- بسم الله الرحمن الرحيم
- حياكم الله يا اخوان
- اول شي ابعطبكم السالفة بشكل عام :
- بشكل عام :
بسم الله الرحمن الرحيم
حياكم الله يا اخوان
اليوم كان موعدي في السفارة الأمريكية بالرياض والحمد لله انهيت الإجراءات بالكامل لكن يهمني انقل لكم انطباعاتي وملاحظاتي لموعدي هذا مقارنة بموعدي السابق للفيزا القديمة وكان تاريخه 23 جولاي 2005 م ... اتمنى انكم تستفيدون من الموضوع ...
- طبعا الفيزا الي مقدم عليها فيزا سياحية B1/B2 ( او ترفيه مثل ماهو موجود في خيارات موقع السفارة للمواعيد ) وفي نفس الوقت انا عندي فيزا مدتها سنتين وقربت تخلص حصلت عليها عام 2005 م .
- حجزي للموعد كان من شهر نوفمبر ( يعني من اكثر من 5 شهور تقريبا ) لكن لظروف معينه اضطريت اني أءجل الموعد مرتين واستقريت على اليوم الموافق 18 / 4 / 2007 م .
- كان معي صديق لي مقدم انا وياه على نفس الموعد ونفس الفيزا ...
اول شي ابعطبكم السالفة بشكل عام :
- وصلت انا وزميلي بوابة حي السفارات الساعة 6:55 دقيقة صباحا طبعا ... وكان الموعد المسجل على الموقع هو 7:30 وطبعا هذا حرص من السفارة عشان يكتمل العدد بدري ولا البوابه ما تفتح اصلا قبل الساعة 8 ... دخلنا المواقف الساعة 7 بالضبط ... وكانت زحمة السيارات لا بأس بها .. نزلنا ويوم وصلنا لقينا طابور فيه حوالي من 35 إلى 40 شخص ...انتظرنا إلين ما فتحوا البوابة وجا دورنا خذوا الجوال واي شئ الكتروني ( وما شيكوا على الأوراق ) بعدها دخلنا السفارة وكانت الساعة 8:45 دقيقة بالضبط وبعدها تعدينا التفتيش الأول والثاني ودخلنا الصالة ... سحبنا رقم عشان التشييك على الأوراق بعد ما تشيكت الأوراق خذنا رقم ثاني من شباك التشييك هو رقم المقابلة ... انا بالنسبة لي يوم جا دوري كان الشباك ( 5 ) وتعالوا شوفوا وش صار :
- كان شاب امريكي اصلي اول ما اقبلت عليه رحبي بالإبتسامة العريضة وقتها حسيت انه شقردي ... اول شي قام يقلب في اوراقي وطلب مني بصماتي على الجهاز الألكتروني الي عنده وطريقتها الأربع اصابع لليد وبعدها الأربع اصابع لليد الثانية وبعدها اصبعين الإبهام مع بعض ... خلصت البصمات وقام يدردش معي وكان هالحوار القصير بالتفاصيل :
الموظف : كيف حالك اليوم ؟
انا : بخير .
الموظف : انت عايش في الرياض ؟
انا : نعم .
الموظف : وش تشتغل ؟ ومن كم سنه ؟
انا : قلتله وظيفتي والمدة .
الموظف : قد رحت امريكا قبل ؟
انا : ايه مرتين .
الموظف : وهل عجبتك وحبيتها كسياحه ؟
انا : جدا والدليل اني مقدم على فيزا جديدة .
الموظف : وين رحت آخر مرة ؟
انا : رحت لسان فرانسيسكو ونيويورك ..... الخ .
الموظف : ما رحت شيكاغو ! انصحك فيها لأنها جميلة جدا ..
انا : راح تكون خطتي القادمة . لحظتها اخذ جوازي وطلع كرت الإستلام وكانت الإبتسامه لا تفارق محياه .
الموظف : اوكيه ... انا ارى كل شي تمام بس لازم تدفع 27 ريال في الشباك الي جنبي وبالنسبة للفيزا راح تصدرلك خلال اسبوعين وممكن تجي تاخذها واذا حاب تستلمها عن طريق الفديكس ممكن ايضا ..
انتهى حواري مع الموظف ورحت سددت ال 27 ريال بعدها رحت لمكتب الفديكس وسلمتهم كرت الإستلام وعبيت بياناتي ,,, انتظرت زميلي لين خلص مقابلته بعد خمس دقايق تقريبا من مقابلتي ( وللمعلومية اعطوه الفيزا مباشرة مثلي ) بعدها طلعنا من السفارة وكانت الساعة 11:15 بالضبط استلمنا اغراضنا من الشباك الخارجي بناء على الرقم الأحمر الصغير الي استلمناه يوم ندخل وتوكلنا على الله ...
هاذي هي كل السالفة بالطريقة التقليدية وبالسرد الممل لكن لكن خذوا انطباعي وملاحظاتي :
بشكل عام :
موعدي اليوم يفرق عن موعدي قبل سنتين مثل فرق السما عن الأرض ... الوضع تحسن بشكل ممتاز والفرق واضح جدا وبصراحة فاقت زيارتي للسفارة اليوم كل توقعاتي ..
- 2005 يوم كنا في الطابور كانت الشمس تلعب فينا لعب وكانت الحريم والأطفال يعانون بشكل غير طبيعي يعني ساعتين او اكثر تحت الشمس ومنظر الله لا يوريكم > 2007 جزء كبير جدا من الطابور واقفين تحت مظلة تحمي من الشمس لا والساعة 7:30 تفتح رشاشات مويه باردة تلطف الجو وتخفف الحرارة على المراجعين وبصراحة هذا تطور اعجبني كثير مع تفضيلي لوجود كراسي واتوقع يسونها مستقبلا ..
- 2005 كان الطابور عشوائي بشكل رهيب وكانت الفوضى هي عنوان الطابور الي بعدك يتعداك والي قبلك يتعدا الي قدامه وبلاوي زرقا > 2007 طابور منظم وحضاري بصراحه وما يوقف عند الباب حق الدخول .... يوقف قبل البوابه ويكون فيه عسكري سعودي وفي نفس الوقت موظف من السفارة ينسقون دخول المراجعين واحد واحد وبإنسيابيه مرتبه وكانوا يسمحون بدخول العوائل مع بعضها وحتى الإصدقاء الي جايين مع بعض يدخلونهم مع بعض ...
- 2005 المعاملة واسمحولي على التعبير كانت كأنها معاملة مساجين .. حر وقرف ولطعة وفوق ذلك ما تلقى شي تشربه إلا مويه وما بقا الا يكتبون جمبها ( احمد ربك ! ) > 2007 لقيت في مدخل الصالة في الممر كاونتر صغير يبيع مشروبات خفيفة حارة وبارد وسندوتشات وحلويات وبصراحه انا ما جربته لكن قاعد اشوف ردة فعل الناس مرة مبسوطين ... الي ما افطر والي معهم بزران وغيرهم كلهم استفادوا من هالكافتيريا الصغيرة ..
- 2005 كانت عدد الكاونترات قليلة وحسب ذاكرتي ما تتجاوز ال 8 وبناء عليه كانت فترة الإنتظار اطول في صالة المقابلات > 2007 عدد الكاونترات حوالي 13 كاونتر والأرقام كانت سريعه وفترة الإنتظار اقصر ..
- 2005 كانت نفسيات بعض الموظفين تراب الله يعزكم ونفوسهم في خشومهم خاصة سوادني اذكره زين كان متأمرك وحاقر العالم ولا هوب عاجبه احد ... والي سوالي المقابله كانت امنية حياتي انه يضحك ... وكلمت اكثر من مرة بالتلفون وكانت النفسيات عدم الله لا يوريكم ... وطبعا كلكم تعرفون الحكم كولينا الأصلع الي في شباك 7 المشئوم وسمعته الي رايحه فيها وابشركم ما لقيته .... الخ > 2007 الموظفين ( وبدون مبالغة ) فيهم تغير ملحوظ في المعاملة ابتداء بالهندي الي برا مرورا بالتفاتيش وصولا لكاونترات التشييك على الأوراق انتهاء بموظف المقابلة الي كان عسل واخلاق غير طبيعيه ... وعلى فكرة كل 10 دقايق يطلع واحد من المكاتب الي جوا ( شكله مسئول كبير قنصل او السفير بنفسه ما ادري) يشيك على الوضع ويطالع بس وياخذ لفه ويرجع مكتبه ...
- 2005 كانت الطريقة الوحيدة لإستلام الفيزا الحضور بين الساعه 3 و 4 العصر وبصراحه هاذي طريقة متخلفة خاصة للي من برا الرياض > 2007 تم توفير مكتب لشركة فيدكس تستلم ايصالات الجوازات وتستلمها من السفارة وترسلها لأصحابها على عناوينهم ولا يحتاج يجي السفارة ولا يحزنون ... وللمعلومية سعر الإرسالية لداخل الرياض 75 ريال .. لخارج الرياض 150 ريال ...
- 2005 كنت اشوف تزمت ومبالغة غير طبيعيه من الموظفين خاصة اذا كان فيه نقص او خطأ في الأوراق المطلوبه > 2007 تعاون واضح مع المراجعين ... شخص ما معه كاش عادي يصرف ويرجع ... عائلة كامله ما عبت ابلكيشن عطوهم الأبلكيشن ووضحوا المطلوب ولا كأن صار شي حتى لدرجة والله شخص الموظفة قاعده تساعده في تعبئة الأبلكيشن ...
- 2005 طلعت من السفارة حول الساعه 12 الظهر على ما اذكر ومازال فيه اشخاص وعوائل ما دخلوا والمكان يوحي بالفوضى بشكل واضح > 2007 طلعت من السفارة ما شفت ولا مخلوق وكان ترتيب جميل بصراحه ...
- لاحظت ان الأشخاص الي مقدمين على فيزا طبيه يتوجهون للكاونترات مباشرة وهذا شي عجبني ..
- لاحظت عدم اهمية كشف الحساب اذا كان فيه خطاب تعريف بالراتب ... اليوم ما خذوه مني ولا حتى شافوه في المقابلة ( وهذا مو معناته عدم احضاره .... للإحتياط يجب احضاره والزود ولا النقص ) .
- لاحظت ان موظف المقابلة يسئل نفس معظم اسئلة الأبلكيشن ويسجل الإجابات ... امكن بيسوي مقارنه بعدين ... ما يندرى عشان كذا المعلومات الصحيحة مطلوبة دائما وللي يبي يكذب الله الله ما نوصيه يحفظ كذباته ههه ...
- اغلب المراجعين معي اليوم عوايل ... والظاهر الصيف الجاي بتمتلي امريكا عوايل سعودية وبيرجع عز السياحه في امريكا الي كانت قبل الأحداث ..
- عدد الطلاب كان قليل اليوم ..
- كان الهمس والكلام عن احداث الجامعة الي في فرجيينا واضح على المراجعين خصوصا الي قدام الشاشة وقناة ال CNN الأمريكية ..
هاذي انطباعاتي عن موعدي اليوم وبصراحه ومن وجهة نظري الشخصية تحسنت اوضاع السفارة امكن بنسبة 80% عن زيارتي عام 2005 ... وصدقوني ما ابالغ فعلا حسيت بالفرق ... امكن المواقف الي صارت من قبل والأخبار الي طلعتها الجرايد عن هالمواقف وزيارة المسئولين الأمريكيين للسفارة واطلاعهم على شكاوى المراجعيين + حجم الطلاب والسياح والزائرين السعوديين لأمريكا الي ارتفع بشكل ملحوظ ساهم في تحسين الأوضاع ...
آآآآآآآآآآآآآآآآآآآآآآآآسف على الإطالة ( تخبرون ربوع وما ورانا شي ) بس حبيت اشارككم بهالموضوع والف مرحبا بأي تعليق او استفسار ...
موفقين ان شالله ...
