السلام عليكم ورحمة الله وبركاته
اخواني الكرام الحبوبين اللي يعلم الله اني احبكم فيه ولأجله
كل عام وانتم بخير وعيد سعيد يارب علينا وعليكم وعلى جميع امة محمد صلى الله عليه وسلم
والله اسأل ان يجعلنا في هذا العيد اليه اقرب وبسنة نبيه محمد صلى الله عليه وسلم الزم
وان يجعلني واياكم والمسلمين جميعا من المقبولين في رمضان صيامه وقيامه ومن عتقائه من النار
عندي مجموعة اسأله عن المانيا ودي باحد الخبراء ينورني عسى الله يكتب له الاجر
انا اخر سفرتي اللي بتكون سويسرا النمسا المانيا طبعا حددت فقط يومين لالمانيا ميونيخ
ومعاي سياره استفساري هو
بهاليومين الاخيره قبل توديع اوربا ياليت تنوروني عن اسواق المانيا خصوصا اللي بميونيخ واذا فيه
اسواق بمدن ثانيه يمديني اوصلها بالسياره في خلال هاليومين ماعندي مشكله لاني خصصت المانيا
فقط للتسوق ولا شئ الا التسوق طبعا ياليت يذكر لي السوق وبجانبه الاحداثية للسوق لأنه لو ذكر السوق
ماراح استفيد الا بوجود احداثية دقيقه للسوق ولو كانت بعد احداثيات مواقف السوق احس اني بجي احب راسه
واشكره بعنف .....
طبعا الاشياء اللي براسي اتسوقها هي مجموعة ملابس لاطفال مابين بنات وعيال الله يجعلهم من عيال الصلاح
وعيال المسلمين جميعا لكن الله يخليكم ابي اسواق تكون اسعارها رخيصه مو غاليه وتكون فيها اصناف كثيره
وهل ياترى بالمانيا عندهم سوق الخميس مثل اللي عندنا او عندهم سوق مثل اسواق البطحاء والديره والا لاء >>>سؤال جاد وربي ما استهبل
السؤال الاخر من يدلني على مواقع مصانع بميونيخ ابي اشوف مصانعهم امنيتي اشوف مصنع للصناعات الثقيله
ومصانع كثيره هذي وربي بخاطري ...>>>>بيروح يشوف مصانع معه ام العيال وش يحس به
السؤال الاخر ايضا : من يحط لي احداثية وكالة اودي بشتري منهم قطع غيار وهل الاقيها ارخص من السعوديه
لاني لقيت الياي الامامي هنا بسبع الاف ونص
والله يجزاكم خير ويرحم والديكم والمسلمين جميعا سواء اللي دخل وعلق وشارك والا اللي دخل وقرء
والا اللي مايدري وش السالفه كلهم الله اسأل ان يجمعني واياهم في جنات النعيم ...