- السلام عليكم ورحمة الله وبركاته
- الكثير منكم كتب مواضيع جدا رائعة عن تركيا ، وتقارير جدا وافيه
- رحب فيني وسألني
السلام عليكم ورحمة الله وبركاته
الكثير منكم كتب مواضيع جدا رائعة عن تركيا ، وتقارير جدا وافيه
موضوعي هذا لرحلة لأسطنبول ليوم وكم ساعة فقط لاغير مريت فيها بعدة تجارب لن تنسى .. طبعا حاولت قدر الامكان استمتع بكل لحظة الى درجة اني نمت بالطائرة وانا راجع من التعب ( وهذا نادرا يصير معاي ، حتى في الرحلات الطويلة )
كانت هذي الرحلة - ولو انها رحلة عمل - مميزة لعدة اسباب : اهمها انها اول مره اروح فيها لأسطنبول !!
لا تسالوني ليش مارحت من قبل !! بس خططت لأكثر من مرة وماانكتب لي اني ازورها ، مع العلم اني تعلقت فيها من كثر ماكلمني الوالدين - الله يحفظهم - عنها
كلمت وكيل السفريات بالشركة ورتب لي حجز يوم الثلاثاء 18 اكتوبر والرجعة في 20 على الخطوط التركية
رحت لمطار الملك فهد ولما اخذت البوردنق تفاجأت باللي على الكاونتر يعطيني ورده بيضاء !!!
سلامات يالحبيب !! وش السالفة ؟؟!!
لكن قلت خلك مهذب يمكن هذي لدرجة رجال الأعمال .
المهم دخلت صالة السفر وفيها السوق ( الديوتي فري اللي زي قلتها ) ومنها الى صالة (رجال الأعمال) في مطار الدمام ... والله لا يورك الصالة !!
تحس انك داخل محل عزاء !!! كل اللي فيها ثمانية وكلهم ساكتين
هندي واحد على الكاونتر يتأكد من بطاقة ركوب الطائرة ( والاخلاق طبعا مش الى هناك ) مايهم . شفت لي مكان وحطيت الشنطة ورحت آخذ لي شاي وشي خفيف
سخان ماء و ابريق فيه نص قهوة سوداء صار لها على السخان اكثر من ساعة
وسندويشات ( ميني ) يبغالك مكبر عشان تشوف ايش اللي فبها . باردة في ثلاجة اشوفها دائما في بوفيهات الخبر !!!
بقية كيكة ( الظاهر الحبيب ماعجبته . فقرر تركها )
ما أطول عليكم . بعد ساعة من تقليب الأي باد ( على فكره استقبال الشبكة بالصالة ضعيف ) قررت اني اتمشى في السوق الحره ( يقولون سوق !! ) بعدين رحت للبوابة وركبت الطائرة
كان طلبي اني اكون في اول صف وعلى الممر لأن كان عندي هدية قيمة في شنطة خاصة وكنت مهتم اني اخليها قدام عيني .
قابلني مضيف لطيف في الباب وجلست بجانب رجل في الأربعينات كانت الإبتسامة ماتفارق وجهه ..حييته بالانجليزية وجلست
رحب فيني وسألني
- اول مرة تطير على التركية ؟؟
- رديت . نعم هذي اول مره
- انا أرحب فيك على هذي الرحلة الخاصة ، اول رحلة من الدمام الى اسطنبول مباشرة ، وانا " تيميل كوتيل" الرئيس التنفيذي لشركة الطيران التركية
- رديت عليه " ماشاء الله " بالعربي وكملت بالآنجليزية . الحين فهمت ليش اعطوني الوردة
- أرحب بك مرة ثانية وان شاء الله تكون رحلة ممتعة
طبعا الدكتور كوتيل ( وهذا لقبه لأنه دكتور محاضر في الجامعة ) عرفني على بقية الركاب اللي في المقاعد القريبة ، وكانوا من الشركة
طبعا اخوكم احتفلوا فيه احتفال غير شكل
ثلاث وجبات لذيذة جدا ( مشروع تسمين ) وحده حارة و وحده بارد مع وجبة مقبلات ( قائمة الطعام كانت مصممة على شكل طبله . وعليها تاريخ الرحلة )
هذا غير الشاي التركي ( شربت مايقارب الأربعة ليترات )
الحديث مع هذا الرجل الطيب دار لأكثر من 3 ساعات وكان شيق جدا ، وغني بالمعلومات وتكلمنا في كثير من المواضيع اللي اثراها بخفة دمة ودماثته في نفس الوقت ، استأذن في لحظه منها لتأدية الصلاة على كرسيه
قبل الهبوط في اسطنبول قدم لي شهادة تؤرخ الرحلة ، و استأذن لتقديم البقية لجميع الركاب
ودعنا بعضنا البعض عند سلم الطائرة في اسطنبول ، على وعد بان نكون على اتصال ، وتوجه الى حافلة VIP خاصة وتوجهت الى حافلتنا مع بقية الركاب
وكانت الساعة تشير الى الواحده والنصف صباحا
وللحديث بقية ...
