الموضوع سفرة الى تايلند سنه 1984 لاول مرة وبروحي بروح هناك زهقت من لندن لان ربعي يدرسون هناك وانا كل سنه عندهم ضيقه خلق قوانين ولازم بدلات وبرد وثلج ومطر حبيت اغير وخصوصا وقت الكرسمس يعني من 20 /12 الى 5/1 المهم الربع ماقصروا اهل بتايا عطوني خريطه كامله حق بتايا ووين اروح وين اسكن وون آكل ووين اصرف الفلوس يعني هم يشرحون وانا كأني اشوف المنطقه ما اطول عليكم مالقيت حجز الا على الطيران الياباني وكانت التذكره 270 دينار ووقتها كانت رخيصه بالنسبه لطيران الخليج او الكويتيه المهم دخلت البوابه والا جني قاعد بشرق آسيا كلهم يابانيين وماتعرف الواحد منهم نايم ولا مفتح عينه انا ضاق خلقي عسى الله بس يصبرني على السبع ساعات ويا هالدايخين وفجأه دخل علي واحد كويتي اقرع يوم شافني استانس قاللي الاخ كويتي قلته اي يبا وين طلعتي انت جنك يايني بالنصيب المهم جلب فيني قاللي الله يخليك بروح وياك بتايا ؟؟؟؟؟؟
قلته يالله وانا بعد وياك اللي ماندري عنه ان خط الرحله هذا عجيب غريب يعني الرحله طالعه من نيويورك الي اثينا الى القاهره الى الكويت الي كراتشي الى بانكوك الى طوكيو يعني الركاب زهقانين حياتهم وحطونا الله لايوريكم آخر كرسيين بالطيارة عند المطبخ من دخلنا الا والربع شخري (يعني نايمين) قلت بل ما مداهم طبعا انا ويا رفيجي شباب ومستانسين وبالموت لقينا حجز مالك امل ننام والربع موصينا على شروق الشمس قالولنا لايطوفكم بتشوفون شي مو طبيعي وفعلا كان المنظر اكثر من رائع
اهل الطيارة عشونا بسرعه يبونا نخمد لكن رفيجكم صامد وهات يا سوالف ودح زقاير (يوم كان التدخين مسموح ) وظحك وصراخ من قلب !!!!!!!!!! فجأه اليابانيين بدأو يزفونا كشتنا فيهم جونا المظيفين الله يخليكم سكتوا الناس تبي تنام ؟؟؟ حقرناهم !!!! عاد يوم صرات المسأله جد لا بوا يبون يتهاوشون معانا وكبرت السالفه وتدخل الكابتن وانا معاند وراكب راسي يقولون لي اسكت اقولهم مو بقاعد بمدرسه
يقولون لاتدخن اقولهم موبقاعد بمحطه بنزين طفر مني الكابتن قلته يبا عندي حل ودنا درجه اولى او ودهم كلهم درجه اولى وتنحل المسأله ؟؟؟
المهم اليابانيين يبون الفكه وقالوا للكابتن بالياباني اقلعهم درجه اولى نبي ننام
ودونا درجه اولى اخوكم حده كاشخ اول مرة اقعد درجه اولى
بعد السوالف سألت رفيجي يبا احنا تهاوشنا وقلنا وسوينا بس للحين ماعرفتك انا اسمي ناصر والحبيب شسمه
هو : انا اسمي صعب
انا : عادي يبا قوله
هو : انا يبا اسمي صعب
انا : عادي يبا الواحد لازم يكون واثق من نفسه والاسم هو عنوان الثقه بالنفس عادي يبا قوله
هو : يبا انت تفهم انا اسمي صعب :112:
انا : يبا اشفيك انت ماتفهم قوله عقدتني ( تنحت عليه من قلب )
هو طلع الجواز السفر وعطاني اياه
انا فتحت الجواز وفجاه ولا اسمه صعب
تمنيت الطيارة تطيح تمنيت كل اليابانيين يطقوني ولا اقعد بالاحراج هذا
انا : قوللي من زمان اسمك صعب
بالنسبه لي هذا احرج موقف مر في حياتي اتمنى اني ماطولت عليكم ودمتم سالمين