ياهلا فيك مليون ومايكفون
سيلانقور - لنكاوي - بينانق - كوالا ومنها يوم لجنتنق
لاتحرم نفسك من لنكاوي ولا من بينانق لان كل مدينه لها وضعها ولها اسلوبها
انا في بينانق حاليا انتظر الباص رايح لكوالا ياهي اجواء في ماليزيا جنان روعه
عز الله انك بتنبسط
التنقلات انا رحت من سيلانقور الى لنكاوي عن طريق اير اسيا
ومن لنكاوي الى بينانق برضو اير اسيا
والحين من بينانق الى كوالا بباص ايرولاين vip
بالنسبة لسيلانقور انصحك تسكن بالبراميد لان لو رحت فندق ثاني لازم تكسي لكل تنقلاتك والتاكسي غالي في هالديرة
واما المدن الثانية التكاسي بالهبل ورخيصه وبالاتفاق بالساعه
الفنادق اللي سكنت فيها كلها ممتازة واسعارها معقولة
فندق البراميد سيلانقور
فندق فور بوبيت لنكاوي
فندق بارك رويال او هوليدي ان بينانق لانها جنب بعض واحسه افضل مكان
فندق دورست ريجنسي كوالا
وبالتوفيق وعسى يكتب لك سفره سعيدة اقوى شي

يامراحب فيك يامبارك وعسى ربي يبارك لك في حياتك ويوفقك
كم تكلفة التنقل ..؟
1- من سيلانقور الى لنكاوي عن طريق اير اسيا
2- ومن لنكاوي الى بينانق برضو اير اسيا
3- من بينانق الى كوالا بباص ايرولاين vip
وماهي افضل طريقة لتقسيم الايام ع المناطق .؟
واسعار السكن يامبارك كيف بحكم انك في ماليزيا الحين عسى ربي يهنيك بالرحله وييسرها معك
وانا ماعندي بطاقة فيزا عشان احجز عن طريق النت
ومامعي الا عن طريق المكاتب السياحيه الا اذا تشوفون احجز لمن اروح هناك
وينكم ياعربنا المسافرون

ياهلا بك ... ومرحبابك ... يالحبيب
عندك ياغلاهم ( 12 يوم ) صافي ... من غير يومي الذهاب والعودة
وهذا الجدول الأجمل بصراحة
يومين سلانجور ... فندق البيراميد
ثلاثة أيام لنكاوي ... فندق البلانجي بيتش
ثلاثة أيام بينانغ ... فندق البارك رويال
أربعة أيام كوالا ... فندق الرويال شولان
طريقة التنقلات بين المدن :

• من سلانجور إلى لنكاوي ... طيران air asia والمسافة ( 50 دقيقة )
• من لنكاوي إلى بينانغ ... الطيران ( 40 دقيقة ) ... أو العبارة البحرية ( ثلاث ساعات )
• من بينانغ إلى كوالا ... الباص ( نايس ) بسعر ( 74 رنقت ) والمسافة أربع ساعات ..

توجيهات "

• أنصحك تحجز من النت ... وراح توفر كثير بأذن الله
• سعر تذكرة الطيران للشخص ( 160 رنقت ) من النت ... وطبعا من المكتب ( دبل )

هلابك يالمستعجل
ياخوي ترى النت سهل جدا طلع الفيزا او شوف احد من اقاربك معه فيزا واحجز منها ترى الموضوع سهل جدا
تحجز كل شي وانت جالس على الجهااز من الألف إلى الياء وبسهوله ماتتصورها
لان المكاتب للاسف راح تعطيك بكج غاليه كثير

هلا والله يالوافي
توزيعك للايام مميز مثلك واعجبني كثيير وان شاء الله هو المعتمد
وش رايك لو سحبت يومين من ايام كوالا واضفت جنتنق أو يوم واحد أم اكتفي بزيارتها من كوالا والعودة بنفس اليوم
وشلون احصل على ارقام سائقين ثقه
ومثل ماقلت الحجز عن طريق اسهل وافضل ولكن ماعندي فيزا وبحاول اطلب اذا هم بيعطوني بدري
لأن الوقت ضيق والرحله جت مستعجله وبتكون الثلاثاء بمشيئة الله
ولو حجزت اول يومين عن طريق المكاتب السياحيه وباقي الايام احجزها لمن اوصل هناك من المطار
هل احصل على اسعار مناسبة ولا لا
والف شكر لك ياوافي الوافي ياوفي

يامرآآآحب يالمنصور منور يالغلا
كلامك سليم لكن معي عقدة من الفيزا وبحاول اطلب من البنك اذا هم بينجزوني بسرعه
وياعنك من يوم ارجع ان شاء الله بالسلامه لالغيها تعرف
اعاني من فوبيا الفيزا خ
منورني يالغالي بطلتك ولاعدمتك وعساك دوم متعافي وبصحه جيدة

هلابك ياخوي
انت تبع اي بنك..!؟
يالغالي فيه بنوك عندهم بطاقة فيزا مسبقة الدفع موب اللي خبرك
تعني تكون فاضيه مافيها رصيد وانت تحول لها من رصيدك الجاري المبلغ اللي تبي ورسوومها رخيصه مرره حتى فيه عروض عليها من بعض البنوك مجانيه
انصحك فيها انا بعد مثلك عندي فوبيا فيزا
وبعطيك معلومه حتى لو اخذت فيزا من احد اصدقائك او اهلك وتكون حجوزاتك كلها مسترده ترى ماراح يسحبون الفنادق منها اي مبلغ إلا لما تجيهم
يخيرونك بين انهم يسحبون المبلغ من الفيزا او تعطيهم كاش
يعني الدعوه بسهوله جدا
اعرف الراجحي والاهلي عندهم بطاقات مسبقة الدفع يعني تحط فيها الرصيد بكيفك

الله يعطيكم العافية وماقصرتوا بس أبي أعرف أسعار التذاكر من:
1-سعر التذكرة من سيلانقور الى لنكاوي
2-سعر التذكرة من لنكاوي الى بياننغ
3-تكلفة الباص من بياننغ الى كوالا
4-تكلفة التاكسي من كوالا الى جنتنق