ونسيت اقولكم كم مدة الرحله؟

سلخير
هلا ذوق على ذوق...
بالنسبة لاسعار التذاكر فهي غالباً تتراوح بين ال5500 الى 6000 ريال...
وبالنسبة للخطوط فتختلف على حسب المدينة الي بتروحلها ,, عندك مثلاُ مدينة كرايستشيريش مافيه الا الخطوط السنغافورية والخطوط الاماراتية لكن الاماراتية بتحتاج فيزا ترانزيت لانها تنزل في سيدني...
انا مجرب الخطوط السنغافورية وكانت حلوه...
وعندك مدينة اوكلاند فيه اكثر من شركة طيران توديك لها....
بالنسبة للاسعار ترا ارخص من اوروبا ,,, وتقريباً المطاعم المشهورة مثل كنتاكي و هارديز اسعار الوجبات عندهم قريب مرة من اسعارهم عندنا....
التسوق في نيوزيلندا اشوف انا انه متوسط المستوى ,, يعني مثلاُ ماتقارن بميلانو او باريس...
وعلى فكرة ترا الملابس عندهم غالية جداً....
الفنادق في نيوزيلندا حلوه وماعليها ,,, وعندك مثل الهيلتون و كراون بلازا وغيرها ,, وكلها فخمه...
وفيه ترا بعد زي الشقق المفروشة يسمونها موتيل حلوه واسعارها رخيصة مقارنة بالفنادق...
بالنسبة للمعاملة فمافيه احسن من معاملتهم ابد ,, العنصرية الحمدلله مافيه...
والحجاب موجود هناك ,, ولو رحت لأوكلاند بتشوف كثير من النساء محجبات...
ومدة الرحلة تقريباً 20 ساعة بالطيارة ,, طبعاً غير الترانزيت...
.وبالتوفيق.

السلام عليكم
اخي العزيز
اريد اعرف تفاصيل هل شهر واسبوع كافية لتعلم اللغة الانجليزية

مشكور اخوي ميقاالو على ردك علي
بس مره بعيده انصدمت ماتوقعتها كذا ههاي
بس يعطيك العافيه من جد اخوي ^^
جزاك الله خير

نفس السؤال ،بمعنى آخر :-
هل الأفضل السفر عبر طيران الكاثي باسيفك ، ولا طيران ماليزيا ولا طيران سنغافورة ولا طيران الإمارات
أيهم أرخص ...!!!!؟؟؟؟؟

مرحبا....
القلم البتار
اذا كانت لغتك الانجليزية ممتازة وتبي تروح شهر ونص بتستفيد ان شاءالله...
لكن اذا كنت ماتعرف انجليزي فانصحك ماتروح لانها قليله جداً ,,, وبشكل عام حاول تطيل المدة لان الفائدة تكون اكبر...
ذوق على ذوق
صح بعيده لكن الطريق ترا ممتع وخاصتاً اذا كانت اول سفرة لك لهالدولة لانك بتوقف ترانزيت وبتتمشى في المطار وبيطير الوقت....
وياهلا وسهلا...

• *$$$m@d**

ترا اسعار التذاكر تتغير من وقت لأخر ,,, عشان كذا احسن شي تسأل مكتب الخطوط افضل...
لكن المعروف ان الخطوط الاماراتية ارخص...
وانا جربت السنغافورية وكانت حلوه...

مشكور اخوى ميقالو تفاعلك مع الخوان!!!!!!
ابي استفسار عن مدينه في اوكلاند وهيcity campus

أخونا الغالي ميقاالو
عندي إستفسار بسيط
أنا لغتي الإنجليزية مش بطاله ومش جيدة يعني أقدر أمشي نفسي في المطعم والفندق ... إلخ لكن ماأقدر أدير حوار باللغة الإنجليزية وسبق إني سويت إختبار في المجلس الثقافي البريطاني في جدة وحطوني في المستوى
(ELEMENTARY 2 ) فبخبرتك هل رح تتحسن لغتي وأصل للمرحلة الممتازة في اللغة أقصد ( التحدث بطلاقة )يعني إرسال وإستقبال فوري ههه مع العلم أن لدي النية والهمة القوية لتعلم اللغة الإنجليزية لأني أطمح في إكمال دراسة الماجستير والدكتوراه إن شاء الله وأنا ناوي إن شاء الله إني أسافر نيوزلندا وبالتحديد إلي منطقة كرايست تشيرش لدراسة اللغة الإنجليزية في أحد المعاهد هناك في خلال الثلاثة الأشهر القادمة إن شاء الله وناوي إني أقعد هناك في فترة لاتقل عن ستة أشهر طبعا والسكن عند عائلة ..
بالنسبة لوضعي في اللغة كماشرحته لك هل سوف أصل إلى ماأريده في تعلم اللغة ؟؟ من خلال خبرتك
فهل تنصحني بالسفر إلى نيوزلندا بالتحديد ؟؟ وهل إختياري كان في محله ؟؟
أنا أحمل جواز يمني فهل أستطيع الحصول على الفيزا إلى نيوزلندا ؟؟؟
هل هناك نصيحة لك تود قولها لية لاستفيد منها في تعلم اللغة الإنجليزية ؟؟؟
جزاك الله خير على خدمتك لأخوانك في المنتدى والله يقدرنا على رد الجميل

مرحبا
تركي
والله للأسف المدينة الي قلتها مااعرفها وماعندي اي معلومه عنها...
لكن انت وش تبي في هالمدينة ,,, حدد سؤالك ونعلمك الجواب واذا ماعندنا جواب ندورلك ونلقى ان شاءالله....
المكافح
تركيب الجمل هذي يبيلها ممارسة يالغالي ,, اهم شي تكون عندك حصيلة جيده من معاني الكلمات وتقدر تمشي نفسك في اماكن مثل المطاعم وغيرها...
اتوقع لو بتروح بتستفيد كثير خاصتاً اذا بتقعد اقل شي 6 شهور على كلامك....
بالنسبة لنيوزيلندا انا اتوقع انها حلوه لانها رخيصة مقارنه بالدول الثانية ,, لكن ماادري عن مزاج ممكن تروح وماتعجبك فعشان كذا مااقدر اقولك هل بتناسبك او لا...
اتوقع تقدر تاخذ فيزا بس لازم تجيب قبول من معهد نيوزيلندي ويكون القبول نهائي ,,, والمعاهد مايعطونك هالقبول الا اذا سددت كل قيمة الدراسة....
واتمنالك التوفيق...