شيخ على ربعة
16-05-2022 - 07:33 am
السلام عليكم
اخواني واخواتي
انا مسافر ان شاءالله تايلند تاريخ 14-3 وراجع بتاريخ 26-3
النيه اني اقعد في بوكت 8 ايام والباقي في تايلند لتسوق
انا سبق واني رحت لها 4 مرات بس كلها عزوبي
الحين انا رايح شهر عسل
ابي شنو افضل الفنادق العائليه في بوكيت وفي بانكوك يكون سعرها بحدود 5000 بات لليله
انا شفت هوليدي ان بوكيت وعجبني بس جنه غرفه مو شي
ابي فندق لا هنتو يكون في الغرفه حمام سباحي خاص للغرفه اذا فيه وياريت الفندق يكون في الباتونغ بيتش
وشنو الرحلات الي تناسب واحد معا زوجته
انا الي رحت له جمس بوند وبي بي
وابي امكان يبيعون ساعات وجناط تقليد وفوط في بانكوك وين علما بأن ميزانيتي لسفره من غير التذاكر هي 1200 دينار مع احتياط 700 دينار اذا نقص المبلغ
وقواك الله اخوكم
ثامر
عزيزي ..
أنا توي راد مع زوجتي من بانكوك ف إنشالله راح أفيدك ... أول شي بخصوص بوكيت .. أنا أنصحك وأشد على إيدك إنك تقعد في فندق هوليديإن في باتونغ موقعه روعه ونظيف والغرف فيه من أحلى مايكون وهم فيه نظام الفلل الصغير ويكون قبال كل فيلا حمام سباحة عنونو ومعقول وراح تستمع فيه صدقني وبالنسبة للسعر روح مكاتب السياحية في الكويت وانا أنصحك بسفريات رمسيس تره عندهم أسعار وايد حلوة ..وبالنسبة للرحلات .. عندك نفس ما تفضلت رحله حق جيمس بوند مع الكهوف تراها حلوه بس عاد الله يعينك على زوجتك وإنشالله ماتخاف ..
والرحلة الثانية .. روح بيبي آيلند بس لا تاخذها بالقارب السريع إخذها بالقارب البطيء عشان حق الأهل تكون حلوة ومعقوله .
الرحله الثالثه روح السفاري
الرحلة الرابعه روح الووتر رافتيج
الرحله الرابعه روح الفانتسي وورلد ووايد حلوة
الرحلة الخامسة روح حديقة الحيوان
وتره انا مستعد اقولك أشياء وايد عن بوكيت وما أخلص بس تره هذولي أحلى شيبالنسبة لبانكوك .. روح ولا تفكر بغير فندق نوفوتيل سيام سكوير توي راد من هناك وكان واايد حلو بس عندي لك نصيحة وأتمنى إنك تاخذ فيها إقعد في بانكوك ثلاث ايام والرابع رد الكويت لأنها وصخة وممله ومافيها وناسه وايدة ونت كيفك بس إذا تحب أقدر هم أعطيك رحلات سياحية في بانكوك ..
المهم فندق نوفوتيل يمه كل الأسواق وبالنسبة لأماكن إلي فيها الساعات والجنط التقليد شوف عندك مكانين الأول مجمع الأم بي كي وهو قريب وايد من فندقك والدور الأول كله جناط تقليد وهم تلقه بالمجمع ساعات التقليد وفي مكان الثاني وهو ترى أحسن من ناحية التقليد وكثرة البضاعة والساعات إسم المكان بات بونغ بس ها حط بالك لأنه مكان وصخ الصبح تلقاه سوق خضره بس بس يصير الليل يقلب مكان لبيع الأشياء التقليد ويقلب بعد حق مكان ما يصلح للعوايل أبادا لأنه يكون فيه أشياء ما تليق حق حريمنه تشوفه بس للأسف إنه هالمكان أهوا القلب مال التقليد في بانكوك وهم للأسف واايد عرب ووايد عوايل كويتية تروحله وتتمشى فيه ..
ميزانيتك وايده .. لكن أنا أطبق المثل إلي يقول دايما يا شين المال إلي ما يونس صاحبة رووح إصرف وإستاتنس .. وغذا في إي إستفسار لا تردد ..