سلام عليكم
من زمان ما نزلت موضوع :$
اليوم راح اتكلم عن الدراجات الهوائية لاني صراحه ما شفت احد اخذها بالتفصيل الممل يمكن انا تطرقت لها بتقريري بس مو بشكل عميق
فاليوم ان شاء الله راح نوضح بعض الامور وصراحه شي حلو انه الواحد يأجرله وحده من هذول ويطقله فره على كل باريس ههه
انزين اول شي معنا هالشركه
انا اتكلم عن الدراجات الهوائيه هذي اكيد الكثير منا صادفها في باريس وخاصه عند كل محط مترو اول ما يطلع وهي منتشره باماكن كثيره طيب
نبي تفاصيل اكثر اليكم هالتفاصيل من خلال اطلاعي على الموقع وبما ان اللغه الانجليزيه عندي بلبل (قولو ماشاء الله )
الرابط هذا يحتوي على صفحتين
انزين كم تكلفة تأجير احد هالدراجات ؟؟؟
اذا تبيها يوم فيكلفك 1 يورو
اذا اسبوع يكلفك 5 يورو
يابلاش صكها اسبوع وانت مو خسران
طيب شلون عملية الدفع ؟؟؟
طبعا يقبلون البطاقات الإئتمانيه التاليه
طبعا أغلبنا عنده الفيزا والماستر كارد خلوكم على هذول
انزين طبعا بعد ما تحدد تذكرتك يومي او اسبوعي راح يعطونك تذكره لازم تحتفظ فيها لانه فيها كود خاص فيك لاستعمال الدراجه سواء باليوم او الاسبوعي
كل الرحلات اللي تسويها اول نصف ساعه مجاني ما يحسب عليك
طبعا كل رحله تاخذ فيها الدراجه اول نصف ساعه مجاني بعدها 30 دقيقه هم مجاني يعني اصبح المجموعه ساعه بعد هالساعه لو مارجعت الدراجه
يحسبون عليك 1 يورو في اول نص ساعه زياده بعدها لو جلست بعد نصف ساعه ثانيه ياخذون عليك 2 يورو
اذا للمره الثالثه ياخذون منك 4 يورو
طبعا لحل هذي المسئله خ كل اللي عليكم قبل لا ينحسب عليكم قطوا الدراجه في اي محطه خاصه فيها واخذوا دراجه ثانيه وهكذا لا يحسبون عليك ولا يحزنون زياده
لانه المقصد يبون الدراجات كلها في تحرك دائم ما تتوقف عرفتو الطريقه يالله جربوها
طيب كم العمر المسموح ؟؟؟
من 14 الى 18 هذول لازم موافقه من اولياء الامور او الوصي عليهم بشكل عام
من 18 وما فوق عادي تقدر تأجر وما في مشاكل
اي اعتقد انه راح يكون هناك مبلغ تامين يتم تجميده من الحساب 150 يورو
في حال ان الدراجه مارجعتها خلال 24 ساعه
ولازم الواحد يكون مأمن على نفسه والحافظ الله بس الواحد يكون عنده تامين صحي حتى لا سمح الله لو حصل حادث من سوء الاستخدام للدراجه يكون هناك تامين صحي عليك
هذا بشكل عام الله يسلمكم عن الدراجات الهوائيه انا رحت وشفتها وبس لضيق الوقت ما استعملتها مع الاسف ولكن ان شاء الله المره القادمه راح تكون لي تجربه معها
يا جماعه هالشرح قد لا يخلو من الاخطاء فإن أخطئت فمني ومن الشيطان وان اصبت فمن الله وحده عز وجل
نقطه اخيره مهمه انا لم اجرب الخدمه وسبق وقلتلكم
وطبعا اللي مجرب افضل من اللي ما جرب فلو احد استخدمها او عنده خبره فليتفضل مشكورا ويقدملنا ماهو مفيد ويتعلق بالدراجات
والسموحه على التقصير ^_^