- اكتبوا لي بس الاسامي والوصف وجزاكم الله خير
السلام عليكم ورحمة الله وبركاته
واخيرا تفعل اشتراكي لاني لي كم يوم احتري واحتري واحتري لين راسلت اداره الموقع وماقصروا بسرعه فعلوه
طبعا انا طلبت اخواني ابو عزيز وابو ريان لاني مادري حسيت اني اثق بكلامهم مره ومافيه مانع لو كان في احد من الاخواني عنده اجوبه لاسئلتي جزاه الله خير وعساه بميزان حسناته
راح ارتب لكم اسئلتي زين واتمنى تجاوبوني حتى لو على بعضها
اولا السكن احنا محتارين وين نسكن بسويسرا وان شاء الله راح نسكن بالجزء الفرنسي لانه ارخص
انا جمعت معلومات من المنتدى ومن اقاربي وحبيت اخذ رايكم بمكانين
علما اننا Big family مكونيين من 10 اشخاص خمسة او نقول سته بالغين و4 اطفال
وماراح نستقر بمكان معين يعني راح نتنقل من مكان لمكان
+++++++++++++++++++++++++++++++++++++++++++=
الطلب الاول:اولا حبيت اخذ رايكم بسكن: الشقق الفندقية إيكسيليور - جنيفا Excellior- Geneva واذا كان افضل وش تقترحون نوع الشقه
غرفتين عادية 41م2 (يسمح بعدد5 بالغين) 96 وحتى 133
غرفتين دوبليكس 63م2 (يسمح بعدد5 بالغين) 106 - 143
3 غرف دوبليكس 91م2 (يسمح بعدد7 بالغين) 143 – 180
وممكن لو تحسبون لي القيمه بعد وشكرا وترا حنا مانبي حوش كبير تسدنا غرفتين وصاله
والسكن الثاني هو citadines هذا خالي مدحه لنا بس مادري مارتحت له ... حسيت انه غالي لاني قريت انه للشخصين 60 يورو
المهم::::::ايهما افضل من حيث النظافه - السعر-الخدمات يعني فيه مواقف مجانيه ما يحتاج الوالد كل شوي ينزل يحط فلوس وطبعا الفخامه مانبي شي الناس قاضين عليه وطبعا شي قريب للسوبرماركت والمطاعم يعني على رجلينا
واذا فيه شي افضل من هذولي الثنتين ياليت لان ودنا نحجز وللان محتارين
+++++++++++++++++++++++++++++++++++++++++++=
الطلب الثاني :طبعا انتوا عارفين اننا لازم نروح لزيوريخ بالاول
حنا رحلتنا راح تكون على طيران الامارات وخط سيرها
الرياض -دبي-زيوريخ راح نوصل دبي الساعه 6 صباحا يعني مافيه نوم
الوالد يقول ننام بزيوريخ ومن بكرا نروح لجنيف او نركب القطار بس انا اقول تعب خصوصا ان معنا جيش مشاء الله وشنط مهب هينه خ صعبه نتجرجر حنا وشناطنا فاحسن لو ننام بس المشكله
وين ننام وانتم تدرون ان الفنادق ما يقبلون يعطوننا الا 3 غرف او يمكن اكثر مدري عنهم
وبيصير علينا غالي هل تعرفون سكن حليو نرتاح فيه بزيوريخ نقدر نحجزه لو ليله نريح فيه
علما ان الوالد ما يحب مكاتب سياحيه نحب حنا نحجز كل شي من انفسنا
وشي ثاني تقترحون اننا نستاجر سياره من مطار زيوريخ ؟ وش احسن شركات تاجر فان ؟ وش احسن نوع؟
او هل تقترحون نروح بالقطار لجنيف ونستاجر من هناك سياره ؟ وهل فيه مكتب معروف اقصد مكانه يعني وين ؟
+++++++++++++++++++++++++++++++++=
الطلب الثالث:طبعا حنا حريم ونبي اسواق (لا يسمع الوالد بس )
هل تعرفون اسواق حلوه ورخيصه يعني ما نبي حنا شي غالي نبي رخيصات او يعني بالعربي نفس اسعارنا
اكتبوا لي بس الاسامي والوصف وجزاكم الله خير
واذا فيه ملاحظات لنا لاننا عائله كبيره هل فيه شي لازم نسويه او تنصحوننا فيه ياليت ترا هذي اول مره نسافر لسويسرا
وشي اخير حنا طريقتنا بالسفر اننا نقعد بكل مدينه كم يوم يعني 4 او 5 ونخلي الفندق او الشقق اللي حنا حاجزين فيه هو يحجز لنا نقوله نبي احسن شي وهو يعطينا خيارات وحنا حزر فزر ونختار كذا كانت طريقتنا بالسفر يعني مشي حالك ما عندنا مخطط ولا حاجه نروح ونكتشف بانفسنا خ الله يعين الوالد وبما اني انا اكبر وحده فانا يده اليمين والله يعيني على التعبئة تخيلوا انكم تعبون 10 اوراق كل شي 10 اوراق
ادري اني فقعت روسكم بقرقرتي بس طالبتكم جزاكم الله خير انكم تساعدوني باللي تقدرون عليه وش الاماكن والمدن اللي تنصحون نروح لها والشقق اللي تنصحوننا فيها يعني شقه حق 4 او 5 ايام ماراح نقعد اسابيع بمكان واحد
واذا عندكم برنامج سياحي زين تنصحونا فيه الله يعافيكم وبدعيلكم بصلاتي
ابي برنامجه تتخلله الثلوج (للتزحلق والتمرغ ) وتكثر فيه الاسواق ( اهم شي للتكشخ امام بنات الخالات) ولابد من الطبيعه (عشان الوالد والوالده ينبسطون) وفيه ملاهي ( عشان بزراننا يفرحون)
خلاص خلاص بسكت بس تراني معتمده على الله ثم عليكم اي شي تقولونه بروح طيران للوالد واشور عليه بشوركم
ايه نسيت اهم شي انا كنت افكر هل تنصحوننا نروح ليورو ديزني والله ان تسبدي تقطر ابي اروح له اشتقت له كم من الوقت ياخذ لو نبي نروح من جنيف لديزني بالقطار
ودي اقول شي بعد بس اخاف من التكفيخ اقول والا اضف عفشي واروح ؟
انتظركم اخواني
