السلام عليكم ورحمة الله وبركاته
حابه أشوف اقتراحاتكم وارائكم ومساعدتكم
رحلتي ان شاء الله حتكون في نهاية شهر 6 ميلادي
مدة الرحلة 14 ليلة موزعة على 3 مدن (اسطنبول + أوزنجول + يلوفا (كوك شندرا)
أول 3 ليالي في اسطنبول (نتعرف على الأماكن اللي حول الفندق ونجهز حالنا للسفرة إلى أوزنجول)
بعد كدا 3 ليالي في أوزنجول وهنا أحتاج إلى اقتراحاتكم وكيف نروح للقرية + إيش الأماكن الحلوة في اوزنجول
مع العلم إنو لدينا رجل كبير ما راح يقدر يمشي كتير
بعد أوزنجول راح نرجع اسطنبول لمدة 4 ليالي ووقتها ممكن نروح الأسواق + رحلة البوسفور + الأماكن
السياحية ....
وبعد كدا راح نروح بالعبارة إلى يلوفا من ميناء أمينونو وحنجلس لمدة ليلتين وبرضو هنا أحتاج
ارائكم واقتراحاتكم وكيف راح نوصل لكوك شندرا لأنو السكن حيكون فيها بحكم قربها من حمامات ترمال
وكيف أوصل لهادي الحمامات بالضبط وفين الأماكن اللي تحتاج نروح لها ؟
وبعد كدا حنرجع ان شاء الله الليلتين الأخيرة إلى اسطنبول وبعدها نرجع للسعودية
الفنادق الحمدلله أخترت اللي في اسطنبول تكون قريبة من كل شي وأهم شي ميناء أمينونو
والمنطقة اللي حنكون فيها باذن الله هيا منطقة السلطان أحمد - سيركجيه (قدام الترام بالضبط )
Old City Istanbul , Sirkeci
والمواصلات أنا مخططة إنو 3 أرباع الأماكن تكون مشي + بالترام والميترو طبعا غير المطار وأماكن السفر خارج اسطنبول
الأماكن اللي أبغى أزورها ومو عارفه متى في أي يوم
1- جزيرة الأميرات
2- التلفريك
3- جولهانه بارك < الحمدلله قريبة من الفندق في أي وقت ننزل فيها
4- رحلة البوسفور
5- توبكابي
6- آيا صوفيا + المسجد الأزرق
7- عثمان بيه (سوق)
8- ايش في أماكن حلوة تستحق الزيارة ؟
9- في حوض سمك كبير شوفتو قبل كدا في موضوع كان في مول بس مو عارفه فين مكانو ونفسي مرا نزورو
أعطوني أي نصيحة أي اقتراح أي شي ، والله يسعدكم في الدنيآ والآخره
نسيت أقولكم عدد أفراد الأسرة 5 (4 بالغين وطفله عمرها 9 سنوات)
كمان في شي تاني / أقدر أغير الفندق اللي في كوك شندرا ، يعني لو عندكم اقتراح
لشي أحلى لا تبخلوا عليا بس التكاليف تكون بسيطة جدا والمكان قريب
مع العلم إنو ما نقدر نستأجر سيارة
وكم المفروض نآخد معانا مبلغ ؟
وهل أستطيع أحول الريال السعودي إلى عملة تانية رخيصة وبعد كدا أحول العملة لليورو ؟
لأني جربت الريال السعودي مع اليورو وللأسف مرا غالي