اختي سحاب
انا سافرت لماليزيا من 3 سنوات وساسافر مره اخرى الأسبوع القادم
وحجزت في فندق ريجنت 12 ليله
سبق وشاهدت الفندق على الطبيعه موقعه اكثر من رائع على شارع العرب وهو شارع كله اسواق ومطاعم عربيه وصرافين ومقاهي
الشارع كله حياة في النهار الأسواق وفي الليل الى الساعه 1 ليلا سهر في المقاهي
يعني اغلب مشاوركم للتسوق والأكل بتكون مشي
يعني موقعه رائع جدا جدا جدا ( خصوصا للحريم )
بالنسبة لمرتفعات جنتنق انا زرتها المره المااضيه يوم كامل من الصبح الى الليل وكان كفايه بالنسبة لي لأن مامعي اطفال
حطي ببالك انه غير الملاهي هناك سوق بياخذ وقت
وهالمره نفس الشي بروح لها يوم واحد بس
هي حلوه للي عنده وقت ينام يوم فيها وياخذ غرفه دور عالي عشان يدخل عليه السحاب في الغرفه لكن احيانا يكون الجو مشمس فتصابون بخيبة امل
لا انصحك بالذهاب ابدا الى جنتنق يوم سبت او احد عشان الزحمه
عذرا للأطاله هذا الي حظرني الأن
ولو ذكرتي عدد ايامك هناك واي المناطق بتزورين يستطيع رواد المنتدى افادتك اكثر عن الأماكن الي تستاهل والي ماتستاهل وحطي ببالك ان الأذواق تختلف والأمر متفاوت حسب معك اطفال ولا لأ

مرحبا اختي سحاب

• -فندق ريجنت - هو فندق فور سيزونز كوالالمبور - بس الاسم مختلف، ومثل ماقالت الأخت مها عن الفندق.
• -الجو ثابت طول السنة في ماليزيا بين 32 درجة بالنهار و24 درجة بالليل (غالبا).
• -فندق رينجت (خمس نجوم)، ماعليه خوف اللاب توب ان شاء الله ( أنا كنت في الشيراتون، انادي خدمة الغرف للتنظيف وأطلع وأخليهم - بس الفلوس والجواز والأغراض المهمة في السيفتي بوكس)
• -أصرفي فلوسك بالدولار من هنا أريح لك وماتفرق واجد هنا ولا هناك.
• -الأماكن اللي تزورينها - أرجعي للمواضيع المثبتة - الأخوان ماقصروا كفوا ووفوا.
• -أحسن شي فكرتي فيه - برأيي - تزورين قنتنق من الصبح لليل لأنه يكفيها يوم واحد لأنها صغيرها ومافيها غير البراد.
• -خوذا ملابسكم وتوكلوا على الله - كل شي بتلقونه هناك ان شاء الله.

أتمنى اني أفدتك
تحياتي

الف شكر اخواني ع الرد والله طمنتوني ع اشياء وايد وإنشاءلله اختي مها نشوفج هناك ونقضي إجازه حلوه يارب..
بس تذكرت كم شغله:

• فطور الفندق شلون اوكي والا لا؟
• بالنسبة للجو هناك.. هل فيها مطر في شهر 8؟
• جنتنق فكرت نقضي فيها ليله وحده لان احنا حابين نشوف السوق اللي عندهم شلون ونتمشى براحتنا وحابين في نفس الوقت نستمتع بالجو البارد..والطبيعة..( ع قولتهم ماورانا شي نبي نريح بس )
• للاسف احنا بنقضي ال20 يوم في كولالمبور وماراح نروح مناطق ثانية ماغير جنتنق..فحبيت اعرف الاماكن اللي ازورها او ماتسوى ازورها....لان في ناس قالوا ان حديقة الحيوان عندهم ماتسوى..؟ وحتى المتاحف مالها داعي؟
• مع العلم احنا عايلة من 7 اشخاص ومعانا طفل واحد بس

أختي سحاب
فنادق الخمس نجوم يكون الفطور فيها بوفيه مفتوح من كل مالذ وطاب ، تطمني
بالنسبة للجو توقعي المطر في أي وقت، بس في كوالا يوم مطر وخمسة لا، على الأغلب.
بالنسبة للأماكن تفضلي هالرابط وان شاء الله ينفعك - والشكر موصول للأخ فهد مشرف ماليزيا:
https://artravelers.com

أختي سحاب
بالنسبة لجنتق لوتذهبون بالتلفريك راح يكون نزهه بحد ذاته لأن المناظر جدا ممتازه
بس يجب التنسيق مع تاكسي في الذهاب والعوده حتى ينتظركم في العوده لأن المكان لا يوجد في تكاسي.

الف شكر لكم اخواني ع الردود اللي تبرد القلب
ماقصرتوا
انا بديت اتجهز للسفر واي شي يطري علي بسألكم عنه..

حاضرين بأي وقت أختي سحاب