السلام عليكم ورحمة الله وبركاته::
أخوي ..هل عندك خلفية عن المسافات بين المدن المذكورة؟؟
والله احسه مرهق..في هذه الفترة القصيرة ..مع ان اللي يشفعلكم انكم شباب وما عليكم بالهجولة.
أوكي نقول بسم الله.
تنزل في زيورخ ..تستأجر السيارة (هذا المكان المناسب..لكن ليس التوفيري...لأن المانيا افضلهم كلهم)
وترتاح يوم في زيورخ.
الذهاب الى زيلاميسي 3 ايام
الرجوع الى انترلكن 3 ايام
باريس ثلاثة ايام.
العودة الى زيورخ يوم .
لألألألألألألألأ ..والله احس اني راح اظلمك بالمخطط هذا.
لأن بين باريس وزيورخ اكثر من ست ساعات خط.وحدة من ثنتين ..يا تشيل باريس من الخطة ...او تخلي الرجعة من باريس.واذا كانت باريس اساسية في الخطة ..شيل زيلاميسي ..عندك انترلكن احلى واحلى.
تصير عندك
زيورخ والسكن في لوزيرن يومين
باريس ثلاثة ايام
انترلكن أربعة ايام
زيورخ يومين.
=========
بالنسبة لمخططكم هذا ..ميونخ مالها مكان ابدا .شاور وشوف ..والله يكتب لك اللي فيه الخير.

خ
6 ساعات حلوين على الجو الاوربي والخط الحلو , بالعكس الغرض من الرحله روود تريب, بس اكيد في حدود المعقول ماتوصل للأرهاق
واكيد فكرة انه نكنسل وحده منهم احسن وحده بشرق والثانيه بغرب
ام حلو يعني ميونخ نطيرها
المشكله ان باريس اساسيه, وزيلامسي مادري هل انترلاكن نفسها ونفس طبيعتها ولا لا ؟ لأن تعرف اكثر شي نسمع به زيلامسي ونبا نشوفها, ف مادري
وبخصوص السياره هل هو هذآأك الفرق االكبير ولا شي بسيط بين سويسرا وألمانيا؟

انترلكن تغنيك عن زيلاميسي..وانصحك ما دام الرحلة هذه حجزتها على زيورخ ونفسك تزور باريس ..طير زيلاميسي ..وخليها في رحلة اخرى مستقلة ..ومعها سالزبورغ وفيينا وميونخ ..او تخليها زيلاميسي مع زيارة الشمال االايطالي ميلان وفيرونا وفينيسيا.هذا من وجهة نظري والامر راجع لكم.
لأن تخيل زيورخ في المنتصف..600 كم شرق زيلاميسي..600 كم غرب باريس
وانترلكن قول امرها هين مع المشاوير اللي فوق.بالنسبة للسيارة ..بإمكانك التأكد على موقع سيكست لتاجير السيارات .
وراح تشوف الفرق .
ولي عودة اخوي معاك ..لكن خبرني وش يصير معك

اول شي يعطيك العافيه تعبتك وياي
انا حطيت ترتيب سريع وقول رايك فيه
اول يوم وصول تاريخ 20 الساعه 10 الصبح استلام السياره والتوجه لباريس لين تاريخ 23
تاريخ 24 نروح انترلاكن ونجلس يومين
تاريخ 27 نروح لزيلامسي يومين
واخر يومين زيورخ ومنها العوده المغرب
ادري يباله تعديل وايد خ ف شورك
وبرجع اقرا واشوف التقارير اكثر عن انترلاكن وزيلامسي ونشاورهم من بعد شورك ونشوف كيف
بس فيه شي طلع عرض ماحسبت حسابه، تونا قدمنا ع الفيز وانا كانت عندي شنغن قبل 5 سنين تقريبا وكنت معتمد انها مابتطول وانصدمت ان الوضع صار حجز مواعيد من النت وانتظر ، المهم ان الموعد يوم الاثنين و الجمعه والسبت مقفلين والاحد بيكون العيد ف مادري بتخلص الفيزا لين الخميس ولا لا !؟
لان هذا الشي الي لخبط حسابات السكن والسياره هل نحجز ونمشي علا امل انها بناخذ 3 ايام ولا ننتظر لين الخميس !!

اما عاد ..كل شي الا الفيزا.لو ما طلعت خرب عليكم كل شي.
لا تحجز وتتوهق الين تشوف الفيزا بين يديك.
مالك الا تروح للسفارة من بدري..وانت مجهز كل الطلبات ولا ينقصك شي...وتسألهم متى تطلع الفيزا وتستلمها .
بعدها يصير خير..تحجز السكن والسيارة من ساعتها.
لكن لو تأخرت الفيزا او اخذت اكثر من ثلاثة ايام ..مالك الا تأجل السفرة الين تطلع الفيز.

ترى كنا رايحين امريكا وتغير المخطط ومالحقنا نسوي الفيز >< .. وغير سالفة الحجز, وعندنا قانون يديد لازم الفيزا من اول دوله بتنزل فيها وزحمه
بس مبدئياً اذا ان شاء الله طلعت الخميس, هل الي كتبته صح او فيه منطقه تستاهل اكثر من الثانيه ؟
بس عشان ابدا ادور عن الاماكن الي بنروحها والي تناسبنا ف كل مدينه وارتب

اللي كتبته اخوي صحيح ..لكن انا قلت لك المشاوير راح ترهقكم.وعفشك كل يومين وانت موضبه ويالله سفر.
لكن امرنا لله ..توكل الله وابدأ بباقي الاجراءات .
مع ان انترلكن تغنيك عن زيلاميسي.
والسيارة أنصحك تاخذ ديزل ..عاد هذه ما يبيلها.
وبالتوفيق

ونرجع ثاني مره لموضوعنا ياميدو خ طبعا الاوراق كلها تلخبطت من الفيزا واليوم استلمت الفيزا حمدلله واضطريت اني ابدل السكن الي كنت حاجزه مبدئياً و التذاكر وكل شي تمام والمخطط كالتالي : اول يوم وصول تاريخ 25 الساعه 10 الصبح استلام السياره والتوجه لباريس لين تاريخ 29 تاريخ 29 نحرك الصبح الى جنيف ونقعد لين 31
تاريخ 31 نحرك الظهر الى انترلاكن لين تاريخ 3 تاريخ 3 نروح الصبح او الظهر لزيورخ و4 بيكون السفر الساعه 7 المغرب فرنسا الأخوان مابيقصرون في قسم فرنسا, بس ابا اعرف الجزء الخاص ف سويسرا ,, وين اقدر اروح في انترلاكن حسب الايام انا اخترت كذا مكان وعطني رايك فيهم وبدل وغير اذا يحتاج قرية كاندرستيج وبحيرة أوشن سي شلالات تروميل باخ قمة جنقفرو الثلجيه ياليت مساعدتك ياخوي في اماكن تستحق الزياره واذا فيه شي مايسوى او عآادي تذكرلي اياه عشان نشله من الحسبه ,, واذا يكون مع الاحداثيات احسن, لأن قريت في موضوع ان الاحداثيات الي هني اكثرها غلط جربوها وماوصلتهم صح وهل فيه وقت نسوي شي في زيورخ خلال اقامتنا القصيره فيها وبالنسبه لجنيف بيكون عندنا يوم واحد كامل شو انسب شي لها وبكون شاكر لك

يا هلا مرحبا أخوي بوحريب ..كل عام وانت بخير ..
الله يقطع شيطانك ههه ..انا نسيتك ..وقعدت اقرا القصص اللي في الردود فوق عشان اكون بالصورة.على العموم ..الله يكتب لك ما فيه الخير ..وهذه اجاباتي لك:
بس ابا اعرف الجزء الخاص ف سويسرا ,, وين اقدر اروح في انترلاكن حسب الايام
انا اخترت كذا مكان وعطني رايك فيهم وبدل وغير اذا يحتاجقرية كاندرستيج وبحيرة أوشن سيشلالات تروميل باخقمة جنقفرو الثلجيه
هذه نجي لها شوي.
واذا يكون مع الاحداثيات احسن, لأن قريت في موضوع ان الاحداثيات الي هني اكثرها غلط جربوها وماوصلتهم صح
اللي يقول ان الاحداثيات غلط ...يعطينا من الموقع اللي اخذ منه الاحداثيات عشان نتأكد.
لأن مو كل واحد فاهم في شغل الجارمن وكيفية ادخال الاحداثيات.
مع ان المواضيع يا كثرها تتكلم عن هالشيء.
وبالنسبة لي ..احداثياتي اللي اكتبها مأخوذة من قوقل ماب..بالبحث عنها بالاسم في الاول ..ثم اطلع الاحداثيات منها.
وعندك هذا الموضوع مشروح فيه الطريقة بالتفصيل الممل

===================
=================
========
على العموم ...لو عندك اي استفسار نحن حاضرين.
واتمنى لكم رحلة سعيدة.
بالتوفيق