اتوقع من العنوان واضح الموضوع اللي بتكلم عنه ، لكن اول شيء اشكر كل من تعاون معي وساعدني بالمعلومات و ما قصرتو والله وكفيتو ووفيتو .فبعد مسائلات وتدقيق وتمحيص ققرت انا وعائلتي والأهل جميعا السفر الى تايلاند وللأسف الشديد اخترنا خطوط الإتحاد بعد المديح اللي سمعناه عنها .
المهم اول شي صار لي معهم اني حاجز قبل شهر ونصف من موعد الرحله عن طريق الموسم وتأكد حجز الأهل وشرينا التذاكر ولكن حجز عائلتي لم يتأكد رغم فارق يوم واحد في الحجز وطبعا وتخيلو لم اشتر التذاكر الا قبل السفر بكم يوم بس وذلك لأن حجزي لم يتأكد واللي قهرني ان اخذتها بفرق كبير في السعر رغم اني مثل ما ذكرت حاجز بعد الأهل بيوم واحد والذنب مو ذنبي انه أخرت كل هالوفت انا كنت متابعهم ولا فيه فايده ...
عموما نجي للموضوع الكبير والمصيبه اللي جت ،في يوم الرحله 5 اغسطس الرحلة الساعة 4:35 فجرا خرجنا للمطار جميعا والأطفال وعند الوصول للبوابه اكتشفنا تأجيل الرحلة لمدة ساعة يعني 5:35 الفجر قلنا معليش ساعة ما تضر لكن المصيبه الكبيره انه وبعد الإنتظار تفاجأنا بشكل فضيع تأجيل الرحلة الى الساعة 1 ونص الظهر تخيلو القهر يعني لو خبرونا و نايمين بالبيت وقايمين احسن ليش كل هالحوسه ولو تشوفون الحوسة اللي صارت واللي عنده كونيكشن فلايت على خطوط ثانية وبتروح عليه والله حرام وطبعا اغلبنا مقفلين بيوتنا وشايلين الدنيا كلها وشلون نرجع ؟؟؟ احنا رجعنا للبيت وحاولنا نرتاح او ننام وطبعا بدون فايده والأهل تعبو من الإنتظار والله مرمطه وبعد كل هذا تتأجل للمرة الثالثة للساعه 3 العصر ....يا الله مو معقول
عموما بعد ما ركبنا الطيارة واحنا تعبانين ومنهارين والأطفال حالتهم حاله وزوجتي حامل والوالدة تعبت نصل لمطار ابوظبي ونلقى المصيبة الثانيه المقاعد ما تكفي؟؟؟؟؟؟؟؟؟
يعني انت وحظك وحظي انا اني اكون من اول الناس الواصلين لكن للأسف الكمبيوتر فيه عله كل ما دخل اسمائنا يقفل ؟؟؟ وش هاكلام ولا يقولي الموظف وبكل ثقة خلاص انتظر 10 دقايق وكل شي بيصير تمام انت اكيد طالع ،وانتظر 10 دقايق ويقول شوي 20 ويقول شوي 30 .... وعلى هالحال لين ما اعلنو للرحلة وفي الأخير صار ينافخ ومدري شيقول وكل اللي جو بعدي طلعو للرحله واحنا وبعد انتظار اكثرمن 4 ساعات على امل كل الأمل يروح ويقولون بنطلعكم فندق(3 نجوم) وتعويض 300 دولار عن كل بالغ والنصف للطفل !!! وبكرة الصبح تطلعون؟؟؟ يا نا س انا ما قهرني الا كل هالإنتظار ليش من اول ما اختصرو المشوار وخبرونا؟؟ ليش ما قلتو اول ما وصلنا ابوظبي الكلام هذا؟؟؟ والله انهرنا من التعب وتخيلو متى طلعنا من المطار نستنى حضرتهم يعطونا فوتشرات الفنادق والتعويض ؟؟ الساعه 1 الصبح مو معقول يعني صار لنا اكثر من 24 ساعه حايسين ....
والله تعبنا ونكدنا واللي مرض في الطيارة وحالتنا حالة والله كرهت السفره وكرهت الطيران ...
عموما ولله الحمد عوض الله علي برحله سلسه وحلوه وانبسطنا ونسينا الهم وحطينا يدنا على قلوبنا خايفين من الرجعه بس ولله الحمد مر الموضوع بسلام واليوم اول يوم لي في الرياض بسلام
ادري بعضكم ماراح يعجبه اللي قلته لكن انا احكي واقع تجربه واكيد بعض الأخوان اللي معنا في الرحلة مرو في نفس اللي مرينا فيه والله لا يعيدها من خطوط ولا طيران مع احترامي الشديد لأخواني الأماراتية
هذا رأي خاص 2"]