مشكور يالشعيبي بس والله أكلهم يجيب الغثاء أدام الله النعمة وعلى أولك وعلى كنتاكي والماكدونالز لا عدمت المطاعم العربية
تحياتي

أكل الملايو لذيذ و في كمان الدندن و رز الناسي قورين ... و أكلات كثيرة حلوة ... بس يمكن بعض المطاعم هناك تستخدم التوابل بكثرة لذلك تجد رائحة الأكل غير مقبول لدينا ...
و لكن للأمانة أنا لم أتذوقه في ماليزيا تذوقته هنا على يد والدتي حفظها الله لمعرفتها بأكلهم عن طريق قرايبها في ماليزيا ...
بحكم خبرتك أخي الشعيبي دلنا على أفضل المطاعم التي تقدم الأكل الماليزي في مختلف مدن ماليزيا ....
و جزاك الله خيرا .. أختك العربية ..

وعليكم السلام
هلا والله بأخوي الشعيبي وعلى هالأكلات الذيذه ...
والله اكل اهل الملايو جميل جداً واخص بالذكر " ناسيقورينق وبنت عمها ميقورينق - المرطبق - البلا بلا - الساتي " شكل الدعوه كلها
اللي عجبني اكثر لما تآخذ الأكل من الكوشكات لأنه لذاتها وبهاراتها الحقيقة تجدها هناك اما المطاعم الفاخره و فلا لذة فيها .. وهذي تبقى وجهة نظري ..
مشكورين اخوي وللجميع

الشعيبي
اكتب اكثر وغثينا ولا يهمك موضوعك روعة زيدنا بما لديك من معلومات
اللة عليك اللة
تحياتي

السلام عليكم ورحمة الله وبركاته
الله يعطيك العافية ... دائمًا مبدع ..
فهد©

زد ياالشعيبي زيد الله يطيل في عمرك على طاعته و يبارك فيك والاعضاء والزوار جميع
اوكد بشده على طلب الغالين مرسال و العربيه
لاتتاخر سال لعابي

شكراً لك وبصراحه ملاحظ ان اكثر اكل الملاويه يدخل فيه
الاندومي بطريقه او اخرى
وانا ممن يروق مع الساتي واخص بالذكر اللي يقدم في مطعم رندو علم
في الجبل في اندونيسيا
تحياتي لك يالكنز
اخوك.... السحاب

جزاك الله يالشعيبي ..
ياليت لو تذكر لنا بعض الاكلات الماليزية المشابهة للمطبخ الهندي ، يعني يغلب عليها كثرة البهارات و الفلافل و الزيوت .. فأنا من عشاق المطبخ الهندي
كذلك المشاوي أيضا ..
أبوأنس

السلام عليكم ...
الله اكبر ...يا سلام على المشاركات اللي تفرح القلب
ما اقول الا الله يسعدكم ويفرحكم دنيا واخرة .
اخوي الوطواط ...كل احترامي لك ولرأيك ...لكن لا يكون ذقت اكل
الصينيين لانه اكلهم استغفر الله ما يمر ...تحياتي
اختي العربية ...يا خبيرتنا ...الله يعطيكِ العافية على مشاركتك الحلوة .
ويا اختي انا دايما اكل هذه الاكلات في ماليزيا بالاكشاك على قولة حبيبنا
ياماس ...او المحلات اللي على جنبات الطرق ...ولابد انك تختاري...
يعني مستحيل تجدين مثل هالمحلات في بوكيت بينتانغ ...وممكن مر عليكِ
المحلات الصينية وبطهم ودجاجهم المعلق بطريقة ...وش اقول..استغفر الله
اختاري دايما المحلات اللي تشوفينها نظيفة واللي يشتغلون فيها مسلمين
ومحجبات ...كنت دايما اروح لمحل في كرنشي جنب جامعة ملايا فيها حرمة
كبيرة محترمة ومسلمة وطبخها ولا احسن شيف ...وفي العصر تلقى بناتها
وعيالها اللي يرجعون من المدارس والجامعة يفزعون لها ...هذه الاماكن
المحترمة اللي ودنا نكسبها ... اما الفخمة ..عندك مطعم كلنتان بklcc
لكن هي مرة وبعدها ما طبيت عندهم ...اكل مائشي حواء اطعم بالف مرة
يا كثر اللي كتبته ممكن سؤال ...ذكرتي انه الوالدة الله يحفظها ويطول
عمرها في طاعته لها قرايب في ماليزيا ...ممكن اعرف من اي ولاية ...
شكرا لكِ اختي واسف ان كان هناك اي احراج .
نورتنا حبيبي واخي ياماس ...وين الغيبات
انا معاك في موضوع الكوشكات ...الله وذيك العجوز الله يحفظها
تعطيك طلبك بذيك الابتسامة وانت تقول لها terima kasih mak
وان شاء الله حأكتب عن الاكلات اللي ذكرتها اخوي واللي ذكرتها اختنا العربية .
هلا بأخوي مرسال ...وبتشجيعكم نستمر ...بالله الاكل عجبك
لابد انك تروح وتذوقها اخوي والله يسلمك ويعطيك العافية .
وعليكم السلام ورحمة الله وبركاته اخوي فهد
الله يجزاك خير مشرفنا وحنا تلاميذك .
واياك اخوي بو راشد ...وابشر يا غالي وحنا على امرك
العفو اخوي السحاب ... والاندومي هذه تبع اهل العمة اما اهل ارض
الملايو فيستخدمون (ماجي).... وستجد بعض الاختلاف بين ساتي ماليزيا
وساتي اندونيسيا في الطعم طبعا ...مشكور اخوي السحاب على مشاركتك
الغاليو والله يعطيك العافية .
واياك اخوي ابو انس والله يسلمك ويعطيك العافية .
احاول ان شاء الله ...وانت عارف اني ما ني بشيف
لكن ابشر باللي اقدر عليه ولك كل شكر .
اليوم نذكر بعض الاكلات الاخرى وان شاء الله تعجبكم :
الاخت العربية قالت الدندن ....حنا ودنا نعرف وش هي الدندن .
1-الدندنغ (dendeng)...هي عبارة عن لحم غنم اوبقر تقطع
شرائح صغيرة وممكن يضيفون لها بطاطس وتطبخ بطريقة معينة
وتقدم مقرمشة غالبا حسب المرغوب...هذه اكلة ثانوية او تقدر تقول
لاجل السفرة تكون اطعم ومكتملة ...لكن ما تاخذها لحالها الا لو بغيت
تنقنق .
2-ناسيء قورينغ(nasik goring) بمعنى الرز المقلي .
رز ابيض مطبوخ ويحطون معاه اضافات من بيض مقلي ولحم مقطع او دجاج
او ربيان وخضار ...الخ ويلخبطونه مع بعض ويضيفون لها بعض البهارات
وكل شخص يختلف عن الاخر في الاضافات ...وتقدم ...
4-ابن عمها على قولة حبيبنا ياماس
مي قورينغ( mee goring) مكرونة مقلية .
نفس اللي قبلها لكن بدل الرز يستخدمون مكرونة .
اما البلا بلا ... نخليها بموضوع اخر لانها (kuih) يعني زي ما تقول
ما هي اكلة وجبات لكن ...ماني عارف اجيبها بالعربي واعيباه ...حطها
في مصاف السنبوسك والسبرينغ رول...ودي اقول انها مقبلات لكن ماهي
مقبلات ....الملايو والجاوة يسمونهاكويه هي عجين يحطون معاها بصل
وجزر اصفر وممكن كرات ويقلونها ويغمسونه في مرقة ...خلنا نأجلها لوقت
كلامنا عن الكويهات ان شاء الله .
5-اوتاء اوتاء (otak2).
هذه تلقاها في اغلب مطاعمهم وخاصة في ملاكا اللي تكون على الشاطيء
وترى ملاكا يشتهرون بأكلات قليل فيها كلمة لذيذة ...هذه الاكلة عبارة عن فيليه
سمك يجعلونه ناعم ويضعون عليه اباذير وعجين ويدخلونه في ورق شجر
الموز وبعدها يحطونه على الفحم ...ويقدمونها ساخنة ...صراحة روعة
ما تعرف وش طعمها ...سمك ...عجين لكن متأكد راح تتمتع بأكلها .
انا احول اجيب الاكلات المتوفرة بالمحلات والمطاعم لانه هناك اكلات
ما تلقاها الا في بيوتهم وصعب تلقاها في المطاعم .
6-قادوقادواو الروجاء حسب تسمية الملايو ...(rujak)
هذه عبارة عن خضار من كرنب وخيار وبايم...الخ وبيض مسلوق
وكربوء ومحطوط فوقها مرقة لوز ...لذيذة وطعمها حلو يعني بسكر
وتاكلها مع الرز كأكلة ثانوية .
بايم(bayam) =نبات عندهم مثل الجرجير او السبانخ .
كربوء (kerupuk) = مثل العجين المجفف وتقلى في الزيت
وتقدم غالبا كسناك ...وطبعا مقرمشة ...اهل اندونيسيا هم اهلها
واصلها لكن تمتاز ماليزيا بوجود كربوء السمك اللي من ترنجانو
ولونه مائل للسواد وما ينباع عندنا ...وذاك الكربوء لو اكلته في
العصرية مع الشاهي ما اتوقع راح تتركه
تكفي هذه الاكلات هذه المرة يا اخوان ونوعدكم بالمزيد ان شاء الله .
والسلام عليكم