وعليكم السلام والرحمة
شخباركم
احنا بخير الحمد لله
انه عضوه يديده في هالموقع ..وهاي اول موضوع لي في المنتدى
ياهلا ومرحبا فيك في هذا المنتدى الرائع
فيي اووقست راح اسافر لأول مره الى ماليزيا معا اهلي
توصلون بالسلامة ان شاء الله .. ورحلة موفقة
وحجزنه معا حملة المواسم اهيه مرتبت لنا الرحله والفنادق والمواصلات
بس حبيت استفسر عن الفنادق الي بنسكن فيهاا من ناحية النظافه والراحه؟؟ واذا كان فيها اسواق قريبه منهاا وشنو اسامي الاسواق اذا في
فندق أوانا - جنتنج
فندق أوانا ماعمري جربته بس يقولون انه مو قريب على الألعاب حوالي 7 أو 8 كم بعيد عنها .. بس عندهم محطة تلفريك خاصة توديكم للألعاب.. والفندق خمسة نجوم بس ماعرف شي عن نظافته..
فندق هوليدي إن - بنانج
الفندق كويس بس اتأكدو انكم تسكنون في البيتش وينج القسم اللي يكون عالبحر مباشرة مو في التاور..
والفندق قريب مرة من السوق الليلي وفيه بجنبه سوبرماركت ومطاعم .. توكلو على الله
فندق ون ورلد - كوالالمبور
هذا الفندق حلو مررة وجديد ونظيف .. وفيه بجنبه مجمع ون أوتاما لاتفوتينه تراه حلو ..
و ماهي الاماكن السياحيه والاسواق الي تنصحوني اروحها وما افوتها
فيه كثير أماكن عندك الحدائق كثيرة في كوالا وفي بينانج
المجمعات بعد في كوالا كثيرة : بس لازم تروحين البرجين ، بافليون، ميدفالي ميجامول، وفيه مجمعات كثيرة في شارع العرب .. لاتنسون الصن واي لاجون والماينز ....
في بينانج روحوا كومتار وجيرني بلازا حلوين..

حياج الله معانا ،،،
وصباحج النور اختي
بصراحة بالنسبية حق الفنادق ما اقدر افيدج لأن ما عندي خبرة فيهم ولا سكنتهم وما سمعت عنهم بس الهوليدي ان في ناس تذمه وفي ناس يقولون ان الفندق زين انا نفسي متوهقة ما حصلت حجز الا فهالفندق والله يستر
وبالنسبة حق الأسواق والأماكن
الهوليدي ان قريب منه السوق الليلي وموقعه جدا ممتاز
في كوالا اتمنى ان الفندق يكون قريب من شارع العرب وبالنسبة لأماكن روحي ممجمع الماينز وبالقرب منه حديقة الماينز وورلد والحائق المعروفة الفراشات والطيور والحيوانات
في بينانغ تقدرون تروحون يوم واحد للنكاوي بالسفينة ترى وايد متعة بس المشكلة انكم مرتبطين بحملة والحملات اهما متكفلين بالبرنامج فبتكونون مقيدين مع الحملة اهما يرتبون لكم البرنامج السياحي
شوفي نصيحة طبعي التقاير الجاهزة اللي عادينها الأخوان في المنتدى وايد راح تفيدك فيها الأماكن السياحية كلها انا بعد عندي تقرير جمعته من الأخوان ما قصرو بنزله في المنتدى في اقرب فرصة

صباح الخير يافديتنى !!!!!!!!!!
وحياك الله معنا فى هذا المنتدى الرائع وتحياتى وتقديرى لك 000

ثنكيو حبايبي ماقصرتوو..
وهاي البرنامج الرحله:
أول يوم:
الوصول إلى منتجع جنتج آيلاند وتوزيع الغرف ...
ثاني يوم:
جوله تعريفيه بالمنتجع ومن ثم الصعود بالتلفريك لمدينة الألعاب
ثالث يوم:
زيارة مدينة الألعاب المائيه ( صن وي لاجون)
رابع يوم:
المغادره الى جزيرة بنانج والوصول الى فندق هوليدي ان ..
خامس يوم :
جوله للتعرف على معالم الجزيرة وزيارة حديقة الفراشات وحديقة الفواكه الاستوائية وبعدها زيارة الشلالات ..
سادس يوم:
التسوق في بعض المجمعات التجاريه
سابع يوم:
رحلة الى جزيرة القرود بواسطة القوارب
ثامن يوم:
يوم حر للاستمتاع بالسواحل والالعاب المتنوعه
تاسع يوم:
المغادره الى كوالالمبور والوصول الى فندق ون ورلد...
عاشر يوم:
جولة للتعرف لعى المعالم المدينه من الابراج والمناره ومعرض الاحياء المائيه
اليوم (11):
زيارة القريه الفرنسية
اليوم (12):
زيارة مدينة ملكا ومشاهدة حديقة سفاري والعروض الشيقة في * افاموسى*
اليوم (13) :
يوم حر للتسوق والتبضع
هاي برنامج رحلتيي واتمنى على هاي البرامج تعطوني برامج اخرى اسويها في هاي الايام .. والمحلات القريبه من الاماكن الي بنروحها ... عشان انه مابي اضيع يوم في جم محل بس .. ودي استمتع بكل لحظه في ماليزيا مابي يفووتني ولا شي ..
وشكرا

ونسيت اقولكم اني راح اسافر على الطيران السيريلانكي شرايكم فيه ؟؟؟؟
=)

الحملة سمعتها وايد تمام وتوكلي على الله وهم ما يقصرون وخصوصا بكون معاكم مرشد سياحي على طول
اما عن الطيران السيرلنكي لا غبار عليه احسن من بعض الطيران وذو سمعه طيبه توكلي على الله يا بنت بلادي الله يردك سالمة

يا هلا ومرحبا فيك يا فديتني وبتوفيق أنشالله

الله يسلمك مزييعل..
انه اول مره اسافر معا هالحمله وان شاءالله مثل ماقلت تكون السفر معاهم حلوه وانه بعد سمعت عنهم وايد..
و اعشق السفر ثنكيوو على الطله ...
=)

فندق هوليدي ان بيننج ماعجبني بالمره .. عطوني غرفه ماعجبتني وانا دافعه قيمتها في مكتب السفريات ل3 ليال ويوم شفتها ماقعدت فيها ليله رحت فندق ثاني ودفعت من جديد ..
انا مانكر ان زحمه على هالفندق بس انا ماعجبني .. والناس اذواق .. انتي اذا مع هلج عادي بتحملون واغلب وقتكم كله بره يعني الفندق حق النوم بس ..
اما انا كنت رايحه شهر العسل وماستحملت المكان