هلا اخوي
تقدر تروح عن طريق طيران الامارات زي ما احنا سوينا من الرياض الى دبي و من دبي الى برزبن على طول بس عيبها ان الرحله طويله مره حوالي 14 ساعه
و العام رحنا من الرياض الى كوالالمبور عن طريق الخطوط السعوديه و بعدين من كوالالمبور الى سدني عن طريق الخطوط الماليزيه... كانت مره حلوه لاننا ريحنا يومين في كوالالمبور
و اذا تبي الرخص عندك خطوط الكاثي باسيفك من الرياض الى هونج كونج و تقعد في هونج كونج كم ساعه و تكمل مشوارك الى برزبن
و انا سامعه ان طيران الخليج مسوي بكج مره حلو لاستراليا ..شوف و اسأل عنه
اتمنى اني افدتك و حاول تحجز بدري لان الحين كل شئ فل

الأخت Desert Rose مشكوره على الرد وانا حجزت الرياض كوالا الخطوط السعوديه ثم انتظار 5 ساعات بعدها كوالا برزبن الخطوط الماليزيه. الآن السوال هل انتظار 5 ساعات ستكون متعبه لنا كعائله؟ وهل الخطوط الماليزيه في الرحلات الدوليه ممتازه ؟ لأني جربتهم في الرحلات الداخليه في ماليزيا ولاحظت ان خدمتهم لك عليها كثير

هلا اخوي مسكت
ان شاء الله ما راح تتعبون لان ما شاء الله مطار كوالالمبور حلو و في مطاعم و قهاوي و انترنت وسوق و غير كذا في مكان للمسافرين الي نازلين ترانزيت بس يمديك تقعد هناك و تريح فيه انت و عائلتك
بالنسبه للخطوط الماليزيه في الرحلات الدوليه مره غير عن الرحلات الداخليه .... انا جربتها داخل ماليزيا و دوليا .. فرق شاسع ...احنا وقتها كنا رايحين في درجة رجال الاعمال مره ارتحنا فيها .. المظيفين مره حبوبين و مافي اي مقارنه بمضيفينا الي لك عليهم ..و ما شاء الله الاكل يروح و يجي ..صحيح ان نصه ما ينوكل و ما تعرف وش قاعد تاكل بس كخدمه و رقي الماليزيه مره حلوه....وانا متأكده ان شاء الله بتنبسطون عليها و بتحسون بفرقها عن الخطوط السعوديه مع الاسف
توصلون بالسلامه ان شاء الله و اذا احتجت اي شي انا حاضره

مشكوره مرة اخرى لكن هل العفش لازم اشيكه مره ثانيه بين الخطوط السعوديه والماليزيه او ما يحتاج.
بعدين المكان اللي ينزلون فيه ترازيت مريح يقدر الواحد يرتاح من جد خاصة اللي معه ولد بيمتر المطار بلاطه بلاطه.
بعدين حسب المعلومات اللي اخذتها من الطلاب هناك ان مدينة برزبن مره مريحه للطلبه وكذلك جامعة Qut انها قوية في الحاسب الآلي وهو تخصصي للماجستير. وش رأيك هل هي مبالغه ام ماذا؟؟ وآسف على الازعاج

انا اخذت رحلة عالامارات مباشرة من دبي الى برزبن من ناحيتي احس فيها توفير للوقت ومافي داعي انزل واركب اكثر من مرة طبعا يوجد فرق بالسعر
والاماراتية عندها رحلتين يوميا وحده مباشرة ووحده توقف وتكمل بعد خمس ساعات

الأخ عزوز مشكور ماقصرت لكن وين توقف فيه الامارتيه؟؟
بعدين المباشره ما تشوف انها متعبه للي معه عيال خاصة انه احتمال تكون مليانه الطياره :112: !!!!!

والله ما اعرف شئ عن العفش ... كان ودي اخدمك بس ان شاء الله باقي الاعضاء ما يقصرون معاك
و بالنسبه لمكان الترانزيت انا ما نزلت فيه شخصيا لكن سمعت انه حلو و مريح و بعدين حتى لو تقعد في صالة المغادرين العاديه بتنبسط فيها لان زي ما ذكرت لك فيها مطاعم مثل كنتاكي و ماكدونالدز و غيرها و في سوق و محلات انترنت .. و بعدين احمد ربك بتقعد بس 5 ساعات ..في غيرك يقعد 8 او 9 ساعات يعني انا اشوف الخمس ساعات هذي تمشي بسرعه .. بس كان ودي انكم نايمين على الاقل ليله في كوالامبور بما انكم عايله و معكم اطفال.
العام لما كنا باستراليا قعدنا في برزبن 3 ايام صراحه مره عجبتني خصوصا بهدوئها و تحس انك في مدينه دراسه..زرنا جامعة queensland و شفنا طلاب خليجيين كثير ....الجامعه رهيبه بمعنى الكلمه تمنيت من جد اني ادرس فيها .. كنا نروح لها عن طريق العباره او الفيري ..بس من ناحية تخصصك الي ذكرته صراحه ما اعرف عنه شئ كل الي بغيت اقوله لك ان المدينه مريحه و تنفع للدراسه

وردة الصحراء مشكوره الف لكن ترى فيه جامعتين باسم الولايه
queensland university
queensland university of technology
ايهم اللي زرتيها