و الجلوس بسعر , وماتطلع الا وانت دافع 300 ريال على كم لعبه مهترئه تفتقد للصيانه
هذه القضية وقضيتك والعديد من الآمور الاخرى من المفترض ان تطرح أمام الآمين العام للهيئة العليا للسياحه الآمير سلطان بن سلمان لنرى ماهي السياحه الداخلية التي تطالب فيها الهيئة وهي لم تفعل شيئ حتى الآن لآزالة العقبات الموجودة مثل الآسعار ومثل قلة وجود منشئات سياحية , وعدم حل قضية منع الشباب من الآستفاده من السياحة الداخلية , وتقليل سعر التعرفة والتكاليف على المنشئات السياحية وغيرها الكثير من الامور التي تقف الهيئة عاجزة امامها
تحياتي لك: سلطان الشرقية