swiss khlody
الله يتبها لكم وتروحون وترجعون بالسلامه
وعذرا من اللورد وميدو لهم الحق في الاجابه

المسافة من فرانكفورت الى رست 232 كم تقريبا والطريق سريع ( هاي وي )
والوقت تقريبا ساعتين و 8 دقايق ,, واذا طيارتكم توصل بدري تقدرون تطلعون لرست على طول طبعا اذا ماكنتوا تعبانين من الرحلة
بالنسبة لضريبة ارجاع السيارة فنعم توجد ضريبة لانكم استأجرتوا السيارة من دولة وبترجعونها في دولة ثانية والضريبة تقريبا 200 يورو

السلام عليكم ورحمة الله وبركاته ::
حياك الله اختي .
ما شاء الله ما قصر اخوي عبد الله واخوي مقدام بالرد .
على العموم ..من رأيي ان الراحة في فرانكفورت والتمشي في شارع زيل (او تسيل كما ينطقها البعض) فرصة حلوة ولو يوم واحد وخصوصا انكم ما راح ترجعون لها ثاني في نفس السفرة .
بس بشرط لا يصادف يوم الوصول يوم احد او عطلة رسمية ..لأن المحلات راح تكون مقفلة .
وثانيا .تفاجي الوصول الى مدينة الالعاب في يوم السبت او الاحد ..لأن الزحمة تصير مرتين .
لو كانت في وسط اسبوع افضل.
السيارة على موقع سيكست ..اذا كان الاستلام والتسليم في مطار فرانكفورت ..لسيارة مثلا فولكس واجن بولو ..ب 313 يورو = 1600 ريال ..لمدة تسعة ايام ...هذا افتراضيا .
ولو تم الاستلام من مطار فرانكفورت والتسليم في مطار سويسرا السويسري (وهو ارخص من التسليم في القسم الفرنسي) ب 570 يورو = 2800 ريال.
لكن لا يزال السعر معقول نوعا ما .
يعني تقريبا مثل ما تفضل اخوي مقدام .. من 200 الى 250 يورو .
والمسافات بين المدن المذكورة ..ما تعتبر بالطويلة ..ولا راح تحسون فيها ..من جمال ومتعة الطريق ...يعني لا تشيلون همها .
واي استفسار اخر نحن حاضرين .
وبالتوفيق

هلا وغلا بعبدالله بن عيسى ومقدام والفاضل ميدو وطبعاً كلكم افاضل
شكراً لكم جميعاً والله ماقصرتوا يااصحاب الفزعات لاخلا ولاعدم ان شاالله
الصراحه مره انبسطت لما شفت ردكم السريع واهتمامكم بالعرب المسافرين والله يوفقكم ياارب
بس الظاهر بتعبكم معي شوي حبيت اسالكم عن الفنادق اللي داخل يورب بارك هل في احد جرب السكن فيها
يعني تنصحوني احجز فيها ؟او احجز بمكان ثاني
اخواني نسيت اسالكم منطقة رست هي نفسها موجوده فيها اليورب بارك او بعيده عنها شوي؟
يعني اذا قفلت الملاهي بالليل ممكن نطلع حولها مطاعم ومقاهي او هي منطقه معزوله كل شي بعيد عنها؟وين ممكن تنصحوني اسكن لمدة يومين بس .شكراً

بصراحة الفنادق داخل اليوروب بارك على مستوى ..
وقد سبق لي تجربة فندق أندالوزيا ..(او الاندلس) ..ذو طابع اسباني ..جميل جدا .
وتتميز الفنادق اللي داخل اليورب بارك انها تسمح للنزلاء للدخول الى الالعاب من الساعة الثامنة صباحا ..اي بفرق ساعة عن القادمين من الخارج .
ورست هي القرية الملاصقة لمدينة الالعاب..حتى بعض الشقق اللي فيها تقدرون تروحون للالعاب مشي ..ما تحتاجون سيارة .
واسعار متفاوتة فيها .
مدينة الالعاب تقفل الساعة 6 مساءا ..لكن الفنادق تظل تعمل الى ما شاء الله .
فكنت اطلع بعد الالعاب وازور فرايبورغ واتمشى في الغابات السوداء ..واجلس على ضفاف نهر الراين ..واتعشى ...في حين ان موعد غروب الشمس في الصيفية غالبا بعد الساعة 9 مساءا .
ويوجد محل لبرجر كنج وماكدونالدز وانتم متجهين جنوبا لفرايبورغ ..على الخط السريع .
واذا ما كان ودكم زيارة فرايبورغ ..ممكن عمل زيارة لمدينة كولمار الفرنسية ..جميلة ايضا .
ايضا توجد مدينة ستراسبورغ ..وقضاء بقية اليوم .
او حجز موعد منتجع كاركللا ..والاستمتاع بالمياه الساخنة والمساج وما الى ذلك ...في مدينة الراحة والاستجمام بادن بادن .
http://www.aboaziz.net/blog/?p=746
او في باد كروزينجن:
http://eng.vita-classica.de/Vita-Classica/Thermal-Spa
وكلهم يوفرو خدمة البرايفت .
ممكن السكن في رست او بادن بادن ...ولكم حرية الاختيار
وبالتوفيق

ما قصر الاخ ميدو واجاباته دايما مميزه ووافيه
بالنسبة للسكن بما انكم بتحجزون يومين والهدف من الزيارة هي اليورب بارك فالافضل من وجهة نظري تحجزون في رست
وفيها خيارات الفنادق متنوعه واسعارها حلوة
والمنطقة المحيطة باليورب بارك فيها بعض المطاعم والكوفيات الجيدة وفيها بعد سوبر ماركت ومخبز هذا عنوانه Alemannenstr.1-3
ويفتح من 8 صباحا الى 8 مساء

تسلم الايادي اللي ردت ماقصرتوا والله
بس اليوم فكرت بشي وحبيت مشورتكم فيها
بصراحه قلبي مو مطاوعني اروح اليورب بارك بدون اولادي فقررت ناجلها في وقت ثاني ان شاالله
والمخطط حيكون الوثول مطار جنيف والسكن بديفون ومنها عل انترلاكن والعوده من جنيف
الرحله مختصره بحكم عمل زوجي والاسئله من بعد اذنكم
1المسافه من مطار جنيف الي ديفون ديار ابو عزيز ؟2عند الحدود الفرنسيه كيف الوضع لانه انا محجبه في اشكاليه او عادي؟
وفي دفع رسوم اوشي او في تفتيش او ختم جوازات
واخيراً اخواني اعطوني فندق حلو وش الاماكن القريبه من ديفون اللي نقدر نزورها بنفس اليوم وكم المسافه الي منتروا
وسامحوني للاطاله وشكراً للجميع

طيب روحو لها ولا تقولو لهم .
مدينة الالعاب زرتها ثلاث مرات ..شباب ومع عائلة ...والرابعة تراودني نفسي عليها ..بس ماهي جاية في مخططي ابدا.
المسافة 18 كم . كويس اذا لقيتم احد عند الحدود ..ترى الوضع بين دول الشنجن مختلف ..ممكن حتى ما يسألو عن شي وتعدي من جنب النقطة الحدودية وانتم منتم دارين ..والحجاب ما عليه خلاف ابدا . الرسوم في الخطوط السريعة في فرنسا مثل البوابات يندفع فيها المبالغ ..لكن سويسرا ستكر تحطوه على الزجاج الامامي وتاخذوه من اي نقطة حدودية سويسرية او من اي مكتب بريد سويسري .
بالنسبة للبرنامج ..ما راح ازيد على ابو عزيز في هذا الموضوع :
https://artravelers.com/p/re/55133">https://artravelers.com/p/re/55133
وممكن هذا يفيدكم :
عالم من الاحداثيات ..سويسرا وما جاورها https://artravelers.com
وبالتوفيق

عند السكن في ديفون جوازاتكم خلوها معاكم لانه بعض الاحيان في نقطة الحدود يسألون عن الجوازات
اما الاستكر اللي اشار له الاخ ميدو فهذا عند استئجار سيارة من مطار جنيف من الجانب الفرنسي اما الجانب السويسري
فكل السيارات يكون بها استكر جاهز والاستكر هذا هو ضريبة الطريق السريع
اما الفنادق فالخيارات متنوعه في ديفون فتلقون الفنادق وتلقون الشقق الفندقية
وهذي بعض الخيارات من موقع بوكينج
https://www.booking.com/hotel/fr/chateau-de-divonn.ar.html?aid=1300939
وهذا فندق ممتاز في الحدود الفرنسية لكن مش في ديفون ويبعد عن المطار تقريبا 8 كم
https://www.booking.com/hotel/fr/business-park.ar.html?aid=1300939
والمسافة من ديفون الى مونترو 79 كم تقريبا