Doctor Lulu
13-12-2022 - 05:02 am
مرحبا
فيه مسابقه بتكون في سدني ان شالله بدايه شهر جولاي..والحمدلله احنا فزنا وتاهلنا لها
المسابقه بتكون لمده اسبوع
فاحنا حابين نستفسر من الي زارو سدني من قبل:
كيف الاجواء في جولاي؟
كيف تقبل اهل سدني للحجاب والعبايه وحتى النقاب؟
هل فيه محاذير تحذرونا منها؟ او نصايح؟
فيه فندق مناسب ومرتب نجوم وفوق قريب من جامعه اوكاري اعتقد كذا اسمها؟
المطاعم كيف هناك؟ وبايش تنصحونا؟ وكيف نفرق بين الطعام الحلال والحرام هل يفهمون لما اقولهم حلال وكذا؟
كيفيه المواصلات هناك؟
كم يساوي الجنيه الاسترالي ريال؟
ايش افضل خطوط طيران تودي دايركت لسدني؟ ويفضل من البحرين؟
اعذروني لكثره اسئلتي لكن لانها اول مره ازور سدني وضغط وكذا ولا يوجد مجال للبحث العميق
اكرر اعتذاري
عشان تقدرون تقترحون لنا بشكل افضل..اعمار الفريق - بنات ، ومع ابائهم..
وشكرا مقدما لكل من شاركنا بخبرته الله لا يحرمه الجنه
هلا اختي
أولا مبروك على الفوز برحلة سيدني
ثانيا انا بحاول أجاوب على الاسئلة الي اعرف إجابتها ، وإن شاء الله باقي الاعضاء راح يعطونك إجابات أكثر وأوضح
1- الأجواء بارده في جولاي ! يعني لازم تاخذون ملابس شتويه معاكم
2- نعم يتقبلون الحجاب والعبايه ومافي أي مظايقات ان شاء الله ولا استفزاز للمسلمين نهائيا وهم متعودين على السياح المسلمين والعرب
3- محاذير لا توجد ، غير ان الافضل عدم الخروج بعد منتصف الليل ! والنصائح يا غريب كن أديب
4- بصراحه الجامعه هذي ماعرفها ولا أعلم بأي منطقة ، ان شاء الله يجاوبونك عليها الاعضاء ، بس احنا كنا ساكنين بمنطقة اسمها الدارلنق هاربر وهي تعتبر سنتر السياحة تقريبا وفيها العديد من الفنادق الجميلة
5- المطاعم الحلال متوفرة في سيدني بمنطقة الدارلنق هاربر لكن بمنطقة الجامعة الي تبونها لا أعلم !
عموما الأكل الحلال في استراليا موجود بأكثر من مكان حتى بمدن الملاهي يوجد مطاعم حلال بعكس الولايات المتحده !
وبعضهم يعرفون معنى أكل حلال حتى انهم موضحين أماكن المطاعم الحلال بالخرائط السياحية وحتى بحرائط مدن الألعاب !!!
واستراليا تهتم وتراعي مشاعر المسلمين حتى انهم يوفرون أماكن للصلاة بالمطارات !!
6- بسيدني تتوفر التاكسي والباصات ، وفي السنتر يوجد قطار معلق يربط بين بعض المناطق
وتقدرون تأجرون سيارة بسيدني لكن تذكروا ان القياده تكون بعكس دول الخليج !!
7- لا يوجد جنيه استرالي يوجد دولار ، ومادري كم يساوي بالريال
لكن مقارنة بالدينار الكويتي : الدولار الاسترالي يساوي 300 فلس كويتي
وهو أعلى بقليل من الدولار الامريكي
8- أفضل خطوط طيران بنظري هي الاماراتية والاتحاد والقطرية
لكن الي تروح دايركت إلى سيدني اتوقع هي الاماراتية فقط
إن شاء الله تكون إجاباتي مفيده وان شاء الله باقي الاعضاء بيساعدونكم أكثر بالمعلومات والاجابات
وان شاء الله تروحون وترجعون بالسلامة