1. أخواني الاعزاء


2. السلام عليكم


3. راح اطلعكم على تفاصيلها وبالصور أن شاءلله


4. نوع السيارة (ماكسيما فل اوبشن 1999 )

أخواني الاعزاء

السلام عليكم

بعد الحاح من أخونا العزيز بن بطوطة على كتابة أحدى رحلاتي بالسيارة الى تركيا وجدت أن اكتب رحله فيها نوع من التحدي وكان ذلك التحدي من بعض الاخوان في الديوانية وبعض الاخوان في تركيا وعلشان تعرفون الباب العالي يعشق التحدي (( مداح نفسه يبيله رفسه ))

راح اطلعكم على تفاصيلها وبالصور أن شاءلله

في احدى ليالي صيف (2000 )وكان ليلة الجمعة والساعة تقريبا ( 8,30 مساء) والتاريخ (27 /7 / 2000 ) وكنا قاعدين بالديوانية عن واحد من الربع وكنت أنا وبعض الاخوان تونا راجعين من تركيا ما صار لنا اسبوع المهم تكلمنا عن السفروفجاه وصل واحد من الشباب أتصال من واحد من الربع بتركيا وكان في ازمير يقول ياجماعة أنا وصلت والشباب اللي وياى راحو حق اليونان عن طريق الرحلات البحرية منها راح يطلعون على بعض الجزر اليونانية ويمرون قبرص ويردون مرة ثانية حق أزمير وانا ضايق خلقي وقال تكفون ياشباب الفزعة واحد يجيني منكم على الاقل يوانسني وأطلع وياه نفر على مناطق الجنوب التركي ولا نطلع شمال المهم يجيني وابد ماله شغل محمول مكفول كل الشباب قامو يتطنزون عليه ويضحكون أخر شي قالهم عندكم أفلان (يا ……… ) قالوا موجود طبعاً افلان انا واعوذ بالله من قوله أنا خذيت التيلفون وقال تكفا يابوعزوز تعالي طبعاً عزوز كان عمرة ابو سنه وسبع شهور تقريباً قلت يابن الحلال عندي دوام وتو الاجازة منتهية نط واحد من الربع وقال اتحداك قلت لاتتحدى انا لو ماعندي دوام رحلت لصاحبنا مو مثلك لادوام وعندك الاجازة ولا شغل ولا مشغله رح لصاحبنا .
قال انا ماني رايح ، وبعد كلامه هذا دقيت على مكتب سفريات بعمارة الدولية وعلشان ابي أحجز قال كلش مده شهر ما فيه حجز قلت غير بدل قال ما فيه الا طيران الخليج وبعد 10 ايام طبعا الشباب شافوني ادقدق نط الحبيب وقال اتحداك تروح قلت واذا رحت قال لك قيمة تذكرة لتركيا رايح جاي عاد هو مو بخيل بس ناشف شوية .
قلت والله مادام راس بو عزوز يشم الهوى لاخليك تدفعها واشهدو عليه يالربع قالوا خلاص شاهدين عليه ولا يهمك
والله وأعطي الدوام طاف ويقوم واحد من الشباب على الكيف ((شرواكم يالرجاجيل )) قال أنا وياك على السيارة يابو عزوز قلت والله يامرحبا ومسهلا والساعة المباركة .
المهم الساعة الحين بعد التفكير حوالي (12 بالليل) وباجر الجمعة والتاريخ (28 /7 / 2000) قلت زهب جنطتك انا ماشي الحين قال الحين قلت الحين .
راح ابو عبدلله للبيت وزهب جنطته وانا رحت وزهبت جنطتي عاد تشاورت وياه في شنو الموتر اللي نروح عليه قال انت سيارتك 8 سلندر وانا سيارتي كذلك ما فيه الا سيارة اخوي قلت يامعود سيارتي قال لاسيارة أخوي أحسن 6 سلندر وقوية ومصوروف البنزين فيها زين قلت توكل على الله دقينا على أخوه فهد واخذنا سيارته طبعا أخوه بو عبدالله وياه توكيل من أخوه فهد على السيارة .

نوع السيارة (ماكسيما فل اوبشن 1999 )

المهم طلعنا من البيت ووصلنا الساعة (02,00) صباحاً الى مركز ( السالمي ) ومنها الى المركز الحدودي السعودي ( الرقعي ) دخلنا حفر الباطن الساعة (4,45 ) فجراً طبعاً بعد تأخير ماله داعي من الرقعي الله يهداهم ويحسن أخلاقهم :112:
تعبت التكملة في الحلقة القادمة حبايبي :