تهقون بنطرد من المنتدى بسبب كثرة أسألتي ؟
ههه
يعطيكم العافيه مقدماً
الله يعافيك
بما اني وبفضل الله ومساعدتكم خلصت من حجز تذاكر الطيران لدولتين + حجز فندقين
الحمد لله
واخيرا
الحين عاد بتفرغ لبرنامج ميلانو ابو 10 ليالي
كني أشوفك معاك ورقة وقلم وقاعده تكتبين أسألة جديدة
بنوصل يوم الجمعه 15/7 بالليل يعني هاليوم بح طاير علينا وبدايتنا بتكون من السبت

طيب ليش ما تضيفين قاردالاند و موفي لاند لجدولكم

هلا اختي
بما اني زرت ستاد السان سيرو بميلانو يسعدني اني افيدكم
بالنسبة لتذكرة الدخول للستاد 14 يورو للشخص الواحد شاملة متحف النادي (راح يقولون لكم ممنوع التصوير بس بالكلام لأن الكل طايحله تصوير) وبعدين الدخول داخل الستاد على المدرجات وداخل غرف اللاعبين ومنطقة التصريحات الصحفية للاعبين والمدربين وطبعا بكل مكان يرافقكم القايد (: وآخر شي الذهاب لمتجر النادي
وأفضل طريقة للذهاب له من الدومو عن طريق الترام .. انا بالبداية رحت بالتكسي تقريبا ثلث ساعة اخذ مني 16 يورو ورجعت بالترام صج يطول بس ممتع (:

ATTENTION PLEASE
يا جماعه الي بسافر معاهم أهلي والله أهلي وأنا أدرى فيهم
رحنا دبي أربع أيام ، ولما رجعنا كل واحد ماد البوز ، ليش ؟!
والله ماكفتنا الأيام وقصوا علينا قالوا يومين ثلاث كافي ، مره ثانيه على الأقل بنروح اسبوع !!
هذي دبي ، اما لندن فكل سنه ثلاث اسابيع الى شهر ، بالله اشفيها زود عن الكويت !
بعد كل هذا بذمتكم منو سوقها أكبر دبي/لندن والا ميلان ؟؟؟
عشان جذي أقولكم وبكل ثقه ان 10 أيام يادوب راح تكفيهم ، أنا من الحين محصله اعتراضات من البعض لأن الأيام شويه !
الشغله الثانيه ، هذي أول سفره لنا لايطاليا وعددنا 7 أشخاص ( امي وخالاتي + اخواني واعيال خالتي من 13-22 سنه ) يعني حركتنا بتكون ثقيله مع عايلة سبع نجوم الله يسلمهم
كنا ناوين نروح روما ومنها ميلان وهذيل اساساً وبينهم نمر على فينيسيا وغيرها ، ولكن هالكلام لما كان عددنا 3 اما لما شفت العدد تكاثر قلت لا وألف لا خلونا جذي أبرك ، ترى حتى هالمناطق الثلاثه أنا حاطتها بكيفي وقايله نروح ونرجع بنفس اليوم عشان مالنا خلق عفسة الجناط الي عددها على الاقل 7 جناط سفر ، وتنقلاتنا راح تكون بالقطار فقط "لحد يقولي سياره ، مع وسواس الوالده الحمدلله ان قادرين نسوق بالكويت "
سر ... لو على الأهل مايبون غير السوق ، بس انا السوق بحياتي يكفيني يومين والباقي سياحه ، اما روما فهي اساساً الي كانت بخاطري لانها تاريخيه بحته وانا دراستي فيها عن هالامور واحبها ولكن الله المستعان
قلت لكم قصة حياتي الايطاليه ! عسى تقدرون ظروفي وشكراً على النصيحه
brb

كني أشوفك معاك ورقة وقلم وقاعده تكتبين أسألة جديدة
اي والله هذي بتكون آخر مرحله ، حالياً كل شي عاللابتوب والايفون وبعدها لازم ورقه وقلم لتدوم وتدوم وتدوم
أنا حضرت ميلان سبت وأحد
وكنت عادي جدا جدا
وحضرت صلاتهم بعد في الدومو
زين الحمدلله ، أهم شي صلاتهم قريتها بتقريرك واشتهيت احضرها بس مادري شنو بتكون ردة فعلهم وانا داخله عليهم بالحجاب
القلعة حلوة بس ترا موب ذاك الزود بسالحديقة الي وراها روعة راح تنبسطون فيها ويبيلها نهار كامل عشان تدورونها كلها
بعد الواحد واصل ويبيله يشوف الموجود عن الحسافه ^^ ماتذكر الدخول لها بجم ؟
فيرونا على طريقكم لفينيسيا
يعني تنصح نروحهم بنفس اليوم ولا صعبه وتعب ؟
وبيزا 3 ساعات بالسيارة
مانتعامل بالسياره خير شر لانه محد بيسوق
ووايد دورت بالنت ومالقيت جم ساعه بالقطار
الا اشرايك هالاماكن نخليها بالأيام العاديه ولا بالويك اند شالأحسن ؟
وترا كل هالمدة في ميلان مرة واجد
ما تستاهل وربي
يعني حقها يومين وبالكثير 3 أيام
وهذي نصيحتي
لما أحط تقريري انشالله بتعرف اشلون ماتستاهل
ولا تفوتون روما تراها خيا ال
يبيلها 3 أيام الى 4
نصيحة مني
مثل ماقلت بالرد السابق ، الله كريم
اصلا لو هالسفره تضبط باذن الله ، فأنا حاطه ايطاليا براسي بجو سنع مو بهالحر
أدري بتسألين زيادة لكن أنا انتظرك
ههه
ما سألت زياده بس كانت كلها اجوبه على اجوبتك
ماتقصر اخوي يعطيك العافيه ^^
بالحبر السرّي : وين موضوعك الموعود عن قوقل ماب ؟

leenaaa
السعر معقول جداً ، وأحلى شي سوق النادي ، السنه الي فاتت دخلت نادي مانشستر وكانت زياره ممتعه فعلاً ^^
اذا التكسي ثلث ساعه عيل الترام اشكثر ! ماكو شي بين البينين ؟
شكراً لكم

والله بيني وبينج سوق النادي ما عجبني ما اخذت منه شي . وانا افضل الترام لان نفس ما قلتلج صج يطول وكل شوي واقف بس يمشيكم بين السوقه وهالطريج الحلو .. جربوا الاثنين التكسي والترام انشالله منتوا خسرانين شي

قرأت عن موفي لاند في تقرير مغامرات بنات في ربوع إيطاليا https://artravelers.com/p/re/37612
عجبتني والله شكلها فله ^^
وعرفت انها تبعد بحول ساعه ونص بالقطار
الحين يعني عندي
ميلانو - فينيسيا = ساعتين ونص
ميلانو - فيرونا = ساعه ونص
ميلانو - سيرموني = ساعه ونص
ميلانو - بيزا = ؟؟؟
الله يستر مادري اشلون الواحد بيتفرفر بالحر والرطوبه ;
عقنقل ،، هم والله مايمنع مع ان يقولون التكاسي غاليه بيملان بس يالله نجرب بالذات اني اتوقع هالطلعه بتكون شبابيه ^^

بيزا يمكن ساعتين و نص