يا حماعه نبغي الجدول،،،

شوف انا بعطيك افضل واحسن الأماكن وانت شووف وززبطها براحتك لأن الفترة طويلة نوعا ما....
السكن الي انت فيه تراه شقق فندقية
الكافيهات :
لي دووفيل
الفوكيت
مونتي كريستو
هاجن داز
المدريقال
المطاعم العربية :
نورا
الديوان
العجمي
شتورا
دييب (صيني)
بيتزا بينوو
انتركوت ( استيك الخ ...)
بودا بار ( كل شي عندهم )
فيه مطعم ايراني في الشانز اليزيه في الشارع الي مقابل الماريوت
اماكن سياحية :
ديزني لاند
هضبة مونمارت
برج ايفيل
نهر السين
منطقة سان ميشيل ( الحي الاتيني)
منطقة الشاتليت
الاديفانس
قوس النصر
المونبرناس ( مبنى ضخم يتكون من 56 دور تشوف باريس كلها )
بروكسل ( عاصمة بلجيكا تقدر تروحها اول النهار وتستغرف تقريبا ساعة وترجع اخر الليل لباريس )
متحف اللوفر
متحف الشمع ( اسمه جريفين )
مسرح الليدو ( في الشانز)
ساحة الكونكود ( المسلة المصرية )
اكوابارك ( مول كبير وفيه مكان للسباحة حلو)
ام هذا الي ببالي حاليا وان شاء الله الاعضاء ماراح يقصرون معاك بالباقي
شووف انت قسمها على راحتك
مثلا تخلي كل يوم تزور مكانين او ثلاث
تقبل مروري اخوي وسامحني ع القصور

يزاك الله خير،،،ومشكور اخويه،،،

اخوي اول شي فرحتني ان الفترة 10 ايام يعني نقدر ناخذ راحتنا في البرنامج لان اغلب الاستفسارات الاخيرة تكون على فترات بسيطة ، 4 ايام ، 5 ايام ، و باريس اقل شي فيها اسبوع الى 10 ايام ... و ما تشبع منها ..
بالنسبة للبرنامج الاخ حمودي ما قصر اختصرلك اهم الاماكن في جدوله ، بس ياريت لو توضح اهتماماتك عشان نرتبلك جدول يناسبك .. و انا اقترح بما ان الفترة طويلة ، تزور بروكسيل في رحلة يوم واحد ، سواء عن طريق شركات سياحية ، او تروح انت بالقطار و ترجع في نفس اليوم .. و ممكن تطلع على سويسرا يوم و ترجع ، تشوف جنيف و المدن القريبة منها ، في رحلات في جنيف توديك 3 مدن في نفس اليوم و ترجع جنيف ، طبعا جنيف تبعد عن باريس 3 ساعات و نص، عشان كذا لو فكرت تروحلها اقل شي تقعد فيها ليلة ..
و طبعا في فرنسا عندك المناطق الريفية رائعة ، ممكن تاخذلك كم يوم في الريف الفرنسي و ترجع لباريس ، و ممكن تزور بعض الاماكن القريبة من باريس مثل قصر فيرساي ، قلعة سانت ميشيل ، في قصور كثيرة و متاحف خارج باريس تروحلها مع شركات سياحية .. طبعا ما ننسى ديزني الي ممكن تقعد فيها يومين لو معك اطفال ، او تقضي فيها يوم كامل و ترجع لباريس .. عندك بعد قريب من ديزني الاوت لت ( لا فالي فيلاج ) قرية التخفيضات ، ياخذ منك يوم كامل مع المول الي عنده ..
كل شي يعتمد على اهتماماتك و اهتمامات الي بيسافرون معك .. و احنا بنرتبلك احلى جدول بكل التفاصيل و جدول خاص بالميترو بعد ..
بانتظارك

تسلم اخويه على جوابك لي ما تقصر والله،،،
عجبتني فكره الريف الفرنسي ،،، كيف اروح له وكم يبعد عن باريس!!!
وهل جنيف تستحق الزياره !!!
وكيف جوهم الحين،،،!!!
تخيلها السفره سفرتك و تخيل نفسك مضغوط من الشغل و ودك تصرخ في باريس ههه احلى تشبيه،،،
عطني جدولك ورتب لي الجدول،،، ربي يحفظك ويرزقك الجنه يارب،،،

اخوي جنيف و كم مدينة في سويسرا تروحها مع باصات شركة key tours الموجودة قريب من النافورة ، لو تسال عنها اي كونسيرج في الفنادق الموجودة في جنيف يدلك وين توقف الباصات ، عموما جنيف صغيرة و المنطقة الي قدام النافورة هي اجمل منطقة للسكن ، جرب الكمبنسكي ، خذ فيه ليلة و روج جنيف من الصبح اول قطار و ارجع ثاني يوم بعد الظهر ..
انا رحت في يوم 3 مدن في سويسرا بس تشوف اهم المعالم في كل مدينة .. هذا موقعهم و ممكن تشوف الرحلات المتوفرة حسب تاريخ سفرك ، http://www.keytours.ch/

بالنسبة للريف الفرنسي يفيدك فيه اكثر المشرف ابو فواز ، لاني ما رحتله قبل كذا ..
اما بالنسبة لجدول باريس ، لو نقول بتقعد فيها 7 ليالي ، و الباقي في جنيف
اليوم الاول خذلك لفة بالباص الاحمر ، و شوف اهم معالم باريس ، و انزل عند المكان الي يعجبك ، و اركب مع الباص الي يجيك في نفس المكان كل نص ساعة
https://artravelers.com/p/re/276116
طبعا اهم الاماكن الي تنزل فيها اول يوم هي الشانز ، ساحة الكونكورد ، برج ايفل ، و من البرج خذلك قارب في النهر
اليوم الثاني روح لقصر فيرساي ، من الصبح بدري لانه بعيد ، وفيه 3 قصور ، غير الحديقة ، و المزرعة ..
انصحك تروحله مع شركة سياحية اسمها paris vision مع مرشد سياحي ، عشان تعرف تفاصيل القصر و الاحداث الي صارت فيه ..
هذا موقع الشركة ، و هي رائعة بصراحة ، و توديك كل مكان في باريس ، http://www.parisvision.com
اليوم الثالث روح المونتمارتر ( كنيسة القلب المقدس ) هي هضبة تشوف منها كل باريس ، منظر ولا اروع بصراحة ، و تحت الهضبة في حي الرسامين ، منطقة جميلة جدا و فيها مجموعة من المطاعم و المقاهي ممكن تجلس فيها 4 ساعات
اليوم الرابع روح لديزني من الصبح بدري و اجلس هناك اليوم كله
اليوم الخامس خليه للاسواق ، ابدأ من الصبح بمحلات الشانز و اتغدى في الشانز و بعدها ممكن تروح جالاري لافاييت ، مجمع البرنتان ، و تمشي في نفس المنطقة هذه ، اسمها الاوبرا ، كلها اسواق و محلات تجارية
اليوم السادس ممكن تطلع على بروكسيل بالقطار و ترجع في نفس اليوم .. او تروح مع الشركة السياحية الى بروج في بلجيكا و ترجع في نفس اليوم
اليوم السابع لو عندك فيزا بريطانية ، هذه الشركة السياحية تسوي رحلات للندن يوم واحد و ترجع في نفس اليوم
او ممكن تروح لمتحف اللوفر و الحديقة الي عنده ، و بالليل تسهر في الشانز
ممكن تروح متحف الشمع و منه للحي اللاتيني و كنيسة نوتردام
في اماكن اكثر في باريس بس هذه اهمها ، عندك منطقة اللاديفانس ، انصحك تسكن فيها ..
و في قرية التخفيضات ( لا فالي فيلاج ) الي عند ديزني ، و المول القريب منها اسمه فال دي يوروب

والله ما قصرتوا معايه شكرا من القلب،،،
جزاك الله خير ،،،
وانتظرورني ان شاءالله في التقرير،،،