- السلام عليكم ورحمة الله وبركاته وبعد
السلام عليكم ورحمة الله وبركاته وبعد
اليوم بتكلم عن رحلتي الى البقاع البعيده الى الطبيعة الجميلة إلى نيوزيلندا الحبيبه وبالتحديد الى كرايستجيرج وبالتفصيل الممل من الألف الى الياء بس قبل ما أبدا أود أن أشكر إدارة موقع العرب المسافرون ، وبسم الله نبدأ :
في البداية جاء علبالي اني اسافر عشان أدرس لغه انجليزيه فقلت وين ، فكرت في 4 دول كندا ، بريطانيا ، أمريكا و أستراليا ، رحت للمكتب الي بينظم لي كل شي وسألته عن الدول فقالي كنسل امريكا وبريطانيا ليش نتيجة العنصريه هناك هذا على كلام المكتب وبصراحه في بريطانيا انا اعرف ناس هناك يعانون من الشي هذا لكن امريكا مدري عنها المهم قدامي استراليا وكندا اخترت كندا لاني اسمع عن الجامعات هناك انها قويه جدا في التدريس " على اني بدرس انجليزي في جامعه " .
فسبحان الله صدفه يوم من الأيام دخلت على النت وسويت بحث وأجد الموقع هذا الي انا ماكنت داري عنه يالله وشكثر انا استفدت من هذا الموقع بس والله شي ، المهم نيوزيلندا هذي ماني داري عنها فجاك الخطير المايسترو وعرفنا بالدوله هذي ومن بداية ذاك اليوم وانا قاعد افكر في نيوزيلندا وليش ماأروح نيوزيلندا الي بعيده عن العالم والمشاكل حيث الأمان بصراحه انا كنت متخوف من فانكوفر الي في كندا لاني اسمع انها ماهي امنه لذيك الدرجه .
فيوم ورا يوم وانا اقرأ المواضيع عن نيوزيلندا لين سريت على كرايست جيرج خلاص انا رايح لكرايست جيرج وأكلم المكتب ذاك اليوم وأضبط اموري معه وأحول الوجه الى كرايست جيرج .
اخترت المعهد وكل شي بس لمدة شهر ، اذا اعجبني كملت ماأعجبني كنسلت ورحت لغيره طبعا سفرتي هناك 3 شهور فحجزت اوكيه وظبطت اموري .
نجي لموعد السفره وبدايتها المطار وما أدراك مالمطار طبعا كانت رحلتي يوم الاحد 6 june الساعه السادسة مساءً طلعت من الرياض - دبي - سنغافوره - كرايست جيرج . وصلت كرايست جيرج يوم الثلاثاء ، والحمدلله اني وصلت الصبح ولا لواني وصلت الليل كان جبت العيد المهم يوم وصلت وأجي عند الجوازات وأوراقي معي مجهزها حتى ورقة قبول المعهد وعديت من هذي النقطه فيوم خذت أغراضي إلا ذاك الدب التخين يقابلني ويقول معك أي نوع من الاطعمه هو المسؤل عن تفتيش الأمتعه قلتله لا ومشت عدت طبعا أنا ماجبت معي أية أطعمه لأني عارف انهم بيفتشون وبياخذونها مني إلا المحظوظين ، المهم يوم عديت وأنا طالع ألتفت يمين يسار وين الربع مافيه احد ،أنا أصلا داري ان العائله ماراح تستقبلني وفعلاً حصل الشي هذا بكل بساطه خذيت تكسي وعلطول اقرب فندق ويكون في وسط المدينه يوم وصلت للفندق وسألته عن السعر قالي ب 250 دولار الليله اذا ماكنت ناسي فقلت لنفسي وين ابو 70 دولار الي يقولون عنه الشباب والله رحنا وطي كلها كم ساعه وبعود اخذ اغراضي مالها داعي احط 250 دولار عشان ساعه ولا ساعتين طبعاً الفندق هذا فخم مره ، فسألته وقلتله اني انا طالب وأبي سكن طلاب بصراحه الفندق هذا مايجيه إلا السياح قالي رح ل visitor center وهم بيساعدونك رحت وفعلا ابو 70 دولار حصلناه وحجزت وقالتلي طبعا كانت بنت هي قالتلي اطلع مع الباب الخلفي ورح يمين واخر مبنى على يدك اليسار المبنى قريب ماله داعي تاخذ تكسي سمعت كلامها ومشيت وكلها دقيقتين إلاني واصل طبعا انا معي الفاتوره وكل شي وأروح هناك وأحط أغراضي وكل شي وأخذ قيلوله شوي وثم اطلع للمعهد الخائن اللي قالي بنستقبلك وكل شي ، ونسيت شي انا بعد مادفعت للمكتب راسلت المعهد وقلتلهم انا بجي في اليوم الفلاني والساعه الفلانيه وسألتهم عن اشياء اخرى بس للاسف حظي شين ، ايه وين وصلنا المهم يوم وصلت المعهد قلتلهم انا الي من السعوديه فقالو انت الطالب الجديد قلت ايه قالو تو المديره طالعه للمطار
يسلام سلم عقب ايش :112: ..... جت المديره بعد ساعه تقريباً قالت لي انت أول طالب سعودي يجي المعهد وأول طال يجي بدون أغراض وين أغراضك قلتلها بالفندق " في الحقيقه هو ليس بفندق وإنما عباره عن سكن وأغلبية الذين يسكنون فيه من الطلاب أنا مدري وش يسمونه نسيت اسمه " قالت وشلون مايصير وكيف بعد مانسوي لك الاختبار نطلع ونأخذ أغراضك ونرد لك فلوسك ، والله حبوبين اموت فيهم انا المهم بعد الاختبار قالولي وشرايك تبدأ بكره الي هو يوم الأربعاء فكرت وقلت ماهي مشكله طبعاً خصمو لي اليومين الي راحت علي وأيضا رجعو قيمة الأستقبال من المطار ، بعد كذا طلعت انا والعجيز ويوم ركبت الكرسيدا الزرقاء القديمه ونمشي شوي الا هي موقفه على جنب وش السالفه اربط حزامك يأني فطست من الضحك طيب ليش توقف تقول اربط الحزام وخلاص المهم وصلنا الفندق وكلمتهم ورجعو لي فلوسي 70 دولار وأخذ اغراضي ونروح للعائله الي بسكن عندها والعائله هذي عندهم طفلين بنت وولد والاب والزوجه لسا شباب ورحبوبي وروني الغرفه وبعد ماحطيت أغراضي طبعا تفاهمت معي الحرمه راعية البيت فكنا نتحدث عن الاكل والصلاة وروحة المسجد والمعهد ومن هالكلام ثم تعشيت معهم وعقبها صقعتها نومه ولاأحلى منها وهذا هو اليوم الاول وإلى يوم جديد مع إشراقة شمس جديدة فأنتظروني ...... وأتمنى أن بداية التقرير يعجبكم وبنتظار ردودكم
تابع نحن نتابع بصمت